Ioane 5:1-47
5 Thupene lai, hetre ketre feet thei angetre Iudra, matre Iesu a tro ju Ierusalema eë.
2 Nge ame e cili, hmekune lo Hnë Lö i Itre Mamoe, hetrenyi la ketre hnë si* hna hën qene heberu ka hape, Betheseda, nge hetrenyi fe la faifi lao ikapa.
3 Ala nyimu la itre atr e cili hna tithe hnei mec, itre timek, me ka genyi ca, me itre ka fitre im, me itre ka fitre ca.
4 ——
5 Nge e cili fe la ketre trahmanyi ka wezipo, a traqa ha koi 38 lao macatre.
6 Nge ame hë la Iesu a öhne la trahmanyi e meköl me atrehmekune laka, ekö hë tithi angeic hnei mec, öni nyidrë: “Pi tro kö eö a hane egöcatr?”
7 Sa jë hi lai atr koi nyidrë ka hape: “Joxu, pëkö ka hane xomi ni kowe la tim e kola emuemu, nge ame la eni a ketre sipu tro, ketre a thipatrë ni.”
8 Öni Iesu jë hi: “Mejë jë, nge xome jë la ili i eö, nge tro jë.”
9 Ame hna loi pi hi lai atr, matre angeic a xome pi la ili angeic, me tro.
Nge drai Sabath la drai cili.
10 Ame hnene la itretre Iudra hna qaja kowe la atre hna aloine ka hape: “Drai Sabathi la, hmitrötre tro eö a ajöne trongëne la ili eö.”
11 Sa jë hi angeice ka hape: “Ke hnene lo atre aloinyi ni hna upi ni ka hape: ‘Xome jë la ili i eö, nge tro jë.’ ”
12 Hnyinge jë hi angatr ka hape: “Drei la ka upi eö troa xome la ili me tro’?”
13 Ngo thatre Iesu kö hnene lai atr, nge lö hë nyidrë nyipine la ka ala nyim.
14 Thupene lai, öhnyi angeice hmaca ju hi hnei Iesu hnine la uma ne hmi, matre öni nyidrë: “Hanawang, loi hë eö. Haawe, the kuca hmaca kö la ngazo, matre tha tro hmaca kö a traqa la jole koi eö.”
15 Ame hnene lai atr hna tro ju me qaja kowe la itretre Iudra ka hape, Iesu la ka aloinyi angeic.
16 Qa ngöne lai, itretre Iudra a nyiqaane thele troa akötrë Iesu, pine nyidrë kuca la itre huliwa cili ngöne la drai Sabath.
17 Ngo sa jë hi Iesu koi angatr ka hape: “Hnene pala hi la Kemeng hna huliwa uti hë enehila, nge tro pala hi ni a huliwa.”
18 Haawe, celë hi kepin matre tha mano kö angetre Iudra thele troa humuthi nyidrë, ngo tha hnene hmekuje kö la hna tha metrötrëne la Sabath, ngo hnene fe la hna hë Akötresie ka hape, Kaka, matre kola aceitunë nyidrë me Akötresie.
19 Matre sa jë hi Iesu ka hape: “Nyipici, eni a qaja hnyawa koi nyipunie, thatreine kö la Nekön troa kuca xanëne la ketre ewekë, ngo thenge hi la hnei angeic hna goeëne la hna kuca hnei Kem. Ke ame la nöjei ewekë hna kuca hnei Kem, celë fe hi hna kuca hnei Nekön.
20 Nge Kem a hnime la Nekön, matre nyidrëti a amamai angeic la nöjei huliwa i nyidrë, nge tro pala kö nyidrëti a amamai angeic la itre huliwa ka tru catre kö, nge tro hë nyipunieti a hain.
21 Ke tune la aqane amelene hmaca hnei Kem la itre ka mec, tro fe la Nekön a hane amelene la itre hnei angeic hna ajan.
22 Nge tha Keme kö la ka amekötine la atr, ke ase së hë nyidrëti nue la iameköti kowe la Nekön,
23 matre tro la nöjei atr a atrune la Nekön tune la aqane atrune la Kem. Haawe, ame la atr ka tha atrune la Nekön, ketre tha angeice kö lai a atrune la Kem, lo Atre upe la Nekön.
24 Nyipici, eni a qaja hnyawa koi nyipunie, ame la atre drenge la itre trengewekëng, me mejiune kowe la Atre upi ni, hetrenyi hë angeic la mele ka pë pun. Ketre, tha tro kö a ameköti angeic, ngo ase hë thepe angeic qa ngöne la mec kowe la mel.
25 “Nyipici eni a qaja hnyawa koi nyipunie, easenyi hë la hawa nge enehila hi, tro la itre ka mec a drenge la aqane ewekë ne la Nekö i Akötresie, nge tro hë la itre ka dreng a mel.
26 Thei Keme la atreine troa hamë mel, nge nyidrëti fe a aijijëne la Nekön troa hane hamë mel.
27 Nge nyidrëti a nue kowe la Nekön troa iameköti, ke angeice hi la Nekö i Atr.
28 The sesëkötre kö, ke easenyi hë la hawa ne tro la itre ka meköl hnine la itre hua ne amekunën, a drenge la aqane ewekë i angeic
29 me lö pi. Troa amelene hmaca la itre ka kuca la loi kowe la mel, me itre ka kuca la ngazo kowe la iameköti.
30 Thatreine kö ni kuca xanëne la ketre ewekë. Ngo thenge pe la hnenge hna dreng, eni a ameköti ewekë, nge ka meköti pala hi, ke tha eni kö a kuca la mekunang, ngo eni pe a thele la aja ne la atre upi ni.
31 “Nge maine eni casi hi la atre anyipici ni, haawe, tha nyipici kö la hnenge hna qaja.
32 Ngo hetre ketre atre anyipici ni, nge atre hi ni laka, ka nyipici hi la hnei angeic hna qaja göi ni.
33 Hnei nyipunieti lo hna upe la itre atr koi Ioane, nge hnei angeic hna catre anyipicine la nyipici.
34 Ngo eje hi laka, tha nyipiewekë kö koi ni troa hetre ka anyipicin, ngo eni hi a qaja lai matre mele jë fe nyipunie.
35 Ceitu i Ioane me ketre laame ka mele me hudrum, nge ngöne la ketre hnepe ijin, hnei nyipunieti hna kapa madrine la lai i angeic.
36 Ngo sisitria kö la nyine tro ni a anyipicin hui Ioane, ke ame la itre huliwa hna ahnithe koi ni hnei Kaka, itre huliwa lai hnenge hna eatrën, nge ka anyipicine laka, hna upi ni hnei Kaka.
37 Nge hnei Kaka Atre upi ni, hna ketre sipu anyipici ni. Ngo tha hane fe kö nyipunieti drenge la nine ithanata i nyidrë, me öhne la iqëmeke i nyidrë.
38 Nge tha lapa kö la itre trengewekë i nyidrë thei nyipunie, ke tha kapa kö nyipunieti la atr hna upe hnei nyidrë.
39 “Nge nyipunieti a sine thele la itre hna Cinyihan, ke ame la mekuna i nyipunie, tro lai* a aijijë nyipunie troa kapa la mele ka pë pun; ngo itre eje pe a anyipici ni.
40 Nge maine ju, tro hi nyipunieti a mel, ngo enehila, xele nyipunie ma tro koi ni.
41 Ketre, xele ni ma kapa la iatrunyi qaathei atr,
42 ngo atre hnyawa hi ni laka, pëkö ihnimi Akötresie thei nyipunie.
43 Hnenge hna traqa ngöne la ëje i Kaka, ngo tha kepe ni kö hnei nyipunie. Ngo maine tro la ketre atr a traqa ngöne la sipu ëje i angeice kö, tro hë nyipunieti lai a kepe angeic.
44 Nge tro nyipunieti a mejiune tune kaa, nge nyipunieti pena a thele la iatruny qaathei atr, ngo tha qaathene la Akötresieti ka cas?
45 Nge the mekune kö ka hape, eni la ka troa nyizö nyipunie koi Kaka; ke casi hi la ka nyizö nyipunie, ene Mose, lo atr hnei nyipunieti hna mejiune kow.
46 Nge maine ka mejiune ju nyipunie koi Mose, tro fe nyipunie a hane mejiune koi ni, ke hnei Mose lo hna cinyihan göi ni.
47 Ngo maine tha mejiune kö nyipunie kowe la itre hnei angeic hna cinyihan, nga tro nyipunieti a mejiune tune kaa kowe la itre trengewekëng?”
