Ioane 21:1-25
21 Thupene lai, hnei Iesu hmaca hna iamamanyi kowe la itretre dreng ngöne la hnagejë ne Tiberia. Hane hi la aqane trongene la nyidrëti a iamamany.
2 E cili la itretre dreng, ene Simona Peteru, me Toma (lo hna hëne ka hape, Fini), me Nathaniela qaa Kana e Galilaia, me lue nekö i Zebedaio, me lue xa atre dreng.
3 Öni Simona Peteru: “Eni a troa nyi ie.” Matre öni angatr: “Easa ce tro.” Haawe, angatr a ce tro pi me elë hune he, ngo pë kö ca tha i angatr ngöne la jidri ka pexej.
4 Ame hë e kaqa ne lai, hnei Iesu hna cil ngöne la hnangöni, ngo tha hna wangatrehmekunyi nyidrëti kö hnene la itretre dreng.
5 Thupene lai, öni Iesu koi angatre ka hape: “Ha neköng, pëkö* tha i nyipunie?” Sa jë hi angatr ka hape: “Pëkö!”
6 Öni nyidrë: “Nue pi la ifile i nyipunie ngöne la götrane maca ne la he, nge tro lai a hetre tha i nyipunie.” Ame hnei angatre hna nue pi la ifile, nge thatreine hmaca kö angatre hule ke tiqa catre pala ha hnei i.
7 Nge hnene lo atre dreng hna hnime catrën hnei Iesu hna qaja koi Peteru ka hape: “Joxu hi lai.” Nge ame ju hi la Simona Peteru a drenge ka hape, Joxu lai, angeic a canga heetrëne pi lo iheetre ka qea i angeic, ke ka cile xöe* angeic, nge angeic a sesë pi kowe la hnagejë.
8 Ngo hnene pë hë la itre xa atre dreng hna bëeke fë la he, me hule trongëne lai ifile ka tiqa hnei i, ke tha nanyi kö angatr qa ngöne la ngönegejë a tha traqa kö koi 100 lao met.*
9 Nge ame ju hi la angatr a traqa ngöne la hnangöni, traqa ju hi angatr a öhne la itre ie me falawa hna dreuth hune la itre wanalep.
10 Öni Iesu jë hi: “Pane awe jë la itre xa ie hnei nyipunieti hna ea.”
11 Matre, Simona Peteru a elë jë hune he me hule la ifile ka tiqa hnei i, a traqa koi 153. Nge ngacama tiqa catre hnei i, ngo tha thöne ju kö lai ifile.
12 Öni Iesu jë hi: “Trohemi ma xen.” Nge pëkö ala casi ka pi hnyinge ka hape: “Drei nyipë?” Ke atre hnyawa hi angatre ka hape, Joxu hi lai.
13 Iesu a tro pi troa xome la falawa, me hamë angatr, nge nyidrëti a kuca tune mina fe kowe la ie.
14 Nge celë hi hnaakönine mama i Iesu kowe la itretre dreng, thupene lo kola amele nyidrë qaa hna mec.
15 Ase jë hi angatr xen, hnyinge jë hi Iesu koi Simona Peteru ka hape: “Simona nekö i Ioane, eö kö a hnimi ni hune itre eje la?” Sa jë hi angeic ka hape: “Öö Joxu, atre hi nyipë laka, eni a hnimi nyipë.” Öni nyidrëti jë hi: “Nga thuane jë la itre neköi mamoeng.”
16 Nge nyidrëti a alua hnyinge jë koi angeic ka hape: “Simona nekö i Ioane, eö kö a hnimi ni?” Sa hmaca jë hi angeice ka hape: “Öö Joxu, atre hi nyipë laka, eni a hnimi nyipë.” Öni nyidrëti jë hi: “Nga tro xome hnyawa jë la itre neköi mamoeng.”
17 Nge nyidrëti a akönia hnyinge hmaca ju koi Peteru ka hape: “Simona nekö i Ioane, eö kö a hnimi ni?” Hace pi hi la hni Peteru pine Iesu akönia hnyinge koi angeic ka hape: “Eö kö a hnimi ni?” Matre öni angeic: “Joxu, pëkö ewekë ka tha mama koi nyipë, nge atre hnyawa hi nyipëti ka hape, eni a hnimi nyipë.” Haawe, öni Iesu hmaca jë hi: “Ithuane jë la itre neköi mamoeng.
18 Nyipici, eni a qaja hnyawa koi eö, ame lo co pala kö eö, ka heetre casi eö nge eö a trongëne la sipu jë i eö, ngo ame hë la eö a qatr, tro eö a xejë la lue ime i eö, nge tro ketre a heetrë eö, me xometrongë eö kowe la götran hnei eö hna xele ma tro kow.”
19 Nyidrëti a qaja lai, matre mama pi koi Peteru la aqane tro angeic a mec me atrunyi Akötresie. Thupene lai, nyidrëti a qaja jë koi angeic ka hape: “Catre pi eö xötrethenge ni.”
20 Peteru a thaujë jë, me öhne lo atre dreng hnei Iesu hna hnime catrën, kola ixötrethenge. Kolo atr ka qalëne la imano i Iesu ngöne lo angatr a xeni hej, ene lo ka hnyinge ka hape: “Joxu drei la atr ka troa salemë nyipë?”
21 Matre ame ju hi la Peteru a öhnyi angeic, hnei Peteru hna hnyinge koi Iesu ka hape: “Nge ame pë hë angeice la ke?”
22 Sa jë hi Iesu ka hape: “Maine eni a ajane tro angeic a mel uti hë la tro ni a traqa, ke kolo pena a uë eö? Ngo ame eö, catre pi pe xötrethenge ni.”
23 Qa ngöne lai, kola ha iqajakeun nyipine la itre trejin ka hape, tha tro kö la atre drenge cili a hane mec. Ngo tha hnei Iesu kö hna qaja ka hape, tha tro kö angeic a mec, ngo öni nyidrëti pe: “Maine eni a ajane tro angeic a mel uti hë la tro ni a traqa, ke kolo pena a uë eö?”
24 Nge hna anyipicine lai hnene la atre drenge cili, nge angeic la atre cinyihane lai, nge atre hi së laka, nyipici hi la hnei angeice hna qaja.
25 Ngo eje hi laka, nyimutre catre pala kö la itre ewekë hnei Iesu hna kuca, nge maine tro së a cinyihane asë, eni a mekun, ma tha ijije kö la fen troa qatreng asë la itre tusi hna ewath.
Itre mekun ecahu fen
^ Maine, “pëkö ie.”
^ Maine, “ka heetrëne hi la iheetr ka he hnin.”
^ Kola easenyi koi 90 met. Ger., “kola easenyi koi 200 lao kubit.”
