Ioane 14:1-31
14 Öni Iesu hmaca jë hi: “The nue kö troa angazone la itre hni nyipunie. Ngo amamane jë pe la lapaune i nyipunie koi Akötresie; nge lapaune jë fe koi ni.
2 Nyimutre la itre göhnë* hnine la hnalapa i Kaka. Ngo maine pë ju, ke tha tro kö ni a qaja lai koi nyipunie. Ka nyipici hi la hnenge hna qaja, ke eni hë la a tro troa hnëkë göhnë thatraqai nyipunie.
3 Nge e ase jë ni hnëkëne la göhnë i nyipunie, tro ni a bëeke hmaca, me sipu kepe nyipunie ngöne la hnalapang, matre ame la götrane hnenge hna troa lapa ngön, ketre tro fe hi nyipunie a hane lapan.
4 Nge ame la götrane tro ni a tro kow, tro fe hë nyipunie a atre la gojeny.”
5 Öni Toma jë hi: “Joxu, thatre kö huni la hnei nyipëti hna tro kow, matre tro huni a atre tune kaa la gojeny?”
6 Sa jë hi Iesu koi angeic ka hape: “Eni hi la gojeny, me nyipici me mel. Pëkö atr ka atreine troa tro koi Kaka, e tha hna jëne ni.
7 Nge maine atre ni hë hnei nyipunie, ketre atre hë nyipunie la Kemeng, matre qaane enehila, atre nyidrëti hë hnei nyipunie, nge öhnyi nyidrëti fe hë hnei nyipunie.”
8 Öni Filipo jë hi: “Joxu, ca ewekë hi matre lapa loi pi la itre hni hun, amamai huni pi la Kem.”
9 Öni Iesu jë hi: “Filipo, ekö hë ni ce me nyipunie, ngo thatre ni pala kö hnei eö? Ame la atre öhnyi ni, ketre öhne fe hë angeic la Kem. Matre hnauëne la eö a sipone ka hape, ‘Amamai huni pi la Kem’?
10 Hapeu, tha mejiune kö eö laka, ce eni me Kaka nge ce Kakati pala hi me eni? Matre ame la itre ewekë hnenge hna qaja koi eö, tre tha itre sipu mekunange kö, ngo Kaka, Atre ce me eni, a kuca la itre huliwa i nyidrë jëne eni.
11 Mejiune ju laka, ce eni me Kaka nge ce Kakati pala hi me eni; maine pena, mejiune jë pine la itre huliwa.
12 Nyipici, eni a qaja hnyawa koi nyipunie, ame la atre lapaune koi ni, tro fe angeic a hane kuca la itre huliwa hnenge hna kuca, ngo tro kö a tru catre la itre huliwa i angeic, ke eni hë la a bëeke koi Kaka.
13 Matre ame la nöjei ewekë hnei nyipunieti hna troa sipon ngöne la ëjeng, tro ni a eatrën, nge qa ngöne lai, tro ha atrune la Kem jëne la Nekön.
14 Haawe, maine tro nyipunieti a sipone la ketre ewekë ngöne la ëjeng, tro ni lai a eatrën.
15 “Nge maine nyipunieti a hnimi ni, tro hë nyipunieti a trongëne la itre hnenge hna amekötin.
16 Nge tro ni a xëwe sai nyipunie koi Kaka, nge tro nyidrëti a hamëne la ixatua* koi nyipunie, matre tro ej a ce me nyipunie epine palua,
17 ene la ua ne nyipici, hna thatreine kapa hnene la fen, ke tha öhne fe kö angatr, nge hna thatre hnei angatr. Ngo ame pe nyipunie, atre hi nyipunie, ke eje pala hi me nyipunie, nge eje thei nyipunie.
18 Tha tro kö ni a nuaxöji* nyipunie. Nge qanyinge hmaca ha koi nyipunie.
19 Easenyi hë matre, tha tro hmaca kö a öhnyi ni hnene la fen, ngo tro pala hi nyipunie a öhnyi ni, ke ka mele ni nge tro fe nyipunie a hane mel.
20 Nge ngöne la drai cili, tro ha xecie koi nyipunie laka, ce eni me Kaka, nge ce nyipunieti me eni, nge ce eni pala hi me nyipunie.
21 Haawe, ame la atre kapa la hnenge hna amekötin, me trongën ej, angeice hi la atre hnimi ni. Nge ame la atre hnimi ni, tre hna hnimi angeice fe hnei Kaka, nge tro ni a hnimi angeic, me amamane hnyawa la pengöng koi angeic.”
22 Ame hnei Iudra, tha Isakariota kö, hna hnyingë nyidrë ka hape: “Joxu, hnauëne la nyipëti a pi amamane la pengö i nyipë koi hun, ngo tha koi fene kö?”
23 Sa jë hi Iesu koi angeice ka hape: “Maine tro la ketre atr a hnimi ni, tro angeic a trongëne la itre hnenge hna amekötin, nge tro hë la Kemeng a hnimi angeic. Nge tro hë nyio a ce traqa koi angeic, me lapa thei angeic.
24 Ngo ame la atre tha hnimi ni kö, tre tha trongëne kö angeic la itre hnenge hna amekötin. Ngo tha itre trengewekënge kö la hnei nyipunieti hna dreng, ngo qaathei Kaka, Atre upi ni.
25 “Hnenge hna qaja la itre trengewekë celë koi nyipunie, ke ce eni pala kö me nyipunie.
26 Ngo ame la ixatua, ene la uati hmitrötr hna upe hnei Kaka ngöne la ëjeng, tro ej a ini nyipunie la nöjei ewekë asë, me amekunë nyipunie la nöjei ewekë hnenge hna qaja koi nyipunie.
27 Eni a nue la tingetinge koi nyipunie, nge thei nyipunieti hë la tingetingeng. Ngo tha eni kö a nue ej tune la aqane kuca ne la fen. Matre the nue pi kö troa angazone me axouene la itre hni nyipunie.
28 Drenge hë nyipunieti lo ka hape, ‘Eni ha tro, nge qanyinge hmaca ha koi nyipunie.’ Haawe, maine nyipunieti a hnimi ni, tro nyipunieti a madrine la eni a bëeke koi Kaka, ke ka draië catre kö la Keme hung.
29 Nge ase hë ni canga thuemacanyi nyipunie, matre e traqa pi la itre ewekë cili, tro hë nyipunie a mejiun.
30 Ngo tha tro kö ni a ithanata aqeanyi me nyipunie, ke calemi hë la atre musinëne la fen, ngo pëkö mene i angeice theng.
31 Ngo matre tro la fen a atre laka, ka hnimi Kakati ni, eni hë a kuca la hnei Kakati hna amekötine koi ni. Haawe, mejë jë matre tro jë së.
Itre mekun ecahu fen
^ Maine, “nyimu göhnë e hnengödrai.”
^ Maine, “atre iakeukawany.”
^ Maine, “ka pë keme me thin.”
