Ioane 19:1-42
19 Pilato a xomi Iesu jë me thaucë nyidrë.
2 Nge itre sooc a ele jë la itre ka ithiny nyine nyi korona, me petrëne la he i nyidrë, me heetrë nyidrë hnene la iheetre ka maea ngön.
3 Angatr a easenyi nyidrëti jë me hape: “Bozu së, Joxu i angetre Iudra!” Nge angatr a xe ju la ialameke i nyidrë.
4 Tro hmaca pi Pilato a tro tröne me hape: “Hanawang! Eni a traqa sai angeic koi nyipunie, matre tro nyipunie a atre laka, pëkö ngazo hnenge hna öhne thei angeic.”
5 Matre Iesu a tro pi koi angatr fë lo korona ka ithiny, memine lo iheetre ka maea ngön. Nge öni Pilato jë hi: “Hane hi la trahmany!”
6 Ngo ame la kola öhnyi nyidrë hnene la itre tane i angetre huuj me itretre thup, angatr a suene jë ka hape: “Athipi angeice ju hune la sinöe!* Athipi angeice ju hune la sinöe!” Matre sa jë hi Pilato ka hape: “Nga ketre xomi angeice jë nge humuthi angeice pi, ke pëkö ngazo hnenge hna öhne thei angeic.”
7 Önine jë hi la angetre Iudra: “Hetre wathebo hun, nge thenge la wathebo cili, tro hë angeic a mec, ke hnei angeic hna sipu qeje angeic ka hape, nekö i Akötresie.”
8 Ngo drenge ju hi Pilato la hnei angatre hna qaja, elë jë hi la trenge xou i angeic.
9 Matre angeic a lö hmaca jë hnine la hnalapa ne la itre Gavena me qaja koi Iesu ka hape: “Atre kaa eö?” Ngo lapa thaupu kö Iesu.
10 Matre öni Pilato koi nyidrë ka hape: “Xele kö eö ma sa koi ni? Thatre kö eö ka hape, eni hi la ka troa amekötine troa nue eö maine humuthi eö?”
11 Sa jë hi Iesu ka hape: “Thatreine jë kö nyipëti musinë ni e tha ka qaa kö hnengödrai. Celë hi matre ame la atre nue ni koi nyipë, tre, ka tru catre kö la ngazo i angeice hui nyipë.”
12 Qa ngöne lai, hnei Pilato hna isine troa nue nyidrë, ngo angetre Iudra pe a catre fë ka hape: “E tro eö a nue la atre cili, tha sinexöle i Kaisara hmaca kö eö, ke ame la atr acili angeic troa joxu, ithupëjia* lai me Kaisara.”
13 Matre, ase jë hi Pilato drenge la itre trengewekë cili, angeic a lö sai Iesu pi a tro trön, me lapa të hune la ita ne iameköti hna acil ngöne la götrane hna hëne ka hape, Trepene Etë, nge qene Heberu kola hape, Gab′ba·tha.
14 Ame la drai cili, tre drai ne Hnëkë göi Paseka, nge kolo hmekune la hnaasikisine hawa.* Matre Pilato a qaja jë kowe la angetre Iudra ka hape: “Hane hi la Joxu i nyipunie!”
15 Ngo suene jë hi angatre ka hape: “Humuthi angeice pi! Humuthi angeice pi! Athipi angeice ju hune la sinöe!” Öni Pilato jë hi: “A tro ni a humuthe la Joxu i nyipunie?” Öni itre tane i angetre huuj: “Pëkö ketre joxu hun, Kaisara hmekuje hi.”
16 Ame hnei Pilato hna nue Iesu koi angatr troa jei faonyi nyidrë hune la sinöe ne iaxösisi.
Nge angatr a ce xolouthi nyidrëti ju.
17 Ame hnei Iesu hna ajöne la sinöe ne iaxösisi* i nyidrë kowe la Götrane Ne La Itre Inenatr, lo hna hëne qene Heberu ka hape, Gol′go·tha.
18 Angatre a jei faonyi nyidrëti ju nyipine la lue atr, casi ngöne la götrane maca, nge ketre ngöne la götrane mi.
19 Nge hnei Pilato hna sija la ketre ewekë hna jeng hune la sinöe ne iaxösisi, hna cinyihan ka hape: “Iesu, atre Nazareta, Joxu i angetre Iudra.”
20 Nge ala nyimu la angetre Iudra ka e la hna cinyihane celë, ke ame la götran hna jei faonyi Iesu, tha nanyi kö qa ngöne la traon. Nge ketre, hna cinyihane lai qene Heberu, me qene Roma, me qene Geres.
21 Matre önine la angetre Iudra, ene lo itre tane i angetre huuj, koi Pilato ka hape: “The cinyianyine kö ka hape, ‘Joxu i angetre Iudra,’ ngo, cinyianyine pi pe ka hape, öni angeic, ‘eni la Joxu i angetre Iudra.’ ”
22 Sa jë hi Pilato ka hape: “Ase hë ni cinyihan, nge eje hë lai.”
23 Nge ase jë hi jei faonyi Iesu hune la sinöe, hnene la itre sooc hna xome la itre iheetre ka qea i nyidrë me thawa foan, matre isa hetrenyi angatr. Ame hnei angatre hna xome pi la iheetre i Iesu ka he hnin. Ngo tha hna cane kö ke hna sil apexejen.
24 Angatr a iqajakeune ju ka hape: “The zezene kö, ngo tro pe sa uthi trikitrën matre mama jë la atrekë ewekën.” Celë hi matre eatre pi lo hna cinyihane ka hape: “Tro angatr a thawa la itre iheetreng, me uthi trikitrëne la iheetreng.” Nge hna kuca tune hi lai hnene la itre sooc.
25 Nge ezine lo sinöe hna athipi Iesu ngön, kola cil hnene la thine i nyidrë, me ketre föe, ene la trejin me thine i nyidrë, me Maria föi Kolopa, me Maria Magadalena.
26 Matre ame ju hi la Iesu a öhn e cili la thine i nyidrë, memine lo atre dreng hnimina i nyidrë, öni nyidrëti jë hi kowe la thine i nyidrë: “Nenë, qaane enehila, angeice pë hë la nekö i eapo.”
27 Thupene lai, öni nyidrë kowe lai atre dreng ka hape: “Qaane enehila, eahlo pë hë la thine i eö!” Matre qaane ju hi la hawa cili, angeice pë hë a xomi eahlo jë kowe la hnalapa i angeic.
28 Nge pine laka, atre hë Iesu ka hape, ase hë nyidrëti kuca la nöjei ewekë hna amekötin hnei keme i nyidrë, öni nyidrë: “Eni a pi ij.” Ngo nyidrëti a qaja lai matre eatre jë lo hna cinyihan.
29 Nge e cili fe la ketre trengen hna nyialien hnei waina. Matre angatr a xome pi la ketre wene koto* hna trapine ngöne waina hna ithuenyikön, me amë hune la ketre neköi picine sinöe,* me liine kowe la që i nyidrë.
30 Nge ase jë hi Iesu tupathe la waina hna ithuenyikön, öni nyidrë: “Ase hë ni kuca la nöjei ewekë hnei nyipëti hna amekötine koi ni!” Thupene lai, thipi pi hi la he i nyidrë, nge meci* pi hi nyidrë.
31 Nge pine laka, drai ne Hnëkë lai drai cili, tha ka loi kö tro la itre ngönetrei a thipe la drai Sabath hune la itre sinöe ne iaxösisi (ke ka ketre pengöne kö la Sabath cili). Celë hi matre hnei angetre Iudra hna sipo Pilato troa lepe xecie la lue ca ne lo itre ka thip, me tha la itre ngönetrei i angatr.
32 Ame hna traqa hnei itre sooc, me lepe xecie la lue ca ne lo pane atr, nge hna kuca tune fe kowe la hnaaluen ka thip ezi nyidrë.
33 Ngo ame ju hi la angatr a traqa koi Iesu, öhne ju hi angatr laka, meci hë nyidrë, matre tha lepe xecie ju kö angatr la lue ca i nyidrë.
34 Ngo hnene la ketre sooc hna thine la wengesisila i nyidrë, ame hna neni pi la madra me tim.
35 Nge hnene la atre ka öhne la ewekë cili hna sipu anyipicin, nge ka nyipici hi la hnei angeice hna qaja, ke atre kö angeice laka, ka nyipici hi lai, ngo göne hi matre mejiune jë fe nyipunie.
36 Kola traqa la itre ewekë cili matre, eatre jë lo hna cinyihan ka hape: “Pëkö ca june i angeic ka troa xeci.”
37 Nge hna qaja fe hnene la ketre hna cinyihan ka hape: “Tro hë angatr a goeëne la atre hna thin.”
38 Nge thupene la itre ewekë cili, hnei Iosefa atre Arimathea hna sipone la ngönetrei Iesu koi Pilato. Nge ketre atre drei Iesu angeic, ngo pine laka, xou i angeic e angetre Iudra, angeic a juetrëne lai. Haawe, kapa ju hi Pilato, ame hnei angeic hna tro, me xome la ngönetrei Iesu.
39 Nge hnei Nikodremo, lo atre tro troa wai Iesu e jidr, hna hane traqa fë la 33 lao kilo muro hna thue nyikön hnei aloes.
40 Nge hnei nyidroti hna xome la ngönetrei Iesu me atuthe hnei maano lino me itre dröne hnitre ka pui lolo, thenge lo aqane kele wezipo i angetre Iudra.
41 Eloine pe, hetre hlapa ngöne la götran hna humuthi nyidrë, nge ngöne la hlapa cili, hetre ketre hua* ka hnyipixe, nge tha hna ami wezipone pala kö.
42 Haawe, pine laka, drai ne Hnëkë lai koi angetre Iudra, nge tha nanyi kö la hua, nyidroti a amë ju e cili la ngönetrei i Iesu.
Itre mekun ecahu fen
^ Maine, “Jei faonyi angeice jë! Jei faonyi angeice jë!”
^ Maine, “icilekeu.”
^ Easenyi e midi.
^ Wange ju la HQP.
^ Ketre pengöne akojij ka fuluthi tim.
^ Ger., “hisop.” Maine jë kola qaja la ketre feja e Palestine ka traqa koi 1.8 m la edraiën.” Wange ju la HQP.
^ Maine, “simano.”
^ Maine, “hua nyine amekunën.”
