Galatia 4:1-31
4 Nyipici eni a qaja hnyawa ka hape, e nekönatre petre kö la ka troa kepe edrö, ceitu i angeic me hlu, ngacama ewekë i angeice la nöjei ewekë asë.
2 Ngo angeice pala kö fene la musi ne la itretre thupë angeic, uti hë la drai hna sa hnei keme i angeic.
3 Ketre tu së fe, ame lo nekönatre petre kö së, hna thahluë së hnene la aqane waiewekë ne la fen.
4 Ngo ame ju hi la kola traqa kowe la drai hna sa, hnei Akötresieti hna upe la Nekö i Nyidrë, hna hnahon hnei föe. Hnene la Nekön hna mele thenge la trenge wathebo,
5 matre thapa la itre ka lapa fene la wathebo, hnene la hna itö angatr. Qa ngöne lai, ijije hë troa nyi kuku së.
6 Enehila, pine laka, itre kuku nyipunie, Akötresieti a upe la uati hmitrötre kowe la isa hni së, ua hna kapa hnene lo Nekö i nyidrë. Nge ej a upi së troa qaja ka hape: “Abba,* Kaka!”
7 Haawe, tha itre hlue hmaca kö nyipunie ngo itre kuku pe. Matre, maine itre kuku nyipunie, nga nyipunieti fe la ka troa kepe edrö qaathei Akötresie.
8 Ngo ame lo ijine nyipunie a thatre Akötresie, hnei nyipunieti hna nyihluene la itre haze menu.
9 Ngo enehila, atre Akötresieti hë nyipunie, nge Akötresieti a atre nyipunie. Matre hnauëne la nyipunieti a saze me bëeke hmaca troa nyihluene la aqane waiewekë i fen, itre ewekë ka pë eloin me ka ngazo?
10 Nyipunieti a thupëne hnyawa troa atrune la itre drai, me treu, me ijin, me macatre.
11 Matre eni a xou e gufa pi la ixatuange koi nyipunie.
12 Ange trejine fe: nyitipu ni jë, ke qaange fe hna hane tui nyipunie. Ngo tha hnei nyipunieti kö hna akötrë ni.
13 Ngo atre hë nyipunie laka, hnenge hna xötrei cainöjëne la maca ka loi koi nyipunie, ke eni lo a wezipo.
14 Nge ngacama itupathe koi nyipunie lo eni a wezipo, tha hnei nyipunieti kö hna nuaxöji ni me sisi* ni. Ngo hnei nyipunieti pe hna kepe ni kösë angela i Akötresie, maine Iesu Keriso.
15 Ngo ekaa ha lo madrine i nyipunie? Ke nyipici, maine ijije ju tro nyipunie a sea la luemeke i nyipunie, tro hë nyipunieti a hamë ni.
16 Nge hapeu, ithupëjia ha së pine ni qaja la trenge nyipici koi nyipunie?
17 Itre xan a thele catrë nyipunie, ngo tha nyine loi kö; angatr a thele troa ananyi nyipunieti qaatheng, matre canga kei thenge angatr.
18 Ngo maine tro ketre a thele catrë nyipunie nyine loi, manathithi lai koi nyipunie. Nge loi e tro pala hi a kuca lai, ngo tha ngöne hmekuje kö la itre ijine ce eni me nyipunie.
19 Ha nekönge fe, uti hë la ijine tro nyipunieti a xome la itre thiina i Keriso, tro pala hi ni a akötr tune la föe ka troa hnaho.
20 Ngo enehila, ajange troa ce me nyipunie matre troa qaja la itre xa ithanata koi nyipunie, ke eni a luelu pi nyipunie.
21 Sa jë koi ni, nyipunie itre ka pi lapa fene la wathebo, tha drenge kö nyipunieti lo hna qaja hnene la Trenge Wathebo?
22 Hna cinyihane lo ka hape, Aberahama la keme ne la lue nekönatr, casi qaathene la hlue jajiny, nge ketre qaathene lo föe ka tha hlue kö.
23 Ngo ame la hna hnahon hnene la hlue jajiny, hna hnahon thenge la ngönetrei. Ngo ame la hna hnahon hnene la föe ka tha hlue kö, hna hnahon pine lo hna thingehnaean.
24 Ame la hna melëne celë, tre nyine hatren; ke ame la lue föe cili, lue ej a nyihatrene la lue isisinyikeu, ketre göne lo Wetre Sinai, ene lo föe ka troa hnahone la itre hlu, Hagara hi lai.
25 Angeic a nyihatrene la Wetre Sinai, ketre wetr e Arabia. Nge angeice hi la Ierusalema enehila, ke angeic me itre nekö i angeic a ce nyihlu.
26 Ngo ame la Ierusalema ne hnengödrai, ceitu i angeic me thine së, nge tha hlue kö angeic.
27 Nge hna cinyihane ka hape: “Madrine jë eö, föe ka tha hnaho, sue madrine jë eö, föe ka tha drenge la akötr ne la ka hnaho, ke ala nyimu la itre nekö ne la föe ka hleuhleu, hune lo ka trene föe hmunë.”
28 Ngo enehila ange trejin, tui Isaaka, nyipunieti fe la itre nekön hna thingehnaean.
29 Nge ame lo aqane akötrën lo hna hnahon thenge la ua hnene lo hna hnahon thenge la ngönetrei, tro fe a hane tun enehila.
30 Matre nemene lo hna qaja hnene la itre hna cinyihan? “Helëne pi la hlue jajinyi me nekö i angeic, ke tha tro pi kö la nekö ne la hlu, a ce kepe edrö memine la nekö ne la föe ka tha hlue kö.”
31 Haawe ange trejin, tha easë kö la itre nekö ne lo hlu, ngo neköne la föe ka tha hlue kö.
