Galatia 5:1-26
5 Hnei Keriso hna thepe së qa ngöne la trenge wathebo matre mele pi së. Qa ngöne lai, catre pi, nge the thele hmaca kö troa ahacenyi nyipunie hnene la ehnefe ne hlu.
2 Hanawang! Eni Paulo a qaja hnyawa koi nyipunie ka hape, e tro nyipunieti a ixötrehatreny, gufa ha la hnei Keriso hna kuca koi nyipunie.
3 Ngo eni hmaca a amexeje kowe la nöjei hna xötrehatren ka hape, qa i angatre troa trongën asë la Trenge Wathebo.
4 Nge isa ha nyipunie me Keriso, nyipunie itre ka thele troa jelemeköti nyipunie hnei wathebo; nge nanyi hë nyipunie qaathene la ihnimi gufa i nyidrë.
5 Ngo ame koi së, easë a lapa treqen me mejiune troa jelemeköti së hnene la mene i Akötresie me lapaun.
6 Ke ame kowe la atre drei Iesu Keriso, ka pë pengöne la troa xötrehatren maine tha xötrehatren. Ngo ame la ka nyipiewekë, tre lapaun ka ce tro me ihnim.
7 Ka nyinyape hnyawa hi nyipunieti ekö. Ngo drei enehila la ka sewe nyipunie troa melëne la nyipici?
8 Tha ene kö lo Atre hë nyipunie la ka sewe nyipunie troa melëne la nyipici.
9 Ngo hnene hi la ca wamine leven, matre cipa asë pi la farin hna ce lomëne me tim.
10 Ka xecie hnyawa koi ni ka hape, ame nyipunie itretre drei Joxu, tro hi a ceitu la aqane waiewekë i nyipunieti me eni; ngo ame kowe la atre sewe nyipunie, tro hë angeic a xeni pune la hna hnëkëne koi angeic.
11 Nge ame eni ange trejin, maine tro pala kö ni a catre fë troa ixötrehatreny, hnauëne kö la kola axösisi ni? Ke patre hë lo etë ka iakeiny, ene lo sinöe ne iaxösisi.*
12 Ngo ajange tro la itre ka thele troa sewe nyipunie, a isa xöje asë la götrane gaa hmitrötre i angatr.*
13 Ase hë Akötresieti iëne troa thepe nyipunie ange trejin, ngo the huliwane kö lai matre nyinyape thele hmaca la itre aja ne ngönetrei. Ngo epi tro la ihnim a upi nyipunie troa ihuliwakeu tune la itre hlu.
14 Ke hna eatrëne* la nöjei Wathebo asë hnene la wathebo celë, kola hape: “Qa i eö troa hnime la atre lapa easenyi eö, tui eö hi.”
15 Ngo maine tro pala hi nyipunieti a ihej me iöni, wange kö, wanga zö i nyipunieti jë e tro nyipunieti a ce luzi asë.
16 Ngo eni pe a qaja koi nyipunie, Catre jë mele thenge la ua, matre tha tro pi kö nyipunieti a kei thenge la itre aja ne ngönetrei.
17 Ke ka icilekeu la itre aja ne ngönetrei me ua, nge ua a icilekeu memine la itre aja ne ngönetrei; haawe, kola itö icilekeu la lue ewekë cili, matre tha eatrën hë nyipunie lo mekuna i nyipunie.
18 Ketre, maine ua la ka eatrongë nyipunie, nga tha nyipunieti hmaca kö fene la wathebo.
19 Nge, mama catre la itre huliwa ne ngönetrei; kola qaja la kuci ngazo,* me thiina ka sis, me itre huliwa nyine hmahman,*
20 me kuci idrola, me kuci haze,* me ihmönyinyi, me iwesitrë, me izalukeu, me tru trenge elëhni, me icilekeu, me thi lapa, me xötrethenge la itre ini i atr,
21 me piin, me hmo hnei ka haitr, me feet qenahmo, me itre ewekë ka tune lai. Haawe, eni a canga hmekë nyipunie göne la itre ewekë cili, tune lo hnenge hë hna qaja, ame la itre ka kuca la itre ewekë cili, tha tro jë kö angatre lai a hane sine la Baselaia i Akötresie.
22 Ngo ame la wene ne la ua, tre, ihnim, me madrin, me tingeting, me atreine itreqe,* me loi hni, me lolo thiina, me lapaun,
23 me menyik, me xomehnöth. Nge pëkö wathebo ka atreine cile kowe la itre ewekë cili.
24 Ketre, ame la itre atre i Iesu Keriso, ase hë angatre jeng kowe la sinöe la ngönetrei, me itre hna aja kow, me itre trenge aja.
25 Haawe, maine easë a mele thenge la ua, loi e tro pala hi sa tro hnyawa thenge la ua.
26 Nge loi e tha tro kö së a isa pi mama, me thele iwesitrë, me piin.
Itre mekun ecahu fen
^ Wange ju la HQP.
^ Maine, “troa tune la eunuka.” Pine lai, thatreine hë angatr trongëne la wathebo hna isigölin.
^ Maine jë, “itre ej asë e hnin.”
^ Ger., por·neiʹa. Wange ju la HQP.
^ Ger., a·sel′gei·a. Wange ju la HQP.
^ Maine, “kuci iöni.”
^ Maine, “xomihni aqeany.”
