Ioane 2:1-25
2 Nge thupene la lue drai, hna feetëne la ketre faipoipo e Kana e Galilaia, nge thine i Iesu fe hi e cili.
2 Nge hna hane fe hë Iesu me itretre drei nyidrë troa xeni ngöne la hna feet.
3 Matre ame hë la kola pë trootro la waina, hnene la thine i Iesu hna qaja koi nyidrë ka hape: “Pë hë waina i angatr.”
4 Öni Iesu jë hi ka hape: “Föe, tha jole i nyiso kö lai.* Nge tha traemenge pala kö.”
5 Önine jë hi la thine i nyidrë kowe la itre hlu ka hape: “Kuca asë jë la hnei angeice hna troa qaja.”
6 Hetrenyi fe e cili la sikisi lao trengene tim etë, nyine ahmitrötrë ewekë thenge lo hna amekötin thei angetre Iudra. Nge ijije hi troa amë e hnin, la luetre maine köni tulu.*
7 Matre öni Iesu jë hi: “Nyialiene pi la itre trengen hnei tim.” Ame hnei angatr hna nyialiene ju, uti hë tiqa gala.
8 Öni nyidrëti jë hi: “Haawe, jöe jë, nge hamëne pi kowe la tane huliwa.” Ame hnei angatr hna tro fë.
9 Nge ame hë la kola tupathe hnene lai tane huliwa la tim hna saze koi waina, ngo thatre pe ka hape, ka qa kaa (ngo atre hi la itre hlue ka jöe waina), angeic a hëne ju la atre faipoipo,
10 me hape: “Hnene la nöjei atr hna majemine pane atë la nyipi waina, ngo e hmo hë la atr, angatr pena ha atë la waina menu. Ngo ame eö, hnei eö pe hna amë acon la nyipi waina koi enehila.”
11 Hnei Iesu hna kuca lai e Kana e Galilaia, nge celë hi qaane la itre iamamanyikeu i nyidrë, nge qa ngöne lai, mama pi hi la mene i nyidrë. Ame hna lapaune ju koi nyidrë hnene la itretre drei nyidrë.
12 Thupene lai, hnei nyidrë me thine i nyidrë, me ha jini nyidrë, me itretre drei nyidrë hna Kaperenauma thenge, ngo tha lapa aqeanyi ju kö angatr e cili.
13 Nge easenyi hë troa feetëne la Paseka ne la itretre Iudra, matre Iesu a tro ju Ierusalema.
14 Ame hnei nyidrëti hna öhn e hnine la uma ne hmi la itre ka salemë kau, me mamoe, me piny, me itre ka saze mani a kola nango lapa të.
15 Nge ase jë hi nyidrëti ele la itre eno, nyidrëti a helëne pi qa hnine la uma ne hmi la itretre salemë mamoe, me kau. Ame hnei nyidrëti hna hnatrije la itre manie sileva, me kapasaitrëne la itre laulau ne la itre ka saze mani.
16 Nge nyidrëti a qaja ju kowe la itre ka salemë pinyi ka hape: “Xome pi qa la la itre ewekë celë! Nge loi ju hë hnei epuni hna xome la uma i Kaka nyine uma ne Salem.”*
17 Nge e cili, mekune hmaca jë hi la itretre drei nyidrë lo hna cinyihan ka hape: “Tro la ajang kowe la hnalapa i nyipë a mel e kuhu hning kösë eë.”
18 Hnene la itretre Iudra hna qaja koi nyidrë ka hape: “Kuca jë la ketre iamamanyikeu nyine anyipicine ka hape, ijiji eö kö troa kuca la itre ewekë cili?”
19 Sa jë hi Iesu koi angatr ka hape: “Thëtrije pi la uma ne hmi, nge tro ni a acili eje hmaca ngöne la hnaakönine drai.”
20 Sa jë hi la angetre Iudra ka hape: “Traqa koi 46 lao macatre ne kola xupe la uma ne hmi celë, nge tro pe kö eö a acil eje hmaca ngöne la köni drai hi?”
21 Ngo ame la uma ne hmi hna qaja hnei nyidrë, tre, ngönetrei i nyidrë.
22 Matre, ame hë la kola amele nyidrëti hmaca, mekune jë hi la itretre dreng ka hape, kolo itre trengewekë lai hnei nyidrëti hna qaja lapan, ene pe, mejiune ju hi angatr kowe la itre hna cinyihan, me kowe la itre trengewekë i nyidrë.
23 Ngo ame lo nyidrëti pala kö e Ierusalema, hmekune lo kola feetëne la Paseka, hnene la itre atr hna lapaune koi nyidrë* pine la itre iamamanyikeu ka tru i nyidrë.
24 Ngo tha mejiune kö Iesu koi angatr, ke atre hnyawa hi nyidrëti la pengöne la atr.
25 Matre, tha nyipiewekë kö troa hetre ka qejepengöne lai koi nyidrë, ke atre hnyawa hi nyidrë la aliene hni ne la atr.
Itre mekun ecahu fen
^ Ithanata ka amamane ka hape, xele kö ma kapa. Nge e kola hape, “föe,” tha kolo kö a pë metrötr.
^ Easenyi koi 44 uti hë 66 lao lit.
^ Maine, “hna maketr.”
^ Ger., “kowe la ëje i nyidrë.”
