Ioane 15:1-27
15 Eni hi la nyipi vin, nge Kakati la atre eëny.
2 Nyidrëti a xome pi qaathenge la itre picine ka tha ham, me nyidrawane la itre picine ka ham, matre tro nyudreni a ham atrune hmaca.
3 Nge wië hë nyipunie hnene la itre trengewekënge koi nyipunie.
4 Catre pi nyipunie casi me eni, nge tro hë ni a casi me nyipunie. Ke thatreine kö la picine troa hamëne xanëne la wen, ngo loi e tro ej a casi memine la vin, nge troa tune koi nyipunie, e tha casi kö nyipunieti me eni.
5 Eni hi la vin, nge nyipunieti la itre picin. Matre ame la atre ce me eni, nge ce eni me angeic, tro angeic a hamën atrun. Ngo maine patre ju ni, pëkö hnei nyipunieti hna atreine kuca.
6 Haawe, maine tha casi kö la ketre atr me eni, tro ha thupatriji angeic tune la picin, nge tro hë angeice lai a qaqacil. Thupene lai, tro ha traqa la itre trahmanyi troa hleme la itre picin, me kuiën koi hnasany, ame hna dreuthetrije pi.
7 Ngo maine tro pala hi nyipunieti a casi me eni, nge troa lapa thei nyipunie la itre trengewekëng, haawe, sipone jë la nöjei ewekë hnei nyipunieti hna ajan, nge tro hë lai a eatr.
8 Nge hane hi la ka atrunyi Kaka, ene laka, nyipunie a hamën atrun me amamane ka hape, nyipunie la itretre drei ni.
9 Nge tune lo aqane hnimi ni hnei Kaka, eni fe a hane hnimi nyipunie; haawe, lapa hnyawa ju fene la ihniming.
10 Nge maine tro nyipunieti a drengethenge la hnenge hna amekötin, tro hë nyipunie a lapa fene la ihniming, tune lo aqane drengethenge ni la itre hna amekötin hnei Kaka, me lapa fene la ihnimi nyidrë.
11 “Hnenge hna qaja la itre ewekë cili koi nyipunie, matre tro fe a eje thei nyipunie la madrineng, nge tro ha pexeje la madrine i nyipunie.
12 Matre hane hi la hnenge hna amekötin, ene la tro nyipunieti a ihnimikeu, tune la aqane hnimi nyipunieti ni.
13 Nge pëkö ihnim ka tru catre hune la: ene la tro ketre a meci* pine la sinee i angeic.
14 Nge itre sineenge nyipunie, e tro nyipunie a drengethenge la hnenge hna amekötin.
15 Matre tha eni hmaca kö a hë nyipunie ka hape, hlu, ke thatre kö la hlue la hna kuca hnei maseta. Ngo eni pe a hë nyipunie ka hape, sinee, ke eni a qaja amamane koi nyipunie la nöjei ewekë hnenge hna drenge qaathei Kaka.
16 Tha hnei nyipunieti kö hna ië ni, ngo hnenge pe hna ië nyipunie matre troa hamë wen, nge tro ha cile huti la itre wene cili. Matre e sipone jë nyipunie la nöjei ewekë koi Kaka ngöne la ëjeng, tro hë nyidrëti a hamë nyipunie.
17 “Eni a amekötine la itre ewekë celë koi nyipunie, ene la tro nyipunieti a ihnimikeu.
18 Nge maine tro la fen a methinë nyipunie, atre ju hi nyipunie laka, hnene ej hna pane methinë ni qëmekene troa methinë nyipunie.
19 Ke maine itre atr ne fen nyipunie, tro hë la fen a hnimi nyipunie, ngo pine laka trenyiwa nyipunie kowe la fen, nge hnenge hna ië nyipunie nyipine la fen, haawe, fen a methinë nyipunie.
20 Matre, the thëthëhmine kö lo itre trengewekënge koi nyipunie: tha draië kö la hlu hune la maseta i angeic. Haawe, e hnei angatr hna axösisi ni, tro fe angatr a hane axösisi nyipunie; ngo maine hnei angatre hna drengethenge la hnenge hna amekötin, tro angatre lai a hane drei nyipunie.
21 Nge tro angatr a kuca la itre ewekë cili koi nyipunie pine la ëjeng, ke thatre kö angatre la Atre upi ni.
22 Nge maine tha traqa ju ni troa ithanata koi angatr, pëkö ngazo i angatr, ngo enehila, thatreine kö angatr qeje kepine la itre ngazo i angatr.
23 Nge ame la atre methinë ni, tre angeice fe hi a methinëne la Kemeng.
24 Nge maine tha kuca ju ni la itre huliwa hna thatreine kuca hnei atr, pëkö ngazo i angatr, ngo enehila, hnei angatr hna öhnyi ni me methinë ni, nge tune mina fe koi Kaka.
25 Ngo kola traqa tun, matre eatre jë lo hna cinyihan hnine la Trenge Wathebo i angatr ka hape: ‘Pëkö kepine la imethinë i angatre koi ni.’
26 Ngo e traqa ha la ixatua hnenge hna troa iupi fë qaathei Kaka, ene la ua ne nyipici i Kaka, tro ej a anyipici ni;
27 nge tro fe nyipunieti a hane anyipici ni, ke ce nyipunieti pala hi me eni qaane lo ijine eni a nyiqaan.
Itre mekun ecahu fen
^ Maine, “u.” Ger., psy·kheʹ. Wange ju la HQP.
