Ioane 17:1-26
17 Iesu a qaja la itre ewekë cili, me gala hnengödrai eë, me hape: “Kaka, traeme hë. Atrune jë la nekö i nyipë matre tro la nekö i nyipëti a hane atrunyi nyipë,
2 ke hnei nyipëti hna acili angeic troa mus hune la nöjei atr* asë, nge tro angeic a hamëne la mele ka pë pun kowe la itre atr hnei nyipëti hna ahnithe koi angeic.
3 Nge ame la aqane troa hetrenyi la mele ka pë pun, tre, tro angatr a atrepengöi* nyipë, Akötresie ka cas, memine la hnei nyipëti hna up, Iesu Keriso.
4 Hnenge hna atrunyi nyipë e celë fen, me afenesine la huliwa hnei nyipëti hna ahnithe koi ni.
5 Haawe, enehila Kaka, atrunyi ni jë thei nyipë hnene la lolo ka eje theng, lo ce eni pala kö me nyipë qëmekene troa xupe la fen.
6 “Nge hnenge hna qaja amamane* la ëje i nyipë kowe la itre atr hnei nyipëti hna xome nyipine la fen, me hamë ni. Itre atre i nyipë angatr, nge hnei nyipëti hna ahnithi angatre koi ni, nge hnei angatre hna trongëne* la itre trengewekë i nyipë.
7 Nge atre hë angatr enehila laka, ame asë hi la nöjei ewekë hnei nyipëti hna hamë ni, tre itre ka qaathei nyipë;
8 ke hnenge hna qaja koi angatre la itre ewekë hnei nyipëti hna ini ni, ame hnei angatre hna kapa me atrehmekune laka, eni hi la qeneqaja i nyipë, ene pe, mejiune jë hi angatre ka hape, nyipëti la atre upi ni.
9 Matre angatre la hnenge hna thithi san ngo tha fene kö, ke itre atr lai hnei nyipëti hna ahnithe koi ni, itre atre i nyipë;
10 nge ame la nöjei ewekëng, tre itre ewekë i nyipë, nge tune fe kowe la itre ewekë i nyipë, itre ewekënge fe. Nge hna atrunyi ni nyipi angatr.
11 “Tha hmitre pe kö matre patre pi ni qaa la fen, ngo angatre pe kö e nyipine la fen, nge eni hmaca a bëeke koi nyipë. Haawe, Kakati fe, Atre Ka Hmitrötr, wai angatre pe kö pine la ëje i nyipë, lo hnei nyipëti hna hamë ni, matre tro angatr a cas tune la aqane cas i nyiso.
12 Ke ame la eni pala kö me angatr, hnenge hna kuca hnyawa angatre pine la ëje i nyipë, ke itre atr hnei nyipëti hna ahnithe koi ni; nge hnenge hna thupë angatre hnyawa, matre pëkö ala casi thei angatr ka patr, ngo kolo hmekuje hi lo nekö ne la hnëjin, matre eatre jë lo hna cinyihan.
13 Ngo enehila, eni a traqa koi nyipë, nge eni a qaja la itre ewekë celë kowe la fen, matre tro la madrin ka eje theng a ej me pexeje thei angatr.
14 Nge hnenge hna hamë angatre la itre trengewekë i nyipë, ngo hnei fen hna methinë angatr, ke tung, tha itre atre ne fene kö angatr.
15 “Tha eni kö a sipo nyipë troa thepe angatr qaa la fen, ngo tro pe a thupë angatr pine la atre ka ngazo.
16 Tha ketre atre ne fene kö ni, nge tui angatre fe, tha itre atre ne fene kö angatr.
17 Haawe, ahmitrötrë angatre* jë jëne la nyipici; ke trengewekë i nyipë la nyipici.
18 Nge tune la aqane upi ni hnei nyipë kowe la fen, eni fe a hane upi angatre kowe la fen.
19 Nge eni a ahmitrötrë ni göi angatr, matre tro fe a hane ahmitrötrë angatr hnene la nyipici.
20 “Tha eni kö a thithi sai angatr hmekuj, ngo memine fe la itre ka amamane la lapaune i angatr koi ni jëne la itre trengewekë i angatr,
21 qa ngöne lai, tro hë angatr asë a cas, tui nyipë Kaka, ke ce nyipëti pala hi me eni, nge ce eni fe me nyipë, nge matre tro fe angatr a hane casi me nyiso, nge tro hë la fen a mejiune laka, nyipëti la atre upi ni.
22 Hnenge hna hamë angatr la lolo hnei nyipëti hna hamë ni, matre tro angatr a cas, tune la aqane cas i nyiso.
23 Ce eni me angatr, nge ce nyipëti me eni, matre pexeje pi la aqane cas i angatr, nge tro hë la fen a jelenyipicine laka, nyipëti la atre upi ni, nge nyipëti a hnimi angatr tune la aqane hnimi ni hnei nyipë.
24 Kaka, epi troa ce me eni la itre atr hnei nyipëti hna ahnithe koi ni, matre tro angatr a öhne la lolo hnei nyipëti hna hamë ni, ke hnei nyipëti hna pane hnimi ni qëmekene troa ami trepene la fen.
25 Kakati fe, Atre ka meköt, tha hnei fene kö hna thele troa atrepengö nyipë, ngo eni hi la ka atrepengö nyipë. Nge atre hnyawa hi la itretre dreng ka hape, nyipëti hi la atre upi ni.
26 Haawe, hnenge hna qaja amamane la ëje i nyipë koi angatr, nge tro pala kö ni a kuca tun, matre tro fe angatr a hane hnime la itre xa atr, tune la aqane hnimi ni hnei nyipë, nge tro fe hë ni a hane casi me angatr.”
Itre mekun ecahu fen
^ Ger., “ka trene ijön.”
^ Ame la hnëewekë celë qene Geres, tre nyine qaja la ketre ewekë hna kuca lapan.
^ Maine, “atre.”
^ Maine, “drengethenge.”
^ Maine, “aisa.”
