Ioane 1:1-51
1 Hetrenyi la Trengewekë ngöne la qaan, nge ce Akötresie memine la Trengewekë, nge ceitu* me Akötresie la Trengewekë.
2 Ce angeic me Akötresie ngöne la qaan.
3 Nge hnei Akötresieti hna aijijë angeic troa ce xupe me nyidrëti la nöjei ewekë asë, matre pëkö caa ewekë hna xup nge tha hna jëne angeic.
4 Hnei Akötresie hna jëne angeic matre hetrenyi jë la mel, nge ame la mel, tre lai ne la itre atr.
5 Nge kola hudrume la lai nyipine la jidr, ngo tha hune kö la jidr.
6 Ame hna traqa pi la ketre trahmanyi hna upe tune la ketre qeneqaja i Akötresie; Ioane la ëjen.
7 Traqa pi hi angeice troa anyipicin, ene la troa atre anyipicine la lai, matre tro la nöjei pengöne atr a mejiune jëne angeic.
8 Eje hi laka, tha angeice kö la lai, ngo angeice pe a anyipicin la lai cili.
9 Nge easenyi hë matre traqa pi kowe la fen la nyipi lai, atre thinane la nöjei pengöne atr asë.
10 Nyidrëti hë e celë fen, nge hna xupe la fen jëne nyidrë, ngo ame pe, thatre nyidrëti kö hnene la fen.
11 Haawe, traqa pi hi nyidrë kowe la sipu zi nyidrë, ngo tha hna kepe nyidrëti kö hnene la itre atrene la nöj.
12 Ngo ame pe, hnei nyidrëti hna aijijëne la itre ka kepe nyidrë troa itre nekö i Akötresie, ke hnei angatre hna amamane la lapaune i angatr kowe la ëje i nyidrë.
13 Nge tha hna hnaho angatre kö hnei madra me ijön, maine thenge la aja i kem, ngo hna hnaho angatre pe, thenge la aja i Akötresie.
14 Ame hna nyi atr* la Trengewekë me lapa nyipi së, ene pe, öhne hë së la lolo i nyidrë, ene la lolo hna hamëne kowe la Nekön ka cas hnei kem; nge tiqa ha nyidrë hnene la ihnimi gufa i Akötresie me nyipici.
15 (Nyipici hnei Ioane lo hna anyipici nyidrë, hnei angeic hna qaja catrëne ka hape: “Nyidrëti hi lo hnenge hna qaja ka hape, ‘Tro ha draië kö hung la atre traqa thupeng, ke pa i nyidrëti kö mel.’ ”)
16 Hne së hna kapa atrune qaathei nyidrë la ihnimi gufa, ke tiqa nyidrë hnei ihnimi gufa.
17 Nge pine laka, hna hamëne jëne Mose la Trenge Wathebo, tro ha eje la ihnimi gufa me nyipici jëne Keriso.
18 Ketre, pëkö ca atr ka hane öhnyi Akötresie qaane ekö, ngo hna qejepengöi Nyidrë hnene hmekuje hi la hna nekö hnimën, nge hnaiji* Akötresie, lo atre lapa ezine* la Kem.
19 Celë hi hna qaja hnei Ioane lo kola upe qaa Ierusalema la itre tane i angetre huuj me itretre Levi hnei angetre Iudra, matre hnyingë angeic ka hape: “Drei eö?”
20 Ame hnei angeic hna sa mekötin, me qaja amamane ka hape: “Tha Keriso kö ni.”
21 Angatr a hnyinge hmaca jë me hape: “Nga drei kö eö? Elia?” Öni angeice jë hi: “Waea.” Matre öni angatr: “Nga ketre perofeta hö eö?” Sa jë hi angeic ka hape: “Waea!”
22 Ame hnei angatr hna qaja koi angeice ka hape: “Nga drei kö eö? Pane qaja jë koi hun, matre atreine huni sa kowe la itre ka upi hun. Nge ame koi eö, ke drei eö?”
23 Sa jë hi angeic ka hape: “Eni hi la aqane ewekë ne la atre hë ngöne la hnapapa, kola hape: ‘Amekötine jë la jë i Iehova,* tune lo hna qaja ha hnei Isaia perofeta.”
24 Nge ame la itre xa hna upe koi Ioane, tre, itre xa Faresaio.
25 Matre hnyinge jë hi angatr koi angeic ka hape: “Nga hnauëne kö laka, eö a bapataisone la itre atr nge tha Keriso pe eö, maine Elia, maine ketre Perofeta hi?”
26 Sa jë hi Ioane ka hape: “Eni a bapataiso hnei tim. Ngo hetre ketre atr nyipi nyipunie, hnei nyipunieti hna thatre,
27 nge ka traqa thupeng. Ngo tha ijijinge kö troa senge la lue ibutre i nyidrë.”
28 Hna traqa la itre ewekë cili e Bethania, ngöne la götrane koië ne la hneopegejë Ioridrano, hmekune lo hnë bapataiso atr hnei Ioane.
29 Ame hë la drai thupen, hnei angeic hna öhnyi Iesu a kola traqa koi angeic. Matre öni angeic: “Hanawange la Neköi Mamoe i Akötresie, atre apatrene la ngazo ne la fen!
30 Nyidrëti hi lo hnenge hna qaja ka hape, ‘Tro ha draië kö hung la atre traqa thupeng, ke pa i nyidrëti kö mel.’
31 Nge goi thatre fe ni la atre cili, ngo ame la kepin matre bapataisone jë ni la atr ngöne la tim, tre matre troa atre nyidrë e Isaraela.”
32 Ioane a qaja hmaca jë ka hape: “Hnenge hna öhne la ua a kola uti qa hnengödrai kösë piny, nge ej e hui nyidrë.
33 Nge ngacama thatre kö ni la atre cili, ngo önine la Atre upi ni troa bapataiso hnei tim ka hape: ‘E öhne hë eö la uati a kola uti me lapa thene la ketre atr, nyëne hi la ka troa bapataiso hnei uati hmitrötr.’
34 Nge öhne hë ni lai, matre eni a anyipicine ka hape, nyidrëti hi la Nekö i Akötresie.”
35 Ame ngöne la drai thupen, traqa hmaca pi Ioane e cili memine la lue atre drei angeic.
36 Nge angeice pala hi a goeë Iesu e tro, öni angeice jë hi: “Hanawange la Neköi Mamoe i Akötresie!”
37 Matre ame hë la kola drenge lai hnene lo lue atre drei angeic, nyidroti a xötrethenge Iesu jë.
38 Ame hnei Iesu hna xei ju, me öhnyi nyidroti e ixötrethenge. Matre öni nyidrë: “Nemene la hnei epon hna thel?” Öni nyidro: “Rabi (e troa ujën, kola hape, “Atre Ini”) nyipëti a lapa ekaa?”
39 Öni nyidrëti koi nyidro: “Jë fe, matre öhne jë kö epon.” Ame hnei nyidroti hna tro ju me öhne la hnë lapa i nyidrë. Matre, nyidroti a ce lapa ju me nyidrë ngöne la drai cili, nge kolo hmekune la hnaatrenene hawa.*
40 Anederea hi, ene lo trejin me Simona Peteru, la ketre ne lo ala lu ka drenge lo hna qaja hnei Ioane, me xötrethenge Iesu.
41 Ame hnei angeice hna tro ju kowe la trejin me angeic, Simona, me hape: “Öhne hë nyio la Mesia” (e troa ujën, kola hape, “Keriso”),
42 matre, angeic a tro sai Simona ju koi Iesu. Nge ame hë la Iesu a öhnyi Simona, öni nyidrë: “Eö la Simona nekö i Ioane, tro ha hë eö ka hape, Kefa” (e troa ujën, kola hape, “Peteru”).
43 Ame hë la drai thupen, hnei Iesu hna mekune troa tro Galilaia, nge öhnyi Filipo ju hi nyidrë, matre öni nyidrë: “Xötrethenge ni jë.”
44 Ketre atre Bethesaida fe Filipo, tui Anederea me Peteru.
45 Ame hnei Filipo hna öhnyi Nathaniela me hape: “Öhne hë huni lo atre hna qaja hnine lo Trenge Wathebo i Mose, me hnine la itre hna cinyihan hnei itre perofeta, ene Iesu neköi Iosefa, atre Nazareta.”
46 Ngo öni Nathaniela jë hi ka hape: “Ke hetre atre ka loi fe ka troa xulu qa Nazareta?” Sa jë hi Filipo ka hape: “Jë fe, matre öhne jë kö eö.”
47 Nge ame hë la Iesu a öhnyi Nathaniela e traqa koi nyidrë, öni nyidrë: “Hane petre hi la ketre atre Isaraela ka pë thoi ngön!”
48 Nathaniela a hnyinge jë koi nyidrë ka hape: “Hnei nyipëti hna atre ni tune kaa?” Sa jë hi Iesu ka hape: “Qëmekene tro Filipo a hë eö, hnenge hë hna öhnyi eö fene iwacua.”*
49 Öni Nathaniela jë hi: “Rabi, nyipëti hi la Nekö i Akötresie, nge nyipëti hi la Joxu ne Isaraela.”
50 Matre Iesu a qaja ju koi angeic ka hape: “Mejiun hë eö ke hnenge hi hna qaja ka hape, öhnyi eö hë ni fene iwacua? Ngo tro kö eö a öhne la itre ewekë ka tru catre hmaca kö hune la.”
51 Öni nyidrëti hmaca jë hi: “Nyipici, eni a qaja hnyawa koi nyipunie, tro hë nyipunieti a öhne la kola fe la hnengödrai, nge itre angela i Akötresie a elë me uti kowe la Nekö i atr.”
Itre mekun ecahu fen
^ Maine, “ketre akötresie.”
^ Ger., “ijön.”
^ Ger., “la akötresie hna nekö hnimën.”
^ Maine, “hune imano i Kem.” Göhnë ka amamane la ecatrene la aqane imelekeu i nyidro.
^ Wange ju la HQP.
^ Kola easenyine la 4:00 e hnaipajö.
^ Maine, “ihmejieng.”
