Ioane 4:1-54
4 Ame hë la kola dreng hnene la Joxu laka, atre hë la itre Faresaio ka hape, tru catre hë la itretre drei nyidrë, nge ala nyimu kö la itre hnei nyidrë hna bapataison hui Ioane—
2 ngacama tha nyidrëti kö la ka bapataiso atr, ngo itretre drei nyidrë—
3 nyidrëti a feke pi qaa Iudra a tro Galilaia.
4 Ngo nyipiewekë koi nyidrë troa Samaria thenge.
5 Ame hnei nyidrëti hna tro ju kowe la ketre traon e Samaria, hna hëne ka hape, Sikara, easenyine lo hlapa hna hamën hnei Iakobo koi Iosefa nekö i angeic.
6 Nge e cili hi la timi hna kuj hnei Iakobo. Nge pine laka, kucakuca catre Iesu hnene la hna tro, nyidrëti a pane lapa ju e cili, hmekune lo hnaasikisine* hawa.
7 Ame hna traqa pi la ketre föe ne Samaria troa jöe tim, matre öni Iesu koi angeic: “Pane thue imeng.”
8 (Itretre drenge hë ngöne la traon troa itö xen)
9 Matre önine lai föe koi nyidrë ka hape: “Hnauëne kö laka, atre Iudra eö, nge eö a sipo timi koi ni, föe ne Samaria?” (Ke ka imethinë la angetre Iudra me angetre Samaria.)
10 Sa jë hi Iesu ka hape: “Maine atre ju eö la ahnahna hna hamëne gufan hnei Akötresie, memine la atre qaja koi eö ka hape, ‘Pane sipo imeng,’ eö la ka troa sipo angeic, nge tro hë angeic a hamë eö la timi ne mel.”
11 Önine jë hi lai föe: “Joxu, pëkö baketre i nyipë troa tha tim, nge ka jui cahu. Nga tro nyipëti a jöe ekaa la timi ne mel?
12 Hapeu, ka sisitria kö nyipë hui Iakobo qaaqaa hun? Hnei nyidrëti hna hamë huni la timi hna kuj celë, ene lo hnei nyidrë me itre nekö i nyidrë, me itre öni i nyidrë hna iji qa ngön.”
13 Sa jë hi Iesu koi angeic ka hape: “Ame la atre iji qaa ngöne la timi celë, tro hmaca kö angeice lai a pi ij.
14 Ngo ame la atre iji qaa ngöne la tim hnenge hna troa hamën, tha tro hmaca kö angeice lai a hane pi ij, nge tro la timi cili a tune la qeqe ne tim ka neni lapa thei angeic, nge ka hamë mele ka pë pun.”
15 Önine jë hi la föe ka hape: “Joxu, nga thue imenge hö la timi cili, matre tha tro hmaca kö ni a hane pi ij, me traqa lapa troa tha tim.”
16 Öni nyidrëti koi angeic: “Tro jë a hëne la föi eö, nge ce traqa pi epon.”
17 Sa jë hi la föe ka hape: “Pëkö föeng.” Öni Iesu jë hi koi angeice ka hape: “Nyipici la hnei eö hna qaja, pëkö föi eö.
18 Ke hnei eö hna föene la faifi lao trahmany, ngo ame la trahmanyi eö enehila, tre tha föi eö kö. Celë hi matre, trenge nyipici hi la hnei eö hna qaja.”
19 Önine la föe ka hape: “Joxu, mama hi ka hape, perofeta nyipë.
20 Hnene la itre qaaqaa huni hna nyihlue i Akötresie ngöne la wetre celë, ngo önine pe la angetre Iudra ka hape, e Ierusalema hmekuje hi la hnë hmi koi nyidrë.”
21 Öni Iesu jë hi: “Föe fe, mejiune ju koi ni, ke tro ha traqa la ijin laka, tha tro hmaca kö nyipunieti a nyihluene la Kem ngöne la wetre celë, maine e Ierusalema.
22 Thatre kö nyipunie la hnei nyipunie hna nyihlue kow, ngo atre hi huni la hne huni hna nyihlue kow, ke kola nyiqaane la iamele thei angetre Iudra.
23 Nge ketre, easenyi hë la hawa nge enehila hi, tro la itre nyipi hlu a nyihlue i Akötresie* cememine la u me nyipici, ke Akötresieti a thele la itre atr ka tun göi troa nyihlue i nyidrë.
24 Ame Akötresie tre, ketre U,* matre ame la itre ka nyihlue i nyidrë, tro angatr a nyihlue i nyidrë thenge la uati hmitrötr me nyipici.”
25 Önine jë hi la föe ka hape: “Atre hi ni laka, tro la Mesia a traqa, lo hna hëne ka hape, Keriso. Nge e traqa ha nyidrë, tro hë nyidrëti a fe amamane hnyawa koi së la nöjei ewekë asë.”
26 Öni Iesu: “Eni hi la atre cili.”
27 Ase jë hi, traqa pi hi la itretre dreng, nge angatr a isa sesëkötr laka, nyidrëti a ithanata memine la ketre föe. Ngo eje hi laka, pëkö ala casi ka pi hnyingë nyidrë la kepin matre nyidrëti a ithanata me angeic, maine ewekë hnei nyidrëti hna ajan.
28 Ame hnene la föe hna nue la trengene tim i angeic, me tro kowe la traon, me qaja trongëne kowe la itre atr ka hape:
29 “Trohemi nyipunie ma hane wange la ketre atr ka qaja asë la itre ewekë hnenge hna kuca. Ma nyidrëti hi la Keriso?”
30 Haawe, angatr a tro pi qa ngöne la traon, me tro koi nyidrë.
31 Nge ngöne la ijine cili, itretre dreng a iele nyidrë me hape: “Rabi, xeni jë.”
32 Öni nyidrëti jë hi: “Hetre ange kö, ngo thatre kö nyipunie.”
33 Nge itretre dreng a ihnyingënekeune jë ka hape: “Drei la ka thue a i nyidrë?”
34 Sa jë hi Iesu koi angatr ka hape: “Ange la troa kuca la aja ne la atre upi ni, me afenesine la huliwa i nyidrë.
35 Hapeu, tha öni nyipunieti kö lo ka hape, foa pe hi lao treu matre nyiqaane jë la ijine menu? Hanawang! Eni a qaja hnyawa koi nyipunie, goeëne la hlapa, ijine tro ha menuën. Nge kolo ha
36 kepe thupen hnene la atre menuë hlapa, me xawane la itre wen thatraqane la mele ka pë pun, matre tro la atre jumi feja me atre menuë hlapa a ce madrin.
37 Nge kolo hi a anyipicine lo hna qaja hnei trengewekë ka hape: Hetre atre jumi feja, nge hetre atre menuë hlapa.
38 Hnenge hna upi nyipunie troa menuëne la itre ewekë tha hnei nyipunieti kö hna huliwan. Hnei itre xan hna huliwa catr, ngo nyipunieti la angetre kepe thupen la huliwa i angatr.”
39 Ala nyimu la angetre Samaria qa ngöne la traone celë ka lapaune koi nyidrë, jëne lo hna anyipicine hnene lo föe ka hape: “Hnei nyidrëti hna qaja asë la itre ewekë hnenge hna kuca.”
40 Matre ame hë la kola traqa koi nyidrë hnene la angetre Samaria, angatr a sipo nyidrëti jë troa pane lapa me angatr, haawe, nyidrëti a lapa ju e cili koi lue drai.
41 Qa ngöne lai, ala nyimu catre hmaca kö la itre atr ka lapaune koi nyidrë jëne la itre trenge ithanata i nyidrë.
42 Matre angatr a qaja ju kowe lai föe ka hape: “Tha eahuni hmaca kö a lapaune pine la itre trenge ithanata i eö; ngo ketre drenge fe hë hun, nge xecie fe hë koi huni laka, nyidrëti hi la atre amelene la fen.”
43 Thupene la lue drai, nyidrëti a tro pi Galilaia eë.
44 Ngo ase hë Iesu lo qaja ka hape, tha hna kapa kö la perofeta ngöne la sipu zi angeic.
45 Nge ame hë la nyidrëti a traqa e Galilaia, hnene la angetre Galilaia hna kepe nyidrë, ke hnei angatre lo hna sipu öhne la nöjei ewekë hnei nyidrëti hna kuca e Ierusalema, hmekune lo ijine feet.*
46 Ame hnei nyidrëti hna bëek a tro Kana e Galilaia, lo traon hnei nyidrëti hna saze lo tim koi waina. E cili fe la ketre atre i joxu, nge ka wezipo la nekö i angeic e Kaperenauma.
47 Nge ame hë la angeic a drenge laka, hnei Iesu hna feke qaa Iudra a tro Galilaia, angeic a tro ju koi nyidrë me sipo nyidrë troa ce tro me angeic, matre aloine la nekö i angeic, ke ka tro hë nyën a mec.
48 Ngo öni Iesu koi angeice ka hape: “Ngacama kuca ju hë ni la itre iamamanyikeu me itre ewekë nyine hain, ngo tha tro kö a mejiune la itre atr thei nyipunie.”
49 Önine jë hi lai atre i joxu ka hape: “Joxu, canga trohemi, ke wanga meci pi la neköng.”
50 Öni Iesu koi angeic ka hape: “Tro jë hë, mele hë la nekö i eö.” Canga mejiune ju hi lai atr kowe la hna qaja hnei Iesu, matre angeic a tro ju.
51 Nge angeice pala kö ngöne la gojeny, ame hnei angeice hna ixelë memine la itre hlue i angeic ka traqa troa ithuemacany ka hape, mele* hë la nekö i angeic.
52 Matre angeic a hnyingëne jë la hawa ne loi hmaca la nekö i angeic. Sa jë hi la itre hlue ka hape: “Eidr, ngöne lo hnaasevenene* hawa, patre ju hi la idreuthi nyën.”
53 Nge kolo hi a atrehmekun hnei kem ka hape, kolo hnyawa hi lo hawa ne qaja Iesu koi angeice ka hape: “Mele hë la nekö i eö.” Ame hnei angeic, me hnepe lapa i angeic asë hna mejiune koi Iesu.
54 Nge celë hi hnaaluene iamamanyikeu i Iesu lo nyidrëti a feke qaa Iudra a tro Galilaia.
Itre mekun ecahu fen
^ Easenyin e midi.
^ Ger., “Kem.”
^ Maine, “hna tha öhn.”
^ Ma kolo ijine Paseka.
^ Maine, “egöcatr.”
^ Easenyin e 1:00 e hnaipajö.
