Ioane 16:1-33
16 “Hnenge hna qaja la itre ewekë cili koi nyipunie, matre tha tro pi kö nyipunie a kei.
2 Tro la itre atr a helë nyipunie qa hnine la sunago, nge eje hi, tro ha traqa la ijine tro la itre atr a humuthi nyipunie me mekune ka hape, angatr a huliwa koi Akötresie.
3 Ngo tro angatr a ujë tun, ke thatre Kakati kö hnei angatr, nge ketre thatre ni kö.
4 Ngo eni a qaja la itre ewekë cili koi nyipunie, matre, e traqa ju la traeme ne tro angatr a kuca lai, tro nyipunieti a mekune hmaca lo hnenge hna qaja.
“Ngo tha hnenge kö hna canga qaja lai koi nyipunie, ke ce eni pala kö lo me nyipunie.
5 Enehila, eni ha tro kowe lo Atre upi ni, ngo pë pi kö ala casi thei nyipunie ka hane hnyingë ni ka hape: ‘Nyipëti a tro ië?’
6 Ngo pine laka, ase hë ni qaja la itre ewekë cili koi nyipunie, hace hë la itre hni nyipunie hnei hleuhleu.
7 Nge nyipici, eni a qaja hnyawa koi nyipunie, nyine loi koi nyipunie e tro ni a tro qaathei nyipunie. Ke maine tha tro kö ni a tro, tha tro kö a traqa la ixatua koi nyipunie, ngo maine tro ni a tro, tro hë ni a upi angeic koi nyipunie.
8 Nge e traqa ha angeic, tro angeic a amamane kowe la fen la itre ngazo ne ej. Nge tro fe angeic a anyipicine laka, ka meköti la hnenge hna kuca, me amamane la nöj nyine troa amekötin hnei Akötresie.
9 Tro angeic a amamane hnyawa la itre ngazo ne la fen, pine laka, tha lapaune kö la fen koi ni.
10 Thupene lai, tro angeic a anyipicine kowe la fen laka, hnenge hna kuca la meköt, ke tro hë ni a bëeke koi Kaka. Nge e cili, tha tro hmaca kö nyipunieti a öhnyi ni.
11 Nge ase jë hi, tro hë angeic a amamane hnyawa la itre atr hnei Akötresieti hna troa amekötin, ke ase hë nyidrëti amekötine la pun kowe la atre musinëne la fen.
12 “Tru catre pala kö hnei ewekë hnenge hna pi qaja koi nyipunie, ngo tha ijiji nyipunieti pala kö troa kapa.
13 Ngo e traqa ha angeic,* ene la ua ne nyipici, tro angeic a eatrongë nyipunie kowe la nöjei nyipici, ke tha tro kö angeic a qaja la sipu mekuna i angeic, ngo, tro angeic a ithanatane la hnei angeic hna deng, nge tro fe angeic a qaja amamane koi nyipunie la itre ewekë ka troa traqa.
14 Tro hë angeic a atrunyi ni, ke tro angeic a kapa la itre ewekëng, me qaja amamane koi nyipunie.
15 Ke ame la itre ewekë i Kaka, tre, itre ewekënge fe. Celë hi matre eni a qaja ka hape, tro angeic a kapa la itre ewekëng me qaja amamane koi nyipunie.
16 Nyipici, easenyi hë matre tha tro hmaca kö nyipunieti a öhnyi ni, nge easenyi hë matre tro hmaca nyipunieti a öhnyi ni.”
17 Qa ngöne lai, hnene la itre xa atre dreng hna nyiqaane ihnyingënekeune ka hape: “Nemene la aliene lai nyidrëti a qaja ka hape, ‘Easenyi hë matre tha tro hmaca kö nyipunieti a öhnyi ni, nge easenyi hë matre tro hmaca nyipunieti a öhnyi ni,’ memine lo kola hape, ‘ke eni hmaca a bëeke koi Kaka’?”
18 Nge öni angatre hmaca: “Nge nemene fe la aliene la nyidrëti a qaja ka hape, ‘Easenyi hë’? Tha trotrohnine kö huni la hnei nyidrë hna qaja.”
19 Atre hnyawa hi Iesu laka, angatr a pi hnyinge koi nyidrë, matre öni nyidrë: “Nyipunieti kö a ihnyingënekeune pine eni qaja ka hape: ‘Easenyi hë matre tha tro hmaca kö nyipunie a öhnyi ni, nge easenyi hë matre tro hmaca nyipunie a öhnyi ni’?
20 Nyipici, eni a qaja hnyawa koi nyipunie, tro hë nyipunieti a treije me latresi, ngo tro la fen a madrin; nge tro fe nyipunieti a hnë mec, ngo tro ha saze la akötre i nyipunie koi madrin.
21 Ame la kola hnaho la ketre föe, angeic a akötr ke easenyi hë la traeme i angeic, ngo e ase hë, tha mekune hmaca kö angeice lo akötre i angeic, ke ase hë hnahone la ketre atr e celë fen.
22 Haawe, tui nyipunie hi lai enehila, nyipunie a akötr, ngo tro hmaca ni a iöhnyi me nyipunie, nge tro ha madrine la itre hni nyipunie. Nge pëkö atr ka troa apatrene la madrine i nyipunie.
23 Ngöne la ijine cili, tha tro hmaca kö nyipunie a hnyinge koi ni. Nyipici, eni a qaja hnyawa koi nyipunie, maine tro nyipunieti a sipone la ketre ewekë koi Kaka, tro hë nyidrëti a hamë nyipunie ngöne la ëjeng.
24 Uti hë enehila, tha hnei nyipunieti kö hna hane sipone la ketre ewekë ngöne la ëjeng. Sipone jë, nge troa hamë nyipunie, matre pexeje pi la madrine i nyipunie.
25 “Hnenge hna ithanatane la itre mekune cili koi nyipunie jëne la itre ceitun, ngo easenyi hë la traem, nge tha tro hmaca kö ni a hamë ceitune koi nyipunie, ngo tro pe ni a qaja mekötine la itre mekune göi Kaka.
26 Matre ngöne la ijine cili, tro hë nyipunie a sipone koi Kaka ngöne la ëjeng. Ngo tha kolo kö a hape, tro ni a sipo thatraqai nyipunie.
27 Kakati fe a hane hnimi nyipunie, ke hnei nyipunieti hna hnimi ni me mejiune laka, eni hi la qeneqaja i Akötresie.
28 Hnenge hna traqa ceitu me qeneqaja i Kaka, me uti kowe la fen. Nge enehila, eni a tro qaa la fen me elë koi Kaka.”
29 Önine jë hi la itretre dreng: “Goeën! Tha nyipëti hmaca kö a hamë ceitun, ngo nyipëti ha qaja mekötin la itre ewekë koi hun.
30 Matre enehila, xecie hë koi huni laka, atre hë nyipëti la nöjei ewekë asë, nge tha nyipiewekë kö tro hmaca la ketre a hnyinge koi nyipë. Haawe, hnene hi lai, mejiune hë huni laka, hna upi nyipë hnei Akötresie.”
31 Hnyinge jë hi Iesu ka hape: “Mejiune hë nyipunie?
32 Eni a qaja hnyawa koi nyipunie, easenyi hë la ijine tro nyipunieti a isa ije, me isa lapa hnalapan, nge tro hë nyipunie a nue ni. Ngo tha eni casi kö, ke ce Kakati me eni.
33 Haawe, hnenge hna qaja la itre ewekë cili koi nyipunie matre, jëne ni, tro hë nyipunie a tingeting. Ngo eje hi laka, ame e celë fen, tro ha icilekeu me nyipunie, ngo catre pi pe! Ase hë ni ngaane la fen.”
Itre mekun ecahu fen
^ Ame la kola hape, “angeic,” ngöne la xöt. 13 me 14, kola qaja lo “ixatua” ngöne lo xöt. 7. Matre, ame la Iesu a hape, “ka ixatua,” nyidrëti a nyi atrëne la uati hmitrötr, ngacama trengecatre lo, ngo tha atr kö.
