Ioane 10:1-42
10 “Nyipici eni a qaja hnyawa koi nyipunie, ame la atre tha lö qa ngöne la qëhnelö ne la hnë axö mamoe, nge ka eli hag, atrekënö angeic.
2 Ngo ame la atre lö qa ngöne la qëhnelö, tre atre thupë mamoe lai.
3 Nge kola thawa koi angeic hnene la atre fe qëhnelö, nge itre mamoe a drenge la nine ithanata i angeic. Matre angeic a hë nyudren hnene la isa ëje i nyudren, me troxomi nyudreni tröne la hnë axö mamoe.
4 Nge e lö pi la itre si angeic, angeic a weje mekei nyudreni jë, nge itre mamoe a xötrethenge angeic, ke wangatrehmekune hi nyudreni la nine ithanata i angeic.
5 Ngo eje hi laka, tha tro jë pi kö nyudreni a xötrethenge la trenyiwa, ngo tro pe a kötren, ke tha wangatrehmekune kö nyudreni la nine ithanata ne la trenyiwa.”
6 Iesu a hamëne pi la ceitune celë koi angetre Iudra, ngo tha trotrohnine kö angatre la alien.
7 Qaja hmaca jë hi Iesu ka hape: “Nyipici, eni a qaja hnyawa koi nyipunie, eni hi la qëhnelö ne la itre mamoe.”
8 Nge ame la itre ka traqa troa xome la hnëqang, tre itre atrekënö lai, ngo tha drei angatre kö hnei itre mamoe.
9 Haawe, eni hi la qëhnelö, matre ame la atre lö qaatheng, tre tro hë angeic a mel, nge tro angeic a traqa me tro, me öhnyi xen.
10 Ngo ame la atrekënö, angeic a traqa troa atrekënö, me humuth me thëtrij. Ngo eni pe a traqa troa iamele, me hamëne la mel ka epine palua.
11 Nge eni la atre thup ka lolo; nge ame la atre thup ka lolo, angeic a nue la mele* i angeic thatraqane la itre mamoe.
12 Ngo ame la atre huliwa kowe la atre thupë mamoe, tha atre thupë mamoe kö lai, nge tha itre si angeice pena kö. Matre ame hë la angeic a öhne la luko a traqa, angeic a kötre me nuaxöje la itre mamoe, ame hna meci pi itre xan, me kötre ije la munën—
13 Tha akötrehnine kö angeice la itre mamoe, ke angeice hi a huliwa göi mani.
14 Ngo eni hi la atre thup ka lolo. Haawe, atre kö ni la itre mamoeng, nge itre mamoeng a atrepengö ni,
15 tune la aqane atre ni hnei Kaka, ketre atrepengöi Kakati ni. Nge eni a nue la meleng* thatraqane la itre mamoe.
16 “Nge hetre itre xa mamoenge kö, ngo tha sine kö nyudreni la hnë axö mamoe celë; ngo loi e tro fe ni a alö nyudren, nge tro nyudreni a drenge la aqane ewekëng, nge tro hë nyudren a ca hna axö mamoe, nge tro hi a ca atre thup.
17 Nge hane hi la kepin matre hnimi ni jë hnei Kaka, ke tro ni a nue la meleng,* nge tro hmaca kö ni a kapa.
18 Nge tha tro kö ketre a thapa qaathenge la meleng, ngo eni kö la ka nue ej. Matre, qanyinge kö hamën, nge ketre, qanyinge kö kapa hmaca. Ke qaathei Kaka la hna amekötine celë.”
19 Ame hna mejë jë la icilekeu thene la angetre Iudra, pine la itre trengewekë i nyidrë.
20 Matre ala nyimu la itre ka qaja ka hape: “Hna löthi angeice la hnei dremoni, nge ka menu hë lai. Matre hnauëne la epuni a drei angeic?”
21 Ngo öni itre xane jë hi: “Tha itre trengewekë ne atre hna adremonine kö la, ke thatreine kö la dremoni troa fe la luemeke ne la timek, eje hi?”
22 Ame la drai cili, tre kolo hmekune lo Feet Ne Xötrei Löth* e Ierusalema. Nge kola hnötre la ijine cili.
23 Matre Iesu a nango tro hnine la uma ne hmi, fene lo itre ikapa i Solomona.
24 Ame hnene la angetre Iudra hna cile xötreithi nyidrë me hape: “[Eue] la tro eö a qaja la nyipici göi eö [maine, “Eö kö la Keriso maine waea”]?”
25 Sa jë hi Iesu ka hape: “Ase hë ni qaja koi nyipunie, ngo tha mejiune kö nyipunie. Ngo ame la itre huliwa hnenge hna kuca ngöne la ëje i Kaka, celë hi ka anyipici ni.
26 Ngo tha kapa kö nyipunie, ke tha itre mamoenge kö nyipunie.
27 Ke ame la itre mamoeng, nyudreni a drenge la nine ithanatang, nge atre nyudreni kö ni, nge nyudreni a xötrethenge ni.
28 Matre tro ni a hamë nyudreni la mele ka pë pun, nge tha tro jë kö a lepe apatrenyi nyudren, nge pëkö atr ka troa thapa la itre mamoeng qa ngöne la imeng.
29 Ke ame la ewekë hna hamë ni hnei Kaka, tre sisitria catre kö hune la nöjei ewekë asë. Matre, pëkö ka atreine troa thapa la itre mamoeng qa ngöne la ime i Kaka.
30 Ke casi hi ni me Kaka.”
31 Ame hnene hmaca la itretre Iudra hna hleme la itre etë troa tranyi nyidrë.
32 Qaja jë hi Iesu ka hape: “Hnenge hna qaja amamane koi nyipunie la itre huliwa ka lolo i Kaka, nga hnei nemene huliwa kö matre nyipunieti a thele troa tranyi ni?”
33 Sa jë hi la angetre Iudra ka hape: “Eahuni a tranyi eö, ke tha hnei huliwa ka loi kö, ngo pine eö silitrengathoi Akötresie. Ke ketre atr hi eö, ngo eö a pi nyi akötresie.”
34 Ngo sa jë hi Iesu ka hape: “Hapeu, tha hna hane kö cinyihan hnine la Trenge Wathebo i nyipunie ka hape: ‘Öning: “Itre akötresie* nyipunie” ’?
35 Haawe, maine Akötresie a hëne la itre hnei nyidrëti hna jelengazone ka hape, ‘itre akötresie,’ pëkö atr ka atreine troa saze la hna Cinyihan.
36 Ngo eni hi lo atr, ene la atr hnei Akötresie hna ahmitrötrën me upe kowe la fen, matre hnauëne la nyipunie a qeje ni ka hape, ‘Eö a silitrengathoi Akötresie,’ ke öning, ‘Eni la Nekö i Akötresie’?
37 Ngo maine tha kuca kö ni la huliwa i Kaka, the mejiune kö koi ni.
38 Ngo maine eni hi a kuca la itre huliwa i nyidrë, nge tha mejiune pala kö nyipunie koi ni, nga mejiune jë kowe la itre huliwa hna kuca. Matre tro nyipunie a atre me trotrohnine laka, ce Kaka me eni, nge ce eni me Kaka.”
39 Ame hnei angatr hna thele troa xolouthi nyidrë, ngo hnei nyidrëti hna kötr.
40 Haawe, nyidrëti a ea pi kowe la ketre götrane la hneopegejë Ioridrano, hmekune lo pane götrane hnei Ioane hna bapataiso atr, me pane lapa e cili.
41 Matre ala nyimu la itre atr ka tro koi nyidrë me iqajakeune ka hape: “Tha hane kö Ioane kuci iamamanyikeu, ngo ka nyipici asë hi la nöjei ewekë hnei Ioane hna qaja göne la atre celë.”
42 Qa ngöne lai, ala nyimu catre la itre ka lapaune koi nyidrëti e cili.
Itre mekun ecahu fen
^ Maine, “u.” Ger., psy·kheʹ. Wange ju la HQP.
^ Maine, “u.” Ger., psy·kheʹ. Wange ju la HQP.
^ Maine, “u.” Ger., psy·kheʹ. Wange ju la HQP.
^ Maine, ‘feet ne xötrei löthe la uma ne hmi.’ Wange ju la HQP.
^ Maine, “ka tui akötresie.”
