Ioane 12:1-50
12 Ame ngöne la hnaasikisine drai qëmekene la Paseka, traqa pi hi Iesu e Bethania ngöne lo götrane hnei nyidrëti hna amele Lazaro, nge Lazaro fe hi e cili.
2 Hnei angatre pë hë hna hnëkë xeni koi nyidrë, ame hna tro fë a i nyidrë hnei Maretha, nge Lazaro fe hi la ketre ka hane ce xeni me nyidrë.
3 Nge Maria a xome pi la butei oel* ka pui lolo nyipi narado* ka tru thupene catr, me neng me köle kowe la lue ca i Iesu hnene la ipene he i angeic. Ame hna pui lolo asë la uma.
4 Ngo öni Iudra Isakariota, ketre atre dreng, nge ka troa salemë Iesu e thupen ka hape:
5 “Hnauëne laka, tha salemëne kö la oele celë koi 300 lao drenari,* matre thue maniene la itre ka pë ewekë?”
6 Angeic a qaja tun, ke tha angeice kö a meku itre ka pë ewekë, ngo atrekënö angeic. Ketre, thei angeic la trengene mani matre, majemine hë angeic atrekënö.
7 Öni Iesu jë hi: “Nue eahlo pi, ke eahlo a kuca lo hna majemin qëmekene troa kelemi ni.
8 Ke ce nyipunieti pala hi me itre ka pë ewekë, ngo ame ni, tha tro kö ni a lapa palua me nyipunie.”
9 Nge atre ju hi hnene la ka ala nyimu qaa Iudra ka hape, nyidrëti hë e cili. Ame hnei angatr hna traqa pi, tha göi troa wai Iesu hmekuj, ngo göi tro fe a hane wai Lazaro, lo atr hna amelene hmaca.
10 Haawe, hnene la itre tane i angetre huuj hna thele jëne troa humuthi Lazaro,
11 ke pi angeic, matre ala nyimu la itretre Iudra ka traqa ngöne la götrane cili, me lapaune koi Iesu.
12 Ngöne la drai thupen, hna drei mejen hnene la ka ala nyimu ka traqa troa feetëne la Paseka ka hape, Iesu a traqa e Ierusalema.
13 Ame hnei angatre hna sa la itre ipicine pama, me tro koi Iesu me suene ka hape: “Epi amele huni jë! Manathithi la atre traqa ngöne la ëje i Iehova,* Joxu ne Isaraela!”
14 Thupene lai, öhne ju hi Iesu e cili la neköi boliko matre nyidrëti a tithe ju tune lo hna cinyihane ka hape:
15 “The xou kö nekö jajinyi ne Ziona. Ke hanawang! Traqa ha la joxu i eö hune la neköi boliko.”
16 Matre ame lo xötrei, tha trotrohnine kö la itretre dreng la itre ewekë cili, ngo ame hë lo kola atrunyi Iesu, canga mekune jë hi angatr lo itre hna cinyihan göi nyidrë, me itre ewekë hna kuca koi nyidrë.
17 Nge hnene lo itre atr ka öhnyi Iesu e hë Lazaro qa hnine la hua* me amele angeice hmaca, hna catre ithanatane lo ewekë ka traqa.
18 Qa ngöne lai, ala nyimu la itre atr ka tro koi Iesu, ke hnei angatr hna drei mejen la iamamanyikeu cili hna kuca hnei nyidrë.
19 Hnene pë hë la itre Faresaio hna iqajakeune ka hape: “Öhne fe hi epun? Goi pë fe thangane la hne së hna kuca. Ke hanawang! Kola xötrethenge angeic hnene la fen asë.”
20 E cili, hetrenyi fe la itre xa angetre Geres thene lo itre ka traqa troa hmi ngöne lo ijine feet.
21 Angatr a easenyi Filipo ju lo atre Bethesaida ne Galilaia, me sipo angeic ka hape: “Joxu, eahuni a pi iöhnyi me Iesu.”
22 Filipo a qaja ju koi Anederea. Nge Anederea me Filipo a tro ju me qaja koi Iesu.
23 Ngo sa jë hi Iesu ka hape: “Hawa ha ne troa atrune la Nekö i Atr.
24 Nyipici, eni a qaja koi nyipunie ka hape, e tha pane meci kö me mala e kuhu hnadro la wene qitr, tro hi lai a ca wen ka lapa. Ngo maine tro ej a mec, tro hë eje lai a hamën atrun.
25 Nge ame la atr hnim la mele i angeice kö, tre, tro ha luz, ngo ame pena la atr methinëne la mele* i angeic ngöne la fene celë, angeice hi lai a thupën ej thatraqane la mele ka pë pun.
26 Nge maine tro la ketre a hane pi nyihlueng, loi e tro angeic a xötrethenge ni, nge ame la nöjei jëng, tre, jë i angeice fe. Ketre, ame la atre pi nyihlueng, tro ha nyipi angeic hnei Kaka.
27 Ngo enehila, hace catre la hning,* matre tro ni a qeje nemen? Kakati fe, epi amele ni jë qa ngöne la hawa ce, ngo eje hi laka, kepine hi lai matre traqa pi ni kowe la hawa celë.
28 Matre Kaka, epi tro pe a ahmitrötrëne la ëje i nyipë.” Ame hna mexeme pi la aqane ewekë qaa hnengödrai kola hape: “Ase hë ni ahmitrötrën ej, nge tro pala kö ni a ahmitrötrën.”
29 Hna drei mejene lai hnene la ka ala nyimu matre angatr a mekune ka hape, kola hedreng. Nge öni itre xan: “Angela a ithanata koi angeic.”
30 Sa jë hi Iesu ka hape: “Tha pi ni kö la kola ewekë, ngo pi nyipunie.
31 Traqa ha enehila la iameköti kowe la fen celë, nge enehila fe la ijine troa helëne trij la atre musinëne la fen.
32 Ngo ame ni, maine troa xomi ni qaa la fen, tro ni a ea koi ni la nöjei pengöne atr.”
33 Nyidrëti a qaja tune lai matre mama pi la aqane tro nyidrëti a mec.
34 Ngo sa jë hi la ka ala nyimu ka hape: “Hne huni lo hna dreng ngöne la Trenge Wathebo ka hape, tro la Keriso a mele epine palua. Nga hnauëne la eö a qaja ka hape, troa xome la Nekö i Atr? Nge drei la Nekö i Atr?”
35 Öni Iesu jë hi: “Tro pala kö la lai a lapa thei nyipunie. Matre, tro jë e lai petre kö, wanga musi jë la jidr koi nyipunie; ke ame la atre tro e jidr, thatre kö angeic la hnei angeic hna tro kow.
36 Haawe, e thei nyipunie petre kö la lai, amamane jë la lapaune i nyipunie kowe la lai, matre tro fe nyipunie a itre nekö ne la lai.”
Nge ase jë hi Iesu qaja la itre ewekë cili, nyidrëti a tro pi me zae angatr.
37 Ke ngacama nyimutre la itre iamamanyikeu hnei nyidrëti hna kuca koi angatr, ngo tha lapaune kö angatr koi nyidrë.
38 Ngo celë hi matre eatre pi lo trenge ewekë i Isaia perofeta, kola hape: “Iehova* fe, drei la atre lapaune kowe la itre ewekë hne huni hna qaja? Nge hna amamane koi drei la ime ka catre i Iehova?”
39 Nge hnei Isaia fe hna qaja la kepin matre tha mejiune kö angatr, kola hape:
40 “Hnenge hna atimekë angatr, me axetine la itre hni angatr. Nge hnenge hna kuca tun, matre tha tro kö angatr a öhn hnei luemek, me trotrohnine qa kuhu hni la nyine kuca, me ujë, wanga aloinyi angatre jë ni.”
41 Hnei Isaia hna qaja lai göi Keriso, ke ase hë angeice öhne la lolo i nyidrë.
42 Ketre tune mina fe, ala nyimu la itre he ne nöj ka lapaune koi nyidrë, ngo xou i angatre troa qaja amamane pi itre Faresaio, wanga helë angatre pi qa ngöne la sunago.
43 Ke ka tru catre kö koi angatr la iatrunyi qaathei atr, hune la troa kepe angatr hnei Akötresie.
44 Ngo ame pe, hnei Iesu hna qaja catrëne ka hape: “Ame la atre lapaune koi ni, tre tha angeice hmekuje kö a lapaune koi ni, ngo kolo fe a lapaune kowe la Atre upi ni.
45 Nge ame la atre öhnyi ni, angeice fe hi a öhne la Atre upi ni.
46 Hnenge hna traqa kowe la fen ceitu me lai, matre ame asë hi la itre ka lapaune koi ni, tha tro hmaca kö angatr a lapa ngöne la jidr.
47 Ngo ame la atre drenge la itre trengewekëng ngo tha trongëne pe, tha tro kö ni a ameköti angeic, ke tha traqa kö ni kowe la fen troa iameköti, ngo tro pe a iamele.
48 Ngo eje hi laka, ame la atre xele ni, me xelene la itre trengewekëng, hetre ka troa ameköti angeic. Ke ame la trengewekëng enehila, tre celë hi atre ameköti angeic elany ngöne la itre drai tixenuë.
49 Ke tha sipu mekunange kö la hnenge hna qaja, ngo hnei Kaka, Atre upi ni hna amekötine la nyine tro ni a qaja, me aqane tro ni a qaja.
50 Nge atre hnyawa hi ni laka, jëne mele ka pë pun la hna amekötine celë. Matre ame asë hi la hnenge hna qaja, tre eni a qaja thenge la hna ini ni hnei Kaka.”
Itre mekun ecahu fen
^ Kola easenyine la 327 g ne oel.
^ Iengene ka pui lolo.
^ Wange ju la HQP.
^ Wange ju la HQP.
^ Maine, “hua nyine amekunën.”
^ Maine, “u.” Ger., psy·kheʹ. Wange ju la HQP.
^ Maine, “u.” Ger., psy·kheʹ. Wange ju la HQP.
^ Wange ju la HQP.
