Ioane 11:1-57
11 Nge ngöne la ijine cili, hna traqa la meci kowe la ketre thupëtresij, Lazaro la ëjen, nge atre Bethania, lo zi Maria me Maretha jini angeic.
2 Kolo Maria ka nei oele ka pui lolo kowe la Joxu, me köle la lue waca i nyidrë hnene la ipene he i angeic. Nge trejine me angeic lae Lazaro, lo ka wezipo.
3 Ame hnene la lue xa i Lazaro hna iupi fë maca koi Iesu me hape: “Hanawang Joxu, wezipo hë lo atr hnei nyipëti hna hnim.”
4 Ngo ame la Iesu a drenge lai, öni nyidrë: “Tha hna tithi angeice kö hnei mec matre mec, ngo jëne lai, troa atrunyi Akötresie, nge tro fe hë a atrune la Nekö i Atr.”
5 Nge tru la ihnimi Iesu koi Maretha, me kowe la jini angeic, me koi Lazaro.
6 Ngo ame hë la nyidrëti a drenge laka, wezipo hë Lazaro, nyidrëti a pane lapa hmaca ju e cili koi lue drai.
7 Thupene lai, öni nyidrë kowe la itretre dreng: “Jë fe matre bëeke jë së kowe la nöj e Iudra.”
8 Önine jë hi la itretre dreng ka hape: “Rabi, eue hi lo, hnei angetre Iudra hna thele troa tranyi nyipë, ngo nyipëti hmaca kö a pi bëeke koi angatr?”
9 Sa jë hi Iesu ka hape: “Hetre 12 lao hawa ngöne la drai, eje hi? Nge maine tro ketre a tro e lai, tha tro kö angeic a kei hnene la ketre ewekë, ke angeic a goeëne la lai ne la fen.
10 Ngo maine tro ketre a tro e jidr, tro hë angeic a kei, ke patre kö la lai thei angeic.”
11 Thupene la nyidrëti a ase qaja la itre ewekë cili, öni nyidrë: “Lazaro lo sinee së a meköl, nge eni hë la a tro troa ahlë angeic.”
12 Önine jë hi la itretre dreng ka hape: “Joxu, maine angeic a meköl, tro angeice lai a loi hmaca.”
13 Ngo Iesu pe a qaja ka hape, meci hë Lazaro. Ngo öni angatre pena kö ka hape, angeice hi a meköl.
14 Ame hnei Iesu hna qaja hnyawa koi angatre ka hape: “Meci hë Lazaro.
15 Ngo hnei nyipunie matre eni a madrine laka, patre kö ni e cili, matre tro hë nyipunie a mejiun. Ngo treilo pe matre tro së koi angeic.”
16 Ame hnei Toma, lo hna hëne ka hape, Fini, hna qaja kowe la itre xa atre dreng ka hape: “Haawe, easë a tro, matre ce meci pi së me nyidrë.”
17 Matre, ame hë la kola traqa hnei Iesu, foa hë lao drai ne lapa Lazaro hnine la hua.*
18 Nge tha nanyi kö Bethania qaa Ierusalema, ma köni kilomet* la enanyin.
19 Nge ala nyimu la itretre Iudra ka fetra koi Maretha me Maria, matre aupunyi nyidro pine la mec i Lazaro.
20 Ngo ame hë la Maretha a drenge laka, easenyi hë Iesu, angeic a mejë jë troa itronyi me nyidrë; ngo lapa ju pe hi Maria e hnine la uma.
21 Öni Maretha jë hi koi nyidrë: “Joxu, maine nyipëti ju e celë, tha tro kö a meci la neköi jining.
22 Ke atre hi ni laka, ame asë hi la nöjei ewekë hnei nyipëti hna sipone koi Akötresie, tro kö nyidrëti a hamë nyipë.”
23 Öni Iesu jë hi ka hape: “Tro la jini eö a mele hmaca.”
24 Öni Maretha: “Atre hi ni laka, tro angeic a mele hmaca ngöne la itre drai tixenuë elany.”
25 Öni Iesu hmaca jë hi: “Eni la mele hmaca me mel. Matre ame la atre amamane la lapaune i angeic koi ni, ngacama tro ju hë angeic a mec, ngo tro hmaca kö angeic a mel;
26 nge ame la nöjei atr ka mel, nge ka amamane la lapaune i angatre koi ni, tha tro kö angatre lai a hane mec. Mejiune fe kö eö?”
27 Matre sa jë hi angeic koi nyidrë ka hape: “Eje hi Joxu, ka mejiune ni laka, nyipëti hi la Keriso, Nekö i Akötresie, nge atre traqa kowe la fen.”
28 Ase jë hi angeice qaja lai, angeic a tro pi koi Maria, jini angeic, me hën aconyi angeic me hape: “Joxu hë la, nyidrëti a hë eö.”
29 Matre, ame hë la Maria a drenge lai, canga mejë jë hi angeic troa wai nyidrë.
30 Tha Iesu pala kö e hnine la hunahmi, ngo nyidrëti pala kö ngöne lo götran hnei Maretha hna öhnyi nyidrë.
31 Matre ame hë la kola öhnyi Maria e canga mejë, hnene la angetre Iudra ka aupunyi angeic hnine la uma hna xötrethenge angeic, ke angatr a mekune ka hape, angeic a tro troa treij ngöne la hua.*
32 Matre ame hë la Maria a traqa me öhnyi nyidrë, angeic a kei ju ngöne la lue ca i nyidrë me hape: “Joxu, maine nyipëti ju e celë, tha tro kö a meci la jining.”
33 Nge ame la Iesu a öhnyi angeic memine la angetre Iudra e treij, hleuhleu pi fe hi la hni* i nyidrë.
34 Öni nyidrëti jë hi: “Hnei nyipunieti hna ami angeic ekaa?” Sa jë hi angatr ka hape: “Joxu, trohemi ma wang.”
35 Ame hnei Iesu hna treij.
36 Nge itretre Iudra a nyiqaane qaja ka hape: “Goeën! Tru la hna hnimi Lazaro hnei nyidrë!”
37 Matre önine la itre xan thei angatre ka hape: “Hnei nyidrëti hna fe lo alameke ne la timek, matre maine ju, tro fe hi nyidrë a kuca la ketre ewekë matre tha tro kö Lazaro a mec?”
38 Nge thupene la hna hace la hni Iesu, nyidrëti a tro pi kowe la hua.* Ngo tha hua kö, ngo ngönemenyi hi hna thinge hnei etë.
39 Öni Iesu jë hi: “Ukune pi lai ietë.” Ngo öni Maretha, xa ne lai ka mec ka hape: “Joxu ma punepune hë angeic, ke foa ha lao drai la.”
40 Matre, Iesu a qaja ju koi angeic ka hape: “Tha hnenge kö lo hna qaja koi eö ka hape, maine tro eö a mejiun, tro hë eö a öhne la lolo i Akötresie?”
41 Ame hnei angatre hna hule pi la ietë, nge Iesu a gala jë draië me hape: “Kakati fe, oleti la hnei nyipëti pala hi hna drei ni.
42 Nyipici, nyipëti pala hi a drei ni; ngo eni a ithanata tun pine la itre atr ka icileny, matre tro fe angatr a hane atre laka, nyipëti la atre upi ni.”
43 Nge ase jë hi nyidrëti qaja lai, nyidrëti a suene jë ka hape: “Lazaro, lö pi!”
44 Ame hna lö pi hnene la atre ka mec, nge hna othe la lue im me lue ca i angeic hnene la itre sine maano, nge hna atuthe la he i angeic hnei iheetr. Öni Iesu jë hi: “Sei angeice pi, matre atreine angeice tro.”
45 Ame thene lo angetre Iudra ka traqa troa wai Maria, nge ka öhne lo hnei nyidrëti hna kuca, ala nyimu la angetre lapaune koi nyidrë.
46 Ngo hnei itre xane pena hna tro kowe la itre Faresaio, me qajaqaja la hnei Iesu hna kuca.
47 Ame hnene la itre tane i angetre huuj me itre Faresaio hna icasinekeune la Hnakootr Ka Tru i Angetre Iudra, me hape: “Nemene la nyine tro sa kuca, ke nyimu iamamanyikeu hna kuca hnene la atre ce?
48 Ke maine pëkö hne së hna kuca, tro hë la itre atr asë a lapaune koi angeic, nge tro la itretre Roma a traqa me thapa la itre ewekë* së, me nöje së.”
49 Ngo önine la ketre e angatr, Kaiafa la ëjen, ene lo hna acil troa atre huuje ka sisitria la macatre cili ka hape: “Pëkö ca hnei nyipunieti hna atre,
50 nge goi tha trotrohnine fe nyipunie laka, nyine loi koi nyipunie e troa mec hnene la ala cas thatraqane la nöj, hune la troa apatrene la nöj asë.”
51 Ngo tha qaathei angeice kö la mekune cili, ngo pine laka atre huuje ka sisitria angeic la macatre cili, hnei angeic hna perofetane laka, tro Iesu a meci pine la nöje i nyidrë.
52 Ngo tha ene hmekuje kö la nöje celë, ngo matre tro fe a acasine la nöjei nekö i Akötresie ka isa ije.
53 Matre qaane ju hi lai, angatr a thele jëne jë troa humuthi nyidrë.
54 Ketre, tha hnei Iesu hmaca kö hna tro amamanyi nyipine la itretre Iudra, matre nyidrëti a feke pi a tro Eferaima, ketre traon ka easenyi kowe la hnapapa. Nyidrëti a pane lapa ju e cili memine la itretre dreng.
55 Nge easenyi hë tro la angetre Iudra a feetëne la Paseka, matre qëmekene lai, ala nyimu la itre atr ka tro qa ngöne la nöjei götrane la nöj troa lö e Ierusalema. Angatr a canga traqa matre ahmitrötrë angatr, thenge lo hna majemine kuca göi troa iahmitrötrë.
56 Angatr a nyiqaane thele Iesu ju, me ihnyingënekeune hnine la uma ne hmi ka hape: “Nemene la mekuna i nyipunie, tro jë kö angeice lai a traqa kowe la feet?”
57 Ngo hnene la itre tane i angetre huuj me itre Faresaio hna amekötine laka, maine tro la ketre a öhnyi Iesu, tro angeic a qajaqaja koi angatr, matre troa xolouthi nyidrë.
Itre mekun ecahu fen
^ Maine, “hua nyine amekunën.”
^ Ger., “kösë 15 lao stad.” Wange ju la HQP.
^ Maine, “hua nyine amekunën.”
^ Ger., “ngöne la mekun.”
^ Maine, “hua nyine amekunën.”
^ Ene la uma ne hmi.
