Ioane 6:1-71
6 Thupene lai, hnei Iesu hna ea pi ngöne la Hnagejë Ne Galilaia, ene lo hna hëne ka hape, Tiberia.
2 Nge kolo pala hi a xötrethenge nyidrë hnene la ka ala nyim, ke hnei angatre hna öhne la itre iamamanyikeu i nyidrë göi troa aloine la itre trene mec.
3 Matre Iesu a elë jë kowe la ketre wetr, me pane lapa e cili memine la itretre dreng.
4 Nge easenyi hë matre feetëne jë la Paseka, ene lo feete i angetre Iudra.
5 Nge ame hë la Iesu a goeën e gaa nany, me öhne la ka ala nyimu a kola traqa koi nyidrë, öni nyidrëti jë hi koi Filipo: “Tro sa itö falawa ekaa koi angatr asë la?”
6 Ngo nyidrëti pe a qaja lai matre troa pane tupathi angeic, ke atre kö nyidrëti la hnei nyidrëti hna troa kuca e thupen.
7 Sa jë hi Filipo ka hape: “Maine itö falawa ju së memine la lue hadredre lao drenari,* tha ijije kö troa hamë isa ca falawa i angatr.”
8 Önine jë hi la ketre atre dreng, Anederea, ene lo trejine me Simona Peteru, ka hape:
9 “The së la ketre nekönatr trahmany, nge hetrenyi nyëne la faifi lao falawa* me lue neköi i. Ngo nemene lai nge ala nyimu pe së?”
10 Öni Iesu jë hi: “Upe jë la itre atr troa ilapany.” Nge ka cia hnyawa la haö e cili, matre itre atr a ilapanyi ju, nge hna e la 5 000 lao trahmany.
11 Iesu a xome jë la falawa, nge ase jë hi nyidrëti thith, nyidrëti a thawa pi kowe la itre ka lapa e cili, nge nyidrëti a kuca tune ju fe kowe la neköi ie, matre meji ju hi la itre atr.
12 Nge ase jë hi angatre xeni hnyawa, nyidrëti a qaja ju kowe la itretre dreng ka hape: “Hleme hnyawane jë la itre munën, matre tha tro kö a luz.”
13 Angatr a hleme ju la itre munëne me nyialiene la 12 lao treng, ene lo itre munën qaathene lo itre ka xeni lo faifi lao falawa.
14 Matre ame hë la kola öhne la iamamanyikeu cili, hnene la ka ala nyimu hna qaja ka hape: “Nyidrëti hnyawa hi lo perofeta ka troa traqa kowe la fen.”
15 Thupene lai, wangatrehmekune jë hi Iesu laka, tro angatr a xomi nyidrë me acili joxu nyidrë, matre nyidrëti a canga kötre pi me lapa casi hune la wetr.
16 Nge e hejiheji hë, hnene la itretre dreng hna uti hmaca kowe la hneopegejë.
17 Angatr a elë jë hune he, me nyiqaane ea Kaperenauma eë. Ngo heji hë, nge tha traqa pala kö Iesu koi angatr.
18 Ame hna nyiqaane catre la gejë ke hnahna catre la eny.
19 Nge thupene la faifi maine sikisi lao kilomet ne ea angatr, angatr a öhnyi Iesu e tro hune la tim, matre angatr a easenyine jë la he koi nyidrë. Ame hnei angatr hna nyiqaane xou.
20 Ngo öni nyidrë koi angatr: “The xou kö, ke eni hi!”
21 Matre hmala pi la itre hni angatr troa ati nyidrë hune he, nge tha qea kö e thupen, qale pi la he ngöne la götran hnei angatre hna tro kow.
22 Ame la drai thupen, hnene la ka ala nyim, ene lo itre ka lapa pe ngöne la ketre götrane la hneopegejë hna öhne laka, casi pe hi la neköi he. Ketre, öhne fe hi angatre lo ka hape, tha hane fe kö Iesu ce elë hune he me itretre dreng, ngo angatre hmekuje hi.
23 Ame hna traqa pi la itre he qaa Tiberia, me qale ezine lo götran hnei angatr hna xeni lo falawa hna thithi fë hnei Joxu.
24 Matre angatr a tro ju kowe lai, ngo patre kö Iesu me itretre dreng. Ame hnei angatr hna elë jë hune la itre neköi he, me ea Kaperenauma eë troa thele Iesu.
25 Nge ame hë la angatr a öhnyi Iesu ngöne la ketre götrane la hneopegejë, öni angatr: “Rabi, traqa nyipëti eue e celë?”
26 Sa jë hi Iesu ka hape: “Nyipici, eni a qaja hnyawa koi nyipunie, tha nyipunieti kö a thele ni pine la itre iamamanyikeu, ngo pine la hnei nyipunie hna xeni falawa me mej.
27 The huliwa kö thatraqane la falawa ka canga patr, ngo thatraqane la xeni ka hamëne la mele ka pë pun, ene la hna troa hamë nyipunie hnene la Nekö i Atr. Ke hna ati hatre i angeice hnei Kem, ene Akötresie, nyine amamane ka hape, hna kepe angeic hnei nyidrë.”
28 Öni angatre jë hi: “Ngo nemene kö la nyine tro huni a kuca matre eatrëne jë la huliwa i Akötresie?”
29 Sa jë hi Iesu koi angatre ka hape: “Huliwa i Akötresie troa amamane la lapaune i nyipunie kowe la atr hnei nyidrëti hna up.”
30 Ame hnei angatr hna qaja koi nyidrë ka hape: “Nemene la iamamanyikeu hnei nyipëti hna troa kuca matre öhne jë huni me mejiun? Nemene la huliwa hnei nyipëti hna troa kuca?
31 Ke ame hnine lo itre hna Cinyihan, hnene lo itre qaaqaa huni ekö hna xeni la mana ngöne la hnapapa, ke kola hape: ‘Hnei nyidrëti hna thue falawa i angatre qaa hnengödrai matre tro angatr a xen.’ ”
32 Öni Iesu jë hi: “Nyipici, eni a qaja hnyawa koi nyipunie, tha hnei Mose kö hna thue falawa i nyipunie qaa hnengödrai, ngo Kakati pe la ka hamë nyipi falawa koi nyipunie qaa hnengödrai.
33 Ke ame la falawa i Akötresie, tre ene la atr ka uti qaa hnengödrai nge ka amelene la fen.”
34 Matre öni angatre jë hi koi nyidrë: “Joxu, epi tro pala hi a hamë huni la falawa cili.”
35 Sa jë hi Iesu ka hape: “Eni hi la falawa ne mel. Ame la atre traqa koi ni, tha tro hmaca kö angeice lai a hane pi xen, nge ame la atre amamane la lapaune i angeice koi ni, tha tro hmaca kö angeice lai a hane pi ij.
36 Ngo tune lo hnenge hna qaja koi nyipunie, öhnyi ni hë hnei nyipunie ngo tha mejiune kö nyipunie.
37 Ame la nöjei atr hnei Kakati hna nue koi ni, tro hë angatr a xötrethenge ni, nge tha tro pi kö ni a helëne la atre traqa koi ni.
38 Ke tha uti kö ni qaa hnengödrai matre troa kuca la mekunang, ngo tro pe a kuca la aja ne la Atre upi ni.
39 Nge celë hi aja ne la atre upi ni, ene laka, tha tro kö ni a aluzine la mele ne la ketre atr hna nue koi ni, ngo tro pe ni a amele angatr asë elany.*
40 Ke aja i Kakati lai tro la nöjei atr a wangatrehmekune la Nekön, me amamane la lapaune i angatr koi angeic, matre kapa jë la mele ka pë pun. Nge tro hë ni a amele angatr elany.”
41 Ame hnene la angetre Iudra hna nyiqaane qeje nyidrë, ke öni nyidrëti lo ka hape: “Eni hi la falawa ka uti qaa hnengödrai.”
42 Ame hnei angatr hna nyiqaane qaja ka hape: “Tha Iesu kö angeic, lo nekö i Iosefa, nge atre hi së lo keme me thine i angeic? Ngo hnauëne kö la angeic a qaja ka hape: ‘Hnenge hna uti qaa hnengödrai?’ ”
43 Sa jë hi Iesu koi angatre ka hape: “Loi ju hë hnei nyipunie hna iqej.
44 Ke pëkö atr ka traqa koi ni e tha hna pane ee angeice kö hnei Kaka, lo Atre upi ni; nge tro hë ni a amele angeice hmaca elany.
45 Nge hna cinyihan ngöne la itre hna perofetan ka hape: ‘Troa ini angatr asë hnei Iehova.’* Matre ame la itre ka drenge la Kem, me kapa la ini i nyidrë, angatre hi la itre ka traqa koi ni.
46 Nge pëkö atr ka hane öhne la Kem, ngo hnene hmekuje hi la atre hna up hnei Akötresie. Angeice hi la atre öhne la Kem.
47 Nyipici, eni a qaja hnyawa koi nyipunie, ame la atre mejiun, tro hë angeic a kapa la mele ka pë pun.
48 “Eni hi la falawa ne mel.
49 Hnene la itre qaaqaa i nyipunie hna xeni la mana ngöne la hnapapa, ngo meci pi kö angatr.
50 Ngo ame la atre xeni la falawa ka uti qaa hnengödrai, tre tha tro pi kö angeice lai a hane mec.
51 Nge eni hi la falawa ne mel ka uti qaa hnengödrai. Nge maine tro la ketre a xeni la falawa cili, tro hë angeic a mel epine palua; ke ame la falawa hnenge hna troa hamën, tre, ngönetreing nyine amelene la fen.”
52 Thupene lai, hnene la angetre Iudra hna nyiqaane ihnyingënekeune ka hape: “A hnauëne la angeic a troa hamë së la ijöne i angeic matre tro sa öni?”
53 Matre öni Iesu jë hi koi angatr: “Nyipici, eni a qaja hnyawa koi nyipunie, pëkö mel thei nyipunie e tha pane öni kö nyipunie la ijön ne la Nekö i Atr, me iji la madra i angeic.
54 Haawe, ame la atre öni la ijöneng me iji la madrang, tre tro hë angeic a kapa la mele ka pë pun, nge tro ni a amele angeice hmaca elany.*
55 Nge nyipi xeni la ngönetreing, nge nyipi zane la madrang.
56 Nge ame la atre öni la ijöneng, me iji la madrang, ce angeice pala hi me eni, nge ce eni pala hi me angeic.
57 Hnei Kakati hna upi ni, nge eni a mele hnei nyidrë, nge ketre tun, ame la atre xeni qaatheng, tre tro angeic a mele hneng.
58 Haawe, falawa hi lai hna upe qaa hnengödrai. Ngo tha ka tune kö lo hna xeni hnei itre qaaqaa i nyipunie, matre meci kö angatr. Ke ame la atre xeni la falawa cili, tre tro angeic a mel epine palua.”
59 Hnei Iesu hna qaja lai ngöne lo nyidrëti a hamë ini hnine la sunago* e Kaperenauma.
60 Nge ame hë la kola drenge lai, ala nyimu la itretre drei nyidrë ka qaja ka hape: “Jole catre tro sa kapa la itre trenge ithanata i nyidrë. Drei la ka pi dreng?”
61 Ngo atre hnyawa hi Iesu laka, angatr a ithanatane lai, matre öni nyidrë: “Kolo kö a ajolëne la lapaune i nyipunie?
62 Ngo tune kaa ju hë e tro nyipunieti a öhne la Nekö i Atr a elë kowe lo göhne i angeic ekö?
63 Eje hi, qaathei ua la mel, ngo ka gufa la ngönetrei. Matre ame la itre trengewekënge koi nyipunie, tre qaathene la ua nyine mel.
64 Ngo hetre itre xan thei nyipunie ka tha mejiun.” Ke atre hnyawa hi Iesu ngöne la qaane la itre ka tha mejiun, memine la atre ka troa salemë nyidrë.
65 Öni nyidrëti hmaca: “Celë hi matre hnenge hna qaja koi nyipunie ka hape, pëkö atr ka troa traqa koi ni e tha hna pane ee angeice kö hnei Kaka.”
66 Qa ngöne lai, ala nyimu la itretre drei nyidrë ka bëeke hmaca kowe lo itre ewekë hnapan, me nuetriji nyidrë.
67 Ame hnei Iesu hna hnyinge kowe lo ala Truelof ka hape: “Nyipunieti fe a hane pi tro?”
68 Sa jë hi Simona Peteru ka hape: “Joxu, thei nyipëti la itre trengewekë ne mele ka pë pun, matre tro pe kö huni a tro ië?
69 Nge hne huni hna mejiun me kapa laka, nyipëti hi la Atre Ka Hmitrötre i Akötresie.”
70 Öni Iesu jë hi koi angatr ka hape: “Eni lo ka ië nyipunie ala Truelof, eje hi? Ngo hetre atre inyizö* thei nyipunie.”
71 Nyidrëti lai a qeje Iudra, lo nekö i Simona Isakariota, ke tro angeic a salemë nyidrë, ngacama angeice fe hi la ketre ne lo ala Truelof.
Itre mekun ecahu fen
^ Wange ju la HQP.
^ Falawa hna kuca hnei farin ka co thupen hune la farin ne qitr, nge a i ange pë ewekë.
^ Ger., “itre drai tixenuë.”
^ Wange ju la HQP.
^ Ger., “ngöne la itre drai tixenuë.”
^ Maine, “icasikeu ka tru.”
^ Maine, “diabolo.”
