Galatia 3:1-29
-
Huliwa ne la Wathebo a icilekeu me lapaun (1-14)
-
Itre ka meköt a mel hnei lapaun (11)
-
-
Hna thingehnaean koi Aberahama ngo tha jëne la Wathebo (15-18)
-
Keriso, matra i Aberahama (16)
-
-
Qaan me kepine la Wathebo (19-25)
-
Itre Nekö i Akötresie jëne la lapaun (26-29)
-
Itretre drei Keriso la itre matra i Aberahama (29)
-
3 Angetre Galatia fe, hmo hë nyipunie! Drei la ka amenu nyipunie, itre hna qejepengöne hnyawa kow lo aqane jei faonyi Iesu Keriso?
2 Ca hnyingenge* hi koi nyipunie: hnei nyipunieti kö hna kapa la ua pine la itre huliwa ne la wathebo, maine pine la lapaune i nyipunie kowe la hna dreng?
3 Hapeu, hmo hnyawa ha nyipunie? Ase jë hi nyipunie nyiqaane iwaja* thenge la ua i Akötresie, nyipunieti hmaca pena a afenesin thenge la ngönetrei?*
4 Nge hapeu, gufa kö la hnei nyipunieti hna xomihnine la nöjei pengöne akötr? Ka gufa hnyawa.
5 Nge hapeu, hnene kö la atre kuca la itre iamamanyikeu ka tru, me hamë ua koi nyipunie hna kuca lai pine nyipunieti trongëne la wathebo, maine pine nyipunieti lapaune kowe la hna dreng?
6 Nge hapeu, tha nyipici kö lo ka hape, “hna jelemeköti Aberahama hnene la lapaune i angeic koi Iehova”?*
7 Nyipici, atre hnyawa hi nyipunie ka hape, itretre lapaun la itre nekö i Aberahama.
8 Nge enehila, ase hë qaja ekö hnene la itre hna cinyihane ka hape, tro Akötresieti a jelemekötine la itre atre ne fen hnene la lapaune i angatr, me canga thuemacanyi Aberahama la maca ka loi celë: “Tro ha amanathithine la nöjei nöj jëne eö.”
9 Haawe, ame la itretre lapaun, kolo fe a ce amanathithi angatre me Aberahama, atre lapaun.
10 Ame la itre ka mele thenge la itre huliwa ne la wathebo, hnëjin hë angatr, ke hna cinyihane ka hape: “Hnëjine hë la atre ka tha qale kowe la itre ewekë hna amekötin hnine la tusi wathebo, me trongën ej.”
11 Ketre, mama hnyawa hi ka hape, pëkö hnei Akötresieti hna troa jelemekötin jëne la wathebo, ke “tro la atre ka meköt a mel hnene la lapaun.”
12 Enehila, tha hna nyitrepene kö la wathebo hnei lapaun. Ngo, “ame la atre kuca la meköt thenge la hna qaja hnine la Wathebo, tro hë angeic a mel.”
13 Hnei Keriso hna itö së, me thepe së qa ngöne la hnëjin ne la Wathebo, me nyihna i së ngöne la hnëjin, ke hna cinyihane ka hape: “Hnëjine la atre hna jei faon.”
14 Celë hi matre jëne Iesu Keriso, troa eatr kowe la itre nöj lo manathithe i Aberahama. Haawe, pine la lapaune së, ijije fe hë tro sa kapa lo manathithi hna thingehnaean.
15 Ange trejin, hanawange la ketre ceitun the së itre atr: Maine hna isisinyikeu hi hnei atr, pëkö ala cas ka atreine apatren, maine nyixan.
16 Haawe, ase hë sisinyi koi Aberahama me matra* i angeic. Ngo tha hna qaja kö ka hape, “kowe la itre matra i ëo,” kösë kola qaja la ka ala nyim, ngo ala casi pe, ke hna hape, “kowe la matra i eö,” ene Keriso.
17 Ketre, eni a qaja ka hape: Ame lo trenge wathebo ka traqa lo 430 lao macatre thupen, tha eje kö a apatrene lo isisinyikeu hna kuca ha hnei Akötresie, memine lo hna thingehnaean.
18 Ke maine tro Akötresie a hamë edrö jëne la wathebo, tha tro hmaca kö ej a traqa jëne la hna thingehnaean; ngo hnei Akötresieti pe hna hamëne gufane koi Aberahama jëne la hna thingehnaean.
19 Nga nyine ue hö la trenge Wathebo? Kolo matre mama jë la itre ngazo uti hë traqa pi lo matran kowe la itre hna thingehnaeane kow; nge hna hamëne la trenge wathebo jëne itre angela kowe la atre ialoinekeun.*
20 Ngo maine ala casi hi, tha nyipiewekë kö troa hetre atre ialoinekeun. Nge ceitune hi lai me Akötresie lo nyidrëti a sisinyi koi Aberahama, ala casi hi nyidrë.
21 Matre hapeu, ka icilekeu kö la trenge Wathebo memine la hnei Akötresieti hna thingehnaean? Pëkö! Ke maine kolo ju a amele së hnene la trenge wathebo, tro fe a hane xulu la meköt qa ngöne la trenge wathebo.
22 Ngo hnene la itre hna Cinyihan hna ce amë la nöjei ewekë asë fene la musi ne la ngazo. Qa ngöne lai, tro hë la angetre lapaun, a kapa la itre ewekë hna thingehnaean kowe la itretre lapaun koi Iesu Keriso.
23 Ngo qëmekene tro la lapaun a traqa, hna thupë së hnene la trenge wathebo, kösë itre hna akalabusin, nge easë lo a treqene la lapaun ka troa mama.
24 Haawe, atre thupë* së la Trenge Wathebo, nge hnene ej hna eatrongë së koi Keriso, matre ijije troa jelemeköti së hnene la lapaun.
25 Ngo enehila, pine laka, traqa ha la lapaun, tha hna thupë së hmaca kö.
26 Nge eje hi, nyipunieti asë la itre nekö i Akötresie jëne la hna lapaune koi Iesu Keriso.
27 Ke hna bapataiso nyipunieti asë göi Keriso, matre nyipunieti fe a hane heetrëne la itre thiina i Keriso.
28 Haawe, pëkö atre Iudra maine Geres, nge pëkö hlu me atre hna nue kö, nge pëkö trahmanyi me föe, ke casi hë nyipunieti asë thei Keriso Iesu.
29 Nge ketre, maine tro pala hi nyipunieti a casi me Keriso, nyipunieti hnyawa hi la matra i Aberahama, itre ka troa kepe edrö pine lo isisinyikeu.
Itre mekun ecahu fen
^ Ger., “atre qaathei.”
^ Ger., “nyiqaane ngöne ua.”
^ Ger., “apexejen ngöne la ngönetrei?”
^ Wange ju la HQP.
^ Ger., “itin.”
^ Wange ju la HQP.
^ Maine, “nyine tan.”
