Galatia 6:1-18
6 Ngo nyipunie itre trejin ka macaj, maine öhne hë nyipunieti la ketre trejin a nyiqaane kei nge tha wangatrehmekune kö angeic, thele jë troa wenë amekötine la atre ka tun, ngo loi e troa kuca cememine la hni ka menyik. Ngo wai nyipunieti kö, ke hane jë fe tupathi nyipunie.
2 Nge the mano kö thu la hace ne la itre xan, ke aqane tro nyipunieti lai a eatrëne la wathebo i Keriso.
3 Nge maine tro ketre a mekune ka hape, ka sisitria angeic ngo tha eje pe, angeice hi lai a amenu angeice kö.
4 Ngo loi e troa isa tupa huliwan, matre isa öhnyi madrine qa ngöne la hna isa kuca, ngo tha qa ngöne kö la hna goeëne la huliwa i ketre.
5 Ke tro kö së a isa thu ehnefen.*
6 Nge ketre, loi e tro la hna inin* a ce thawa la itre ewekë ka lolo memine la atre hamë ini.
7 Nge the amenu nyipunieti kö: Tha nyine elone kö lae Akötresie. Ke ame asë hi la hna tran hnei atr, celë hi hnei angeic hna troa menuën.
8 Ame la atre tran thatraqane la ngönetrei, tro kö angeice lai a kapa la hnyiqetr qa ngöne la ngönetrei, ngo ame la atre tran thatraqane la ua, tro hë angeic a kapa qaathene la ua, la mele ka pë pun.
9 Haawe, catre pi së kuca la loi, ke e tha kucakuca kö së,* tro hë së a menuëne la hna tran ngöne la nyipi ijin.
10 Qa ngöne lai, maine ijiji së, loi e tro sa kuca la loi kowe la nöjei atr asë, ngo tro kö a sisitria thatraqane la itre trejin ngöne la lapaun.
11 Hnenge hna sipu cinyihane la tusi celë koi nyipunie, nge goeëne la eqean.
12 Ame la itre ka thele troa hlemu ngöne la ngönetrei,* angatre hi la itre ka uku nyipunie troa ixötrehatreny. Ngo angatr a kuca lai, ke xele kö angatr ma troa axösisi angatre pine la sinöe ne iaxösisi* i Keriso.
13 Nge ame la itre ka ixötrehatreny, tha ka trongëne kö angatre la Trenge Wathebo. Aja i angatre troa xötrehatrenyi nyipunie, matre hetre nyine tro angatr a selën göne la ngönetrei nyipunie.
14 Ngo ame ni, loi e tha tro kö ni a selë ni, ngo tro hi ni a selë ni göne la sinöe ne iaxösisi* ne la Joxu së Iesu Keriso, ene lo atre jei faone* la fen thatraqai ni, nge eni thatraqane la fen.
15 Nge tha nyipiewekë kö la troa xötrehatren, maine tha xötrehatren, ngo ame la ka nyipiewekë, tre ene la hna xötrei xup.
16 Matre ame la itre ka trongëne hnyawa la hna amekötine celë, thei angatre hë la tingetinge me utipin, nyipici, thene la Isaraela i Akötresie.
17 Nge qaane enehila, the tro kö ketre a ajolë ni, ke ngöne la ngönetreing la itre hatrene laka, hlue i Iesu ni.
18 Haawe ange trejin, epi tro la ihnimi gufa i Iesu Keriso Joxu a eje ngöne la isa hni nyipunie. Amen.
Itre mekun ecahu fen
^ Maine, “hnëqa.”
^ Maine, “inin hnei trengewekë.”
^ Maine, “pane amë.”
^ Maine, “ka thele troa loi qëmek.”
^ Wange ju la HQP.
^ Wange ju la HQP.
^ Maine, “hune la sinöe.”
