Ioane 13:1-38
13 Nyipici hnei Iesu hna hnime la itre atre i nyidrë e celë fen, nge pine laka, xecie hë koi nyidrë qëmekene la Paseka ka hape, hawa ne tro hë nyidrë a nue la fen me elë koi Keme i nyidrë, nyidrëti a hnimi angatre ju uti hë la pun.
2 Kola ha feetëne la Paseka, nge ase hë Diabolo amë e kuhu hni Iudra Isakariota, nekö i Simona, la mekune troa salemë Iesu.
3 Ngo atre hi Iesu ka hape, hnei Keme i nyidrë hna amë la nöjei ewekë ngöne la lue ihnatrapaime i nyidrë, nge hna upi nyidrë hnei Akötresie, matre nyidrëti a bëeke hmaca koi Akötresie.
4 Matre ame hi la angatr a ce xen, nyidrëti a mejë jë me una la iheetre ka qea i nyidrë. Nge nyidrëti a xome pi la ketre itrawel, me sili gön.
5 Thupene lai, nyidrëti a nyialiene ju la ketre baketr hnei tim, me wasine la lue waca ne la itretre dreng, me köle memine lo trawel hnei nyidrëti hna sili gön.
6 Nge ame hë la nyidrëti a traqa koi Simona Peteru, öni angeic: “Joxu, nyipëti a troa köle la lue cang?”
7 Sa jë hi Iesu ka hape: “Tha trotrohnine kö eö la hnenge hna kuca enehila, ngo tro pë hë eö a trotrohnin e thupen.”
8 Öni Peteru jë hi: “Pëkö tro nyipëti a hane köle la lue cang.” Sa jë hi Iesu ka hape: “Maine tha tro kö ni a köle la lue ca i eö, tha ijiji eö kö troa ce me eni.”
9 Öni Simona Peteru: “Nga joxu, the köle hmekuje kö la lue cang, ngo memine fe la lue iwanakoimeng, me heng.”
10 Öni Iesu: “Ame la atre ka ase si, tro hi a köle la lue ca i angeic, ke ka porope hë lai. Nge ame nyipunie, wië fe hë nyipunie, ngo tha nyipunieti asë kö.”
11 Atre hë nyidrëti la ëje ne la ka troa salemë nyidrë. Celë hi matre, qaja jë nyidrë ka hape: “Tha nyipunieti asë kö la ka wië.”
12 Thupene la nyidrëti a ase köle la lue ca i angatr, me line hmaca la iheetre ka qea i nyidrë, nyidrëti a elë hmaca jë troa ce xeni me angatr me hape: “Trotrohnine kö nyipunieti la hnenge hna kuca koi nyipunie?
13 Nyipunie a hë ni ka hape, ‘Atre Ini’ me ‘Joxu,’ nge nyipici nyipunieti hi, ke eni hi lai.
14 Haawe, maine tro la Joxu me Atre Ini a köle la lue ca i nyipunie, qa* i nyipunieti fe troa hane köle la lue ca i ketre me ketre.
15 Nge eni hi lai a amamai tulu koi nyipunie, matre ame la hnenge hna kuca koi nyipunie, hane jë fe kuca tun.
16 Nyipici, eni a qaja hnyawa koi nyipunie, tha ka tru kö la hlue hune la maseta, nge tune fe kowe la atre hna up, tha ka tru kö angeic hune la atre iup.
17 Matre, maine atre hë nyipunieti lai, tro hë nyipunie a madrin e tro nyipunie a kuca.
18 Tha eni kö a qeje nyipunieti asë; ke atre kö ni la itre hnenge hna iën. Ngo nyipiewekë troa eatre lo hna cinyihan ka hape: ‘Hnene la atre xeni la falawang hna xejë la tidöca i angeice koi ni.’*
19 Ngo eni a canga thuemacanyi nyipunie qëmekene troa traqa la itre ewekë cili, matre e traqa jë eatre koi ni la itre ewekë cili, tro hë nyipunieti a mejiune laka, kolo hi a qeje ni hnene lai hna cinyihan.
20 Nyipici, eni a qaja hnyawa koi nyipunie, ame la atre kapa la hnenge hna up, tre, kolo fe hi a hane kepe ni, nge ame la atre kepe ni, tre, kolo fe hi lai a kapa la Atre upi ni.”
21 Ase jë hi Iesu qaja la itre ewekë cili, hace pi hi la hni i nyidrë, matre nyidrëti a qaja ju ka hape: “Nyipici, eni a qaja hnyawa koi nyipunie, tro la ketre e nyipunie a salemë ni.”
22 Ame hnene la itretre dreng hna nyiqaane igoeë me isa hnyingëne thel ka hape, drei jë la hna qaja.
23 Nge hnene la ketre atre dreng, ene lo hnei Iesu hna hnim, hna saathe aqeanyi ezi* nyidrë.
24 Nge Simona Peteru a halea angeice jë me hape: “Hane jë qaja koi huni ka hape, nyidrëti a qeje drei?”
25 Angeic a qalëne ju la imano i Iesu me hape: “Joxu, drei lai?”
26 Sa jë hi Iesu ka hape: “Ene la atr hnenge hna troa hamëne kow la falawa hna trapin.” Matre thupene la nyidrëti a ase trapine la falawa, nyidrëti a xome pi me hamë Iudra, nekö i Simona Isakariota.
27 Haawe, ase jë hi Iudra xome la falawa, löthi angeice ju hi hnei Satana. Matre öni Iesu koi angeic: “Canga kuca jë la hnei eö hna troa kuca.”
28 Ngo ame thene lo itre ka saathe aqeany, pëkö ka hane trotrohnine la kepin matre qaja jë nyidrëti tune lai.
29 Itre xan a mekune ka hape, pine laka Iudra la ka lapa xome la trengene mani, ma kolo jë a upi angeic hnei Iesu ka hape: “Tro jë troa itöne la ka nyipiewekë thatraqane la feet,” maine troa hamëne la ketre ewekë koi itre ka pë ewekë.
30 Haawe, thupene ju hi la angeic a kapa la sine falawa, angeic a canga tro ju, nge heji lapa ha.
31 Matre ame ju hi la angeic a tro, öni Iesu: “Enehila kola atrune la Nekö i Atr, nge jëne angeic, kolo fe hi a atrunyi Akötresie.
32 Nge tro Akötresie a atrune la Nekö i Atr, nge tro Akötresieti a canga atrunyi angeic.
33 Matre, itre nekö hnimina fe, tha qea pe kö la ijine tro ni a ce me nyipunie; nge tro nyipunieti a thele ni, ngo tune lo hnenge hna qaja ha koi angetre Iudra, eni fe a qaja koi nyipunie, ‘Tha ijiji nyipunieti kö troa tro kowe la götran hnenge hna tro kow.’
34 Haawe, eni a hamë nyipunie la ketre wathebo ka hnyipixe, qa i nyipunie troa hnimi ketre me ketre; tune la aqane hnimi nyipunieti ni, qa i nyipunie troa ihnimikeu.
35 Qa ngöne lai, tro la nöjei atr asë a wangatrehmekune laka, nyipunieti la itretre drei ni, e tro nyipunie a ihnimikeu.”
36 Öni Simona Peteru jë hi: “Joxu, nyipëti a tro ië?” Sa jë hi Iesu ka hape: “Enehila, tha ijiji eö kö troa xötrethenge ni kowe la hnenge hna tro kow, ngo epine hë, tro hë eö a xötrethenge ni.”
37 Öni Peteru hmaca jë hi: “Joxu, hnauëne laka tha ijijinge kö enehila troa xötrethenge nyipë? Ke pi tro fe ni a meci* pi nyipë.”
38 Sa jë hi Iesu ka hape: “Pi tro eö a meci* pi ni? Eni a qaja hnyawa koi eö, tha tro kö a kukahleke la trotro, e tha pane akönia qaja kö eö ka hape, thatre ni kö hnei eö.”
Itre mekun ecahu fen
^ Maine, “nyipiewekë.”
^ Maine, “ka icilekeu.”
^ Ger., “imano.”
^ Maine, “u.” Ger., psy·kheʹ. Wange ju la HQP.
^ Maine, “u.” Ger., psy·kheʹ. Wange ju la HQP.
