Galatia 2:1-21
2 Thupene la 14 lao macatre, hnenge me Banaba hna elë hmaca a tro Ierusalema, nge hnenge fe hna hë Tito troa ce tro me eni.
2 Hnenge hna kuca lai pine la ketre ewekë hna amaman. Qa ngöne lai, eni a qaja hmekuje hi kowe la itre atre ka mama, la maca ka loi hnenge hna cainöjëne ngöne la itre xa nöj, wanga gufa pi la aqane nyinyapeng enehila me ekö.
3 Nge ketre, ame Tito, lo ka ce traqa me eni, tha hna musinëne kö troa xötrehatrenyi angeic, ngacama atre Geres angeic.
4 Ngo pine lai, mama pi hi la itre trejine thoi hnine la itre ekalesia, ke angatr a nyiqaane iqej. Angatr a lö juetrë hnine la itre ekalesia matre tha tro hmaca kö së a itre hna nuamacan jëne Keriso, ngo tro pe a othi së hnei Trenge Wathebo.
5 Nge tha hne huni kö hna drei angatr ngacama koi ca hawa hi, matre tro pala kö a eje thei nyipunie la nyipici ne la maca ka loi.
6 Nge ame la itre ka elemekene la ekalesia, tha hnei angatre kö hna ini ni la ketre ewekë ka hnyipixe. Nge tha hnenge kö hna goeën atrune lo pengöi angatr ekö, ke tha Akötresieti kö a iameköti thenge la ka mama.
7 Ngo öhne ju hi angatr e cili ka hape, hna ahnithe koi ni la huliwa ne tro fë maca ka loi kowe la itre atr hna tha xötrehatren, tune lo aqane ahnithe lo itre hna xötrehatren koi Peteru.
8 Ke ame lo atre hamë mene koi Peteru matre eatrëne la huliwa ne aposetolo koi itre hna xötrehatren, hnei nyidrëti fe hna hane hamë mene koi ni thatraqane la itre atre ne fen.
9 Nge ame hë la angatr a wangatrehmekune la ihnimi gufa hna hamë ni, hnei Iakobo, me Kefa,* me Ioane, itre hna xome ceitu me itre ikapa, hna line koi ni me Banaba la ime maca, hatrene laka, ka ce huliwa* eahun. Qa ngöne lai, nyio a tro pi kowe la itre xa nöj, nge angatr kowe la itre hna xötrehatren.
10 Hnei angatre hi hna sipone tro nyio a lapa mekune la itre ka pë ewekë, nge celë hi hnenge hna isine troa kuca.
11 Ngo ame la Kefa* a traqa e Anetioka, hnenge hna cile* koi angeic, ke tria* la aqane ujë i angeic.
12 Ke qëmekene tro la itre hna upe hnei Iakobo a traqa, ka majemine Kefa ce xeni me itre atre ne fen, ngo ame ju hi la angatr a traqa, tha kuca tune ju hi angeic, ngo hnei angeice pe hna ananyi angatr, ke kola xouene la itre hna xötrehatren.
13 Qa ngöne lai, hnene la itre atre Iudra hna nyitipune la aqane ujë thoi* i angeic, matre hane jë fe hi Banaba inyitipu.
14 Ame la eni a öhne ka hape, tha angatre kö a tro thenge la maca ka loi, eni pë hë a qaja mekötine ju koi Kefa* qëmeke i angatr asë ka hape: “Maine atre Iudra eö, mele ju tune la atre ne fen, ngo the tui angetre Iudra kö. Ke tro eö a musinëne fë nemen la atre ne fen troa mele thenge la qenenöje i angetre Iudra?”
15 Ame easë, itre neköi i atre Iudra ngo tha atre ne fen ka ngazo kö,
16 easë a atrehmekune laka, kola jelemekötine la atr hnene hmekuje hi la lapaune koi Iesu Keriso, ngo tha hnene kö la itre huliwa ne la wathebo. Celë hi matre hne së hna lapaune koi Iesu Keriso, nge qa ngöne lai, ijije hë troa jelemeköti së hnene la lapaune së koi Keriso, ngo tha thenge kö la itre huliwa ne la wathebo. Ke pë fe kö ala casi* hna troa jelemekötin pine la itre huliwa ne la wathebo.
17 Ngo enehila, maine tro sa thele troa jelemeköti së jëne Keriso, nge kolo hmaca kö a mama ka hape, itre ka ngazo së, hapeu, kolo kö lai a hape, Keriso a uku së troa kuca la ngazo? Pëkö!
18 Ke e traqa jë ni xupe hmaca la itre ewekë hnenge hna apatren, eni a amamane ka hape, eni la atre eni wathebo.
19 Haawe, hnene la wathebo, ka meci hë ni thenge la wathebo, qa ngöne lai, mele hë ni göi Akötresie.
20 Nge hna ce jei faonyi ni me Keriso hune la sinöe. Matre tha eni hmaca kö la ka mel, ngo Keriso pe ka casi me eni. Qa ngöne lai, ame la meleng ngöne la ngönetrei, eni a melën thenge la lapauneng kowe la Nekö i Akötresie, atre hnimi ni, me meci pi ni.
21 Nge tha eni kö a thipetrije* la ihnimi gufa i Akötresie, ke maine ka xulu ju la meköt qa ngöne la trenge wathebo, ka gufa la meci Keriso.
Itre mekun ecahu fen
^ Ketre aqane hë Peteru.
^ Maine, “sine ce huliwa.”
^ Ketre aqane hë Peteru.
^ Maine, “catrë.”
^ Maine, “tro hë a xeni pun.”
^ Maine, “nyi sinee thoi.”
^ Ketre aqane hë Peteru.
^ Ger., “ngönetrei.”
^ Maine, “ananyin.”
