Ioane 3:1-36
3 Nge hetre ketre Faresaio, Nikodremo la ëjen, angeice la ketre trene mus e Iudra.
2 Hnei angeic hna tro e jidr troa wai Iesu me qaja koi nyidrë ka hape: “Rabi, atre hi huni laka, hna upi nyipë hnei Akötresie troa Atre Ini, ke pëkö ka atreine kuca la itre iamamanyikeu hnei nyipëti hna kuca, e tha qaathei Akötresieti kö.”
3 Öni Iesu jë hi: “Nyipici, eni a qaja hnyawa koi eö ka hape, e tha tro kö a hnahone hmaca* la atr, tha ijiji angeice kö la Baselaia i Akötresie.”
4 Ngo öni Nikodremo jë hi ka hape: “Tro hmaca a hnahone tune kaa la atr nge ka tru hë? Ke tha ijiji angeice kö troa lö hmaca kowe la hni i thin matre hnahone hmaca pi?”
5 Sa jë hi Iesu koi angeice ka hape: “Nyipici, eni a qaja hnyawa koi eö, tha ijije kö tro la ketre atr a lö kowe la Baselaia i Akötresie, e tha hna pane hnaho angeice hnei tim me ua.
6 Ke ame la hna hnahon hnei ngönetrei, tre ngönetrei, nge ame la hna hnahon hnei ua, tre, ua.
7 The sesëkötre kö la eni a qaja koi eö ka hape: Nyipiewekë troa hnaho nyipunieti hmaca.
8 Kola hnahna la enyi ngöne la nöjei jë i nyën, nge drei mejene hi eö, ngo thatre pe eö ka hape, ka qaa kaa, nge kola tro ië. Haawe, ceitune hi lai memine la itre hna troa hnahone hmaca hnei ua.”
9 Ngo hnyinge hmaca jë hi Nikodremo ka hape: “Troa traqa tune kaa la itre ewekë cili?”
10 Sa jë hi Iesu ka hape: “Eö la ketre Atre Ini e Ierusalema ngo thatre kö eö la itre ewekë cili?
11 Nyipici, eni a qaja hnyawa koi eö ka hape, eahuni a ithanatane la hne huni hna atre, nge eahuni fe a anyipicine la itre ewekë hne huni hna öhn, ngo tha kapa kö nyipunie la hne huni hna anyipicin.
12 Nge maine tro ni a qaja koi nyipunie la itre ewekë ne fen, nge tha mejiune kö nyipunie, haawe, nga tro nyipunie a mejiune tune kaa kowe la itre ewekë ne hnengödrai?
13 Ketre, pëkö atr ka hane elë hnengödrai eë, ngo casi hi la atre uti qaa hnengödrai, ene la Nekö i Atr.
14 Nge tune lo Mose a athipe la un ngöne la hnapapa, tro fe a athipe tune la Nekö i Atr.
15 Qa ngöne lai, tro hë la itre ka mejiune koi nyidrë a kapa la mele ka pë pun.
16 Ke atraqatre la ihnimi Akötresie kowe la fen, matre hnei nyidrëti hna upe la Nekö hnimina i nyidrë ka cas, matre tha tro kö a meci la atre amamane la lapaune i angeic kowe la Nekön, ngo tro pe a hetrenyi la mele ka pë pun.
17 Ke tha hnei Akötresieti kö hna upe la Nekö i nyidrë kowe la fen göi troa amekötin ej, ngo matre tro pe a hetre iamele jëne la Nekön.
18 Ame la atre amamane la lapaune i angeic, tha tro kö a ameköti angeic. Ngo ame la atre ka tha amamane la lapaune i angeic, ase hë lai ameköti angeic, pine angeice tha amamane la lapaune i angeic kowe la ëje ne la Nekö hnimina i Akötresie.
19 Nge hane hi la trepene la iameköti: Hna traqa la lai kowe la fen, ngo hnyapa kö la jidr kowe la itre atr, ke ngazo la itre huliwa i angatr.
20 Ke ame la atre kuca la itre huliwa ka ngazo, tre ka methinëne la lai, me ananyine la lai, matre tha tro kö a mama la itre huliwa i angeic.
21 Ngo ame la atre kuca la itre huliwa ka nyipici, tre ka tro kowe la lai, matre mama jë laka, itre huliwa hna kuca thenge la aja i Akötresie.”
22 Thupene lai, hnei Iesu me itretre drei nyidrë hna tro kowe la itre götran e tröne la traon e Iudra, nge e cili, hnei nyidrëti hna pane lapa me angatr, me bapataisone la itre atr.
23 Nge Ioane mina fe a bapataisone la itre atr e Ainon, easenyin e Salim, ke tru hnei tim e cili, nge itre atr pala hi a traqa me xomi bapataiso.
24 Nge tha hna akalabusi Ioane petre kö.
25 Ame hnene la itretre drei Ioane hna iwesitrë memine la ketre atre Iudra, pine la itre hna amekötin göi aqane ahmitrötrë ewekë.
26 Angatr a tro ju koi Ioane me hape: “Rabi, ame lo atr ka ce me nyipë ngöne la ketre götrane la hneopegejë Ioridrano, lo atr hnei nyipëti hna anyipicin, angeice fe a hane bapataiso atr, nge ala nyimu la itre ka tro koi angeic.”
27 Sa jë hi Ioane ka hape: “Thatreine kö la atr kapa la ketre ewekë e tha hna hamëne kö qaa hnengödrai.
28 Nge drenge hi nyipunieti lo eni a qaja ka hape, ‘Tha Keriso kö ni, ngo hna upi ni pe qëmeke i nyidrë.’
29 Nge nyipici, eje thene la atre xötrei faipoipo la föi angeic. Ngo ame la sinee ne la atre xötrei faipoipo, angeic a mejë me madrin la kola drenge la aqane ewekë ne la atre xötrei faipoipo. Celë hi matre pexeje hë la madrineng.
30 Nge tro nyidrëti a draië, nge tro pena ni a patre trootro.”
31 Ame la atre uti qaa hnengödrai, tre, ka draië kö hune la nöjei atr asë. Nge ame la atr ka qaa la fen, tre, kola ithanatane la itre ewekë ne fen. Ngo ame la atre ka qaa hnengödrai, tre, ka draië kö hune la nöjei atr asë.
32 Nyidrëti a anyipicine la itre ewekë hnei nyidrëti hna öhne me dreng, ngo pëkö atr ka kapa.
33 Nge ame la atre kapa la maca cili, angeic a jelenyipicine laka, thei Akötresie la nyipici.
34 Nge ame la atre hnei Akötresieti hna up, angeic a qaja la itre trengewekë i Akötresie, ke Nyidrëti a hamën atrune* la ua.
35 Haawe, Kem a hnimi Nekön, matre nyidrëti a nue la nöjei ewekë kowe la iwanakoime ne la Nekön.
36 Nge ame la atre amamane la lapaune i angeic kowe la Nekön, tro hë angeic a kapa la mele ka pë pun, ngo ame la atre tha drengethenge la Nekön, tha tro kö angeic a hane öhne la mel, ngo tro kö a eje thei angeic la elëhni i Akötresie.
