Hna Amaman 7:1-17
7 Thupene lai, hnenge hna goeëne la foa lao angela a cil ngöne la foa lao götrane ne la fen, angatr a isa cilaxome la foa lao enyi ka xulu qa ngöne la itre igötranene la fen, matre tha tro kö la ketre enyi a ufe la ihnadro, maine hnagejë, maine ketre sinöe pena.
2 Nge öhne ju hi ni la ketre angela kola elë qa ngöne la hna fetra hnei jö,* nge thei angeic la nyine pelehatren ne la Akötresie ka mel; nge angeic a hëne catrëne jë lo foa lao angela, itre hna aijijëne troa akötrëne la ihnadro me hnagejë,
3 me hape: “The pane akötrëne kö la ihnadro, me hnagejë, me itre sinöe, uti hë la eni a ase pelehatrene la itre göpadri ne la itre hlue ne la Akötresi së.”
4 Drenge ju hi ni la etrune la itre hna pelehatren, ala 144 000, itre hna pelehatren qa ngöne la nöjei lapa ne la itre nekö i Isaraela:
5 Qaathene la lapa i Iudra, ala 12 000 lao hna pelehatren;nge qaathene la lapa i Reubena, ala 12 000;nge qaathene la lapa i Gada, ala 12 000;
6 nge qaathene la lapa i Asera, ala 12 000;nge qaathene la lapa i Nafatali, ala 12 000;nge qaathene la lapa i Manase, ala 12 000;
7 nge qaathene la lapa i Simeona, ala 12 000;nge qaathene la lapa i Levi, ala 12 000;nge qaathene la lapa i Isakara, ala 12 000;
8 nge qaathene la lapa i Zebulona, ala 12 000;nge qaathene la lapa i Iosefa, ala 12 000;nge qaathene la lapa i Beniamina, ala 12 000 lao hna pelehatren.
9 Nge thupene lai, hnenge hna goeëne la ka ala nyimu atraqatr, lo hna thatreine e, nge angatr a isa xulu qa ngöne la nöjei nöj, me nöjei tribu, me nöjei hane ngönetrei, me nöjei qene hlapa. Angatr a cile qëmekene la theron me qëmekene la Neköi Mamoe, nge angatr a heetrë iheetre ka qea ka wië, me cilaxome la itre dröne pama.
10 Nge angatre pala hi a suene ka hape: “Mele ju kö hun jëne la Akötresi hun, atre lapane la theron, me jëne la Neköi Mamoe.”
11 Nge kola cile xötreithe la theron hnene la nöjei angela, me itre qatr, memine lo foa lao angela, ame hnei angatr hna ce sa iwatingöne ca qëmekene la theron, me nyihlue i Akötresie,
12 me hape: “Amen! Nge loi e tro la Akötresi së a kapa la iatruny, me lolo, me inamacan, me ole, me metrötr, me mus, me men, epin, epine palua. Amen.”
13 Ame hnene la ketre qatre hna hnyingë ni ka hape: “Drei la itre ka heetrë iheetre ka qea ka wië, nge angatr a xulu qaa kaa?”
14 Canga sa jë hi ni ka hape: “Joxu, atre kö nyipë.” Öni nyidrëti jë hi: “Angatr a xulu qa ngöne la akötr atraqatr, nge hnei angatr hna wasine la itre iheetre i angatr, me awiën ngöne la madra ne la Neköi Mamoe.
15 Celë hi kepin matre angatr a cil qëmekene la therone i Akötresie, nge angatr a kuca la huliwa ka hmitrötr e lai me jidr hnine la uma ne hmi i nyidrë; nge ame lo Atre lapane la theron, nyidrëti a hnëkë itat koi angatr matre thupë angatr.
16 Tha tro hmaca kö angatr a pi xen me pi ij, nge tha tro hmaca kö a cinajönyi angatr, nge goi tha tro fe angatr a drenge la idreuth,
17 ke tro la Neköi Mamoe, lo ka cil nyipine la theron a thupë angatr, me troxomi angatr kowe la itre qeqe ne timi ne mel. Nge tro kö Akötresie a köletrije la nöjei trenge timidra qa ngöne la itre luemeke i angatr.”
Itre mekun ecahu fen
^ Maine, “koië.”
