Ioane 18:1-40
-
Iudra a salemë Iesu (1-9)
-
Peteru a hna la taua (10, 11)
-
Hna xomi Iesu koi Ann (12-14)
-
Pane ijine qaja Peteru ka hape, thatre Iesu kö angeic (15-18)
-
Iesu qëmeke i Ann (19-24)
-
Hnaaluen me hnaakönine qaja Peteru ka hape, thatre Iesu kö angeic (25-27)
-
Iesu qëmeke i Pilato (28-40)
-
“Tha qaa kö celë fen la Baselaiang” (36)
-
18 Ase jë hi Iesu qaja la itre ewekë cili, nyidrëti me itretre dreng a tro sasaithe pi la sasala* ne Kederon, me tro kowe la ketre hlapa, me lapa e cili.
2 Ngo atre hi Iudra, lo atre salemë nyidrë, la götrane cili, ke hnei Iesu lo hna majemine tro kowe lai memine la itretre dreng.
3 Ame hnei Iudra hna tro kowe lai memine la itre sooc, me itretre thup ne la itre tane i angetre huuj, me itre Faresaio. Nge angatr a traqa fë pi la itre uke jina, me itre laame cil, me itre jia ne isi.
4 Nge pine laka, atre hi Iesu la nöjei ewekë ka troa traqa koi nyidrë, nyidrëti a tro pi koi angatr me hnyinge ka hape: “Nyipunie a thele drei?”
5 Sa jë hi angatre ka hape: “Iesu atre Nazareta.” Matre öni nyidrë: “Eni hi.” Nge ce angatre me Iudra lo atre salemë Iesu.
6 Nge ame ju hi la nyidrëti a ase qaja ka hape, “Eni hi,” angatr a feke ca hutrö me kei hnadro eë.
7 Ame hnei nyidrëti hna hnyinge hmaca koi angatr ka hape: “Nyipunie a thele drei?” Öni angatr: “Iesu, atre Nazareta.”
8 Öni Iesu jë hi: “Ase hë ni qaja koi nyipunie ka hape, eni hi, haawe, pine laka nyipunieti a thele ni, nga nue angatre pi la.”
9 Celë hi matre eatre pi lo hna qaja hnei nyidrë ka hape: “Pëkö ala casi thene lo itre hnei nyipëti hna ahnithe koi ni ka patr.”
10 Nge thei Simona Peteru la ketre taua, matre angeic a hule pi me thupa la hnangenyë maca ne la hlue ne la atre huuje ka sisitria. Maliko la ëjene lai hlu.
11 Ngo öni Iesu koi Peteru ka hape: “Amë ju la taua i eö ngöne la göhnen, ke hapeu, tha tro kö ni a iji la ver hna hamë ni hnei Kaka?”
12 Ame hnene la itre sooc, me tane i angatr, me itretre thup i angetre Iudra, hna xolouthi Iesu me othi nyidrë.
13 Nge angatr a pane tro sai nyidrëti jë koi Ana, ke angeic la keme ne la föi Kaiafa, lo atre huuje ka sisitria ngöne la macatre cili.
14 Nge Kaiafa hi lo atre ithanata kowe la itretre Iudra me qaja ka hape, nyine loi koi angatr e troa meci la ala casi thatraqane la nöj asë.
15 Ame hnei Simona Peteru, memine la ketre atre dreng hna xötrethenge Iesu. Nge ka iatre hnyawa la atre drenge cili memine la atre huuje ka sisitria, matre hnei angeic hna lö me Iesu kowe la götran gaa pë ihakun e hnine la hnalapa ne la atre huuje ka sisitria.
16 Ngo cilë qëhnelö ju pe hi Peteru. Ame hna bëeke hmaca hnene lo ketre atre dreng, ene lo hna atre hnyawa hnene la atre huuj, me tro kowe la atre thupë qëhnelö* me ithanata koi angeic, me lö sai Peteru.
17 Nge hnene la hlu, ene lai jajinyi ka thupë qëhnelö hna qaja koi Peteru ka hape: “Tha nyipëti kö la ketre atre drei angeic?” Sa jë hi Peteru ka hape: “Waea tha eni kö.”
18 Nge e cili fe la itre hlue me itretre thup. Angatr a athi eë me nango hleng, ke kola hnötre la ijine cili. Ame hna traqa fe hnei Peteru troa hleng.
19 Hnene la atre huuje ka sisitria hna nyiqaane hnyingë pengöne koi Iesu la itretre drei nyidrë, me itre ini hnei nyidrëti hna hamën.
20 Sa jë hi Iesu ka hape: “Hnenge pala hi hna cainöje qëmekene la nöjei atr, me hamë ini hnine la sunago me hnine la uma ne hmi. Nge hnë itronyi hi lai hnene la angetre Iudra, matre pëkö ewekë hnenge hna qaja juetrën.
21 Haawe, hnauëne kö la nyipë a hnyinge koi ni? Hnyingëne jë pe kowe la itre hnenge hna inin. Ke goeën! Atre hnyawa hi angatr la hnenge hna qaja.”
22 Ase jë hi nyidrëti qaja la itre ewekë cili, hnene la ketre atre thup ka cil e cili hna xe la ialameke i Iesu, me hape: “Aqane sa i eö hi lai kowe la atre huuje ka sisitria?”
23 Sa jë hi Iesu ka hape: “Maine ka tria ju la ithanatang, qaja jë hö la ithanatange ka tria; ngo maine ka nyipici hi la hnenge hna qaja, nga eö a xe ni fë nemen?”
24 Thupene lai, Ana a upi nyidrëti jë, fë la hna oth koi Kaiafa, atre huuje ka sisitria.
25 Nge Simona Peteru a nango cil e cili me hleng. Ame hnei angatre hna hnyingë angeic ka hape: “Eö hi la ketre atre drei angeic, eje hi ?” Thoi jë hi angeic me hape: “Waea, tha eni kö.”
26 Nge hnene la ketre hlue ne la atre huuje ka sisitria, ene la ketre atrene la lapa ne lo hlue hnei Peteru hna thupa hnangenyën, hna qaja ka hape: “Hnenge lo hna öhnyi eö me angeic ngöne la hlapa, eje hi?”
27 Ngo thoi hmaca jë hi Peteru, ame hna kukahleke pi la trotro.
28 E hmahmakany, hnei angatr hna tro sai Iesu qaathei Kaiafa kowe la hnalapa i gavena. Ngo tha lö pi kö angatre hnine la hnalapa i gavena, wanga tha hmitrötre pi angatr nge tha xeni pi angatre la Paseka.
29 Nge Pilato a tro pi koi angatr me hape: “Nemene la ngazo hna kuca hnene la atre ce?”
30 Sa jë hi angatre ka hape: “Maine pë ju ngazo hna kuca hnene la atre celë, tha tro kö huni a tro sai angeice koi nyipë.”
31 Öni Pilato jë hi: “Xomi angeice jë nge ketre ameköti angeice jë kö thenge la wathebo i nyipunie.” Matre önine la angetre Iudra: “Hna wathebo huni troa humu atr.”
32 Celë hi matre eatre jë lo hna qaja hnei Iesu göi aqane meci nyidrë.
33 Haawe, lö hmaca jë hi Pilato kowe la hnalapa i Gavena me hë Iesu me hape: “Eö la joxu i angetre Iudra?”
34 Sa jë hi Iesu ka hape: “Qa kaa la ithanata cili, qaathei nyipë maine qaathene la itre ka qeje ni?”
35 Öni Pilato: “Atre hi eö laka, tha atre Iudra kö ni. Nöje i eö me itre tane i angetre huuj la ka uti sai eö koi ni. Matre nemene la hnei eö hna kuca?”
36 Sa jë hi Iesu ka hape: “Tha ka qaa kö celë fene la Baselaiang. Ke maine ka qaa ju la fene la Baselaiang, tro hë la itre hlueng a isine matre tha tro kö a nue ni koi angetre Iudra. Ngo eje hi laka, tha ka qaa kö la fene la Baselaiang.”
37 Öni Pilato jë hi: “Haawe, joxu eö?” Sa jë hi Iesu ka hape: “Nyipëti lai ka qaja ka hape, joxu ni, ngo ame la kepin matre hnaho ni jë, nge uti pi ni kowe la fen, tre göi troa anyipicine la nyipici. Matre ame asë hi la nöjei atr ka sajuëne la nyipici, angatr a drenge la aqane ewekëng.”
38 Hnyinge jë hi Pilato ka hape: “Nemene la nyipici?”
Haawe, ase jë hi angeic qaja la itre ewekë cili, Pilato a tro ju kowe la itretre Iudra me hape: “Pëkö ngazo i angeic hnenge hna öhn.
39 Ngo tune lo hna majemine thei nyipunie, tro ni a nue la ketre atr hna akalabusin ngöne la ijine Paseka. Matre hapeu, aja i nyipunieti kö tro ni a nue la Joxu i angetre Iudra?”
40 Angatr a sue catre hmaca jë me hape: “Tha angeice kö, ngo Barabasa pe!” Ngacama atrekënö lae Barabasa.
Itre mekun ecahu fen
^ Maine, “neköi tim ka neni ngöne la ijine hnötr e Kederon.”
^ Maine, “hnë lö.”
