Ioane 20:1-31
20 Nge ngöne la pane drai ne la wiik, hnei Maria Magadalena hna tro e hmahmakanyi sine jidr kowe la hua,* nge traqa ju hi angeic a öhne la etë a hna ukun qa ngöne la qe ne la hua.
2 Angeic a nyinyape pi koi Simona Peteru me kowe lo atre dreng hnei Iesu hna hnime catrën, me hape: “Ase hë angatre xome la Joxu qa hnine la hua, nge thatre kö huni la götran hnei angatre hna ami nyidrëti ngön.”
3 Ame hnei Peteru memine lai ketre atre dreng hna tro pi kowe la hua.
4 Nge nyidroti a ce nyinyape pi kowe la hua, ngo nyinyape catre kö la ketre hui Peteru, matre traqa pa i angeice kö.
5 Angeic a thili ju me goeën e hnin, nge öhne ju hi angeic la itre maano lino hna amë hnyawan, ngo tha lö ju kö angeic.
6 Ame hna traqa pi fe Simona Peteru, me xötrethenge lo ketre, nge angeic a lö jë, me öhne la itre maano lino hna amë hnyawan.
7 Hna ewathe lo iheetr ka atuthe la he i Iesu, nge isa meköle kö ej memine la itre xa imaano.
8 Nge lö jë fe hi lo atre dreng ka traqa pa kowe la hua, me öhne la itre ewekë tune lo hna qaja koi angatr, ame hnei angeice hna hane mejiun.
9 Ngo eje hi laka, tha trotrohnine pala kö angatre lo itre hna cinyihan ka hape, troa amele nyidrëti hmaca qa hna mec.
10 Ame hnene la lue atre dreng hna isa bëeke hmaca pi kowe la hnalapa i nyidro.
11 Ngo Maria pala kö a treije cile tröne la hua, nge angeic a thili ju me goeën e hnin.
12 Nge öhne ju hi angeic la lue angela ka heetrë ka wië. Nyidroti a lapa ngöne lo götran hna amë la ngönetrei Iesu, casi hmekune la he, nge ketre hmekune la lue ca i nyidrë.
13 Matre öni nyidro koi angeic: “Föe fe, hnauëne la nyipoti a treij?” Öni angeic: “Ase hë angatre xome la Joxung, nge thatre kö ni la götran hnei angatr hna ami nyidrëti ngön.”
14 Ase jë hi angeice qaja lai, hnei angeice hna tha ujë me öhnyi Iesu a kola cil e cili, ngo tha wangatrehmekunyi nyidrëti kö hnei angeic.
15 Öni Iesu jë hi: “Föe fe, hnauëne la nyipoti a treij? Nyipoti a thele drei?” Maria pe kö a mekune ka hape, atre nyihnyawa hlapa la atre cili, matre öni angeic: “Maine nyipëti la ka xome la ngönetrei i nyidrë, qaja jë koi ni la götran hnei nyipëti hna ami nyidrëti ngön, nge tro ni a xomi nyidrë qaa lai.”
16 Öni Iesu jë hi: “Maria!” Matre angeic a thaujë jë me qaja qene Heberune ka hape: “Rab·bo′ni!” (Kola hape, “Atre Ini!”)
17 Öni Iesu hmaca jë: “The xötrethenge ni hmaca kö, ke tha elë petre kö ni koi Kaka. Ngo tro jë kowe la itre trejin me eni, nge qaja ju koi angatre ka hape, tro ni a elë kowe la Kemeng, me Keme i nyipunieti fe, nge kowe la Akötresing, nge Akötresi nyipunieti fe.”
18 Haawe, tro pi hi Maria Magadalena troa tro fë lai maca kowe la itretre dreng me hape: “Öhne hë ni la Joxu.” Ame hnei angeic hna qaja asë lo maca i Iesu.
19 Nge ame ngöne la pane drai ne la wiik, hnene la itretre dreng hna icasikeu e hej nge hna kiine la itre qëhnelö ke angatr a xoue angetre Iudra. Ame hna mama pi hnei Iesu nyipi angatr me hape: “Epi tingetinge nyipunie.”
20 Ase jë hi nyidrë qaja lai, nyidrëti a amamane pi koi angatr la lue hnatrapaime i nyidrë, me wengesisila i nyidrë. Ame hna madrine la itretre dreng troa öhne la Joxu.
21 Öni Iesu hmaca jë hi ka hape: “Epi tingetinge nyipunie. Tune lo aqane upi ni hnei Kaka, eni fe a hane upi nyipunie.”
22 Ase jë hi nyidrëti qaja lai, nyidrëti a ufe pi hui angatr me hape: “Ange kapa ju la uati hmitrötr.
23 Nge maine tro nyipunie a nue la ngazo i ketre, ketre ase fe hë Akötresie nue la ngazo i angeic. Ngo maine tha nue kö nyipunie la ngazo i ketre, ketre tha Akötresieti kö a nue la ngazo i angeic.”
24 Ngo ame lo Iesu a mama koi angatr, patre kö Toma, lo ketre ne la ala Truelof, ene lo hna hëne ka hape, Fini.
25 Matre hnene la itre xa atre dreng hna qaja koi angeic ka hape: “Öhne hë huni la Joxu.” Ngo sa jë hi angeic ka hape: “Maine tha tro kö ni a öhne la thupene itre fao* ngöne la hnatrapaime i nyidrë, me lin e cili la hene iwanakoimeng, me imeng kowe la gaa xulu ne la iwengesisila i nyidrë, tha tro jë kö ni a hane mejiun.”
26 Haawe, thupene eitre lao drai, hnene hmaca la itretre dreng hna icasikeu hnine la hnalapa cili, nge ce angatre me Toma. Nge ngacama hna kiine la qëhnelö, ngo cile pi hi Iesu nyipi angatr me hape: “Epi tingetinge nyipunie.”
27 Thupene lai, öni nyidrë koi Toma: “Line pi la hene wanakoime i eö e celë, nge goeëne ju la lue ihnatrapaimeng, nge line jë fe la ime i eö kowe la wengesisilang, nge loi ju hë hna luelu,* ngo mejiune ju pe.”
28 Öni Toma jë hi: “Joxung, nge Akötresinge fe!”
29 Öni Iesu koi angeic ka hape: “Eö kö a mejiune pine laka, öhnyi ni hë hnei eö? Ngo tro pe a madrine la atre mejiune nge tha öhne kö.”
30 Nge nyipici laka, nyimutre pala kö la itre iamamanyikeu hnei Iesu hna kuca kowe la itretre dreng, ngo tha hna fejane asë kö hnine la tusi hna ewathe celë.
31 Ngo hna cinyihane la itre ewekë celë matre tro nyipunieti a jelenyipicine ka hape, Iesu hi la Keriso, lo Nekö i Akötresie. Nge hnene la mejiun, tro hë nyipunieti a kapa la mele ngöne la ëje i nyidrë.
