Ioane 7:1-52
7 Thupene lai, hnei Iesu pala kö hna pane lapa e Galilaia, ke xele nyidrë ma tro Iudra, ke angetre Iudra a thele troa humuthi nyidrë.
2 Ngo easenyi hë matre xejë jë thei angetre Iudra la Feet Ne Ihmelekap.*
3 Ame hnene la itre jini nyidrë hna qaja ka hape: “Feke pi qaa la, nge tro jë e Iudra eë, matre hane jë fe öhne hnei itretre drei eö la itre iamamanyikeu hnei eö hna kuca.
4 Ke pëkö atr ka kuca la itre ewekë cili ngöne la gaa co e aja i angeic troa hlemu. Haawe, maine eö a kuca la itre ewekë cili, amamai eö jë kowe la fen.”
5 Ngo tha lapaune kö la itre jini nyidrë koi nyidrë.
6 Matre Iesu a sa jë ka hape: “Tha traemenge pala kö, ngo ame koi nyipunie, ka loi asë hi la nöjei ijin.
7 Nge pëkö kepin matre tro la fen a methinë nyipunie, ngo ej a methinë ni, ke eni a anyipicine laka, ngazo la itre huliwa ne ej.
8 Tro jë pe nyipunie kowe la feet, ngo tha tro kö ni a tro ke tha traemenge pala kö.”
9 Haawe, thupene la nyidrëti a ase qaja koi angatre la itre ewekë cili, lapa ju pe hi nyidrë e Galilaia.
10 Ngo ame hë la kola elë kowe la feet hnene la itre jini Iesu, nyidrëti a ixötrethenge ju me tro juetrë.
11 Matre hnene la itretre Iudra hna nyiqaane thele nyidrë ngöne la feet me hape: “Ekaa jë la atre cili?”
12 Nge nyimu ewekë hna qaja acon göi nyidrë hnene la ka ala nyim. Öni itre xan: “Ka lolo la atre ce.” Ngo öni itre xane pena: “Waea. Angeic a amenune la ka ala nyim.”
13 Ngo eje hi laka, pëkö atr ka qaja catrëne la mekuna i angatr göi nyidrë, ke xou i angatre la angetre Iudra.
14 Nge nyipine la feet, Iesu a elë jë kowe la uma ne hmi me nyiqaane hamë ini.
15 Ame hna hai hnei angetre Iudra me hape: “Hnauëne laka, atre hnyawa hi la atre ce la itre hna Cinyihan, nge tha qa pe hna ini?”*
16 Sa jë hi Iesu koi angatre ka hape: “Ame la hnenge hna inin, tre, tha qaathenge kö, ngo qaathene la atre upi ni.
17 Nge maine ketre atr a pi kuca la aja i nyidrë, tro hi angeice lai a wangatrehmekune ka hape, qaathei Akötresie la ini, maine qaathenge pena.
18 Matre ame la atre ithanata qa ngöne la sipu mekuna i angeic, angeic a atrunyi angeice kö, ngo ame la atre atrune la atre upi angeic, tre, ka nyipici me meköt angeic.
19 Hnei Mose lo hna hamë nyipunie la Trenge Wathebo, eje hi? Ngo pëkö ala casi qaathei nyipunie ka hane trongëne la Wathebo. Nga hnauëne la nyipunieti a thele troa humuthi ni?”
20 Önine jë hi la ka ala nyimu ka hape: “Ase hë löthi eö hnei dremoni. Drei la ka pi humuthi eö?”
21 Sa jë hi Iesu ka hape: “Hnenge hi hna kuca la ca iamamanyikeu ngöne la Sabath, nge nyipunieti fe hë a sesëkötr.
22 Celë hi matre hamëne jë Mose la hna amekötin göi troa ixötrehatren*— ngo tha qaathei Mose kö, ngo qaathene la itre qaaqaa i angeic—nge nyipunieti hi a xötrehatren la ketre atr la drai Sabath.
23 Haawe, maine nyipunieti a xötrehatren la ketre atr la drai Sabath, matre metrötrëne la trenge Wathebo i Mose, nga hnauëne la nyipunieti a elëhni koi ni ke eni a aloine hnyawa la atr e Sabath?
24 Nge loi ju hë hna iameköti thenge la ka mama, ngo amekötine jë pe thenge la meköt.”
25 Ame hnene la itre xa atr ne Ierusalema hna qaja ka hape: “Tha angeice kö lo atr hnei angatr hna thele troa humuth?
26 Nge goeën! Angeic a ithanata kowe la ka ala nyim, nge pëkö hnei angatre hna qaja koi angeic. Ma ka xecie jë kowe la itre he ne nöj ka hape, angeice hi la Keriso?
27 Ngo atre hi huni ka hape, atre kaa la atre cili; ngo ame ngöne la ijine troa mama la Keriso, pëkö atr ka troa atre ka hape, atre kaa nyidrë.”
28 Matre, ame hë la nyidrëti a hamë ini hnine la uma ne hmi, hnei Iesu hna qaja catrëne ka hape: “Atre ni hi hnei nyipunie, nge atre fe hi nyipunie ka hape, atre kaa ni. Nge tha traqa xane kö ni, ngo ka mele la Atre upi ni, nge thatre nyidrëti kö hnei nyipunie.
29 Ngo atre nyidrëti kö hneng, ke eni hi la qeneqaja i nyidrë, nge hnei nyidrëti hna upi ni.”
30 Ame hnei angatr hna thele jëne troa xolouthi nyidrë, ngo pëkö ka ketri nyidrë, ke tha hawa i nyidrëti petre kö.
31 Ngo ala nyimu pe la itre ka lapaune koi nyidrë, me hape: “Ame hë la kola traqa hnei Keriso, nyimutre la itre iamamanyikeu hnei nyidrëti hna troa kuca. Ngo hapeu, tha celë kö lai hna kuca hnene la atre ce?”
32 Ame hnene la itre Faresaio hna drenge la hna qaja hnene la ka ala nyimu göi nyidrë, matre, itre tane i angetre huuj me itre Faresaio a upe pi la itretre thup troa xolouthi nyidrë.
33 Sa jë hi Iesu ka hape: “Eni pala kö a troa pane lapa me nyipunie, qëmekene tro ni a tro kowe la Atre upi ni.
34 Matre, tro nyipunieti a thele ni, ngo tha tro pi kö nyipunie a öhnyi ni. Nge thatreine kö nyipunieti tro kowe la götran hnenge hna tro kow.”
35 Ame hnene la itretre Iudra hna nyiqaane iqajakeune ka hape: “Angeic a tro ië matre thatreine së troa öhnyi angeic? Tro kö angeic a tro kowe la itretre Iudra ka mele nyipine la angetre Geres, me inine fe la angetre Geres?
36 Nge nemene la aliene lo angeic a qaja ka hape, ‘Tro nyipunie a thele ni, ngo tha tro pi kö nyipunie a öhnyi ni me öhne la götran hnenge hna tro kow’?”
37 Matre ame hë ngöne la drai tixenuë, ene la drai ka sisitria ne la feet, Iesu a cile jë me qaja catrëne ka hape: “Maine ketre atr a pi ij, loi e tro angeic a tro koi ni me hane ij!
38 Ke ame la atre lapaune koi ni, tro hë angeic a tune lo hna qaja hnene la hna cinyihan ka hape: ‘Tro ha neni thei angeic la itre timi ne mel.’ ”
39 Ngo nyidrëti lai a qaja la ua, ene la hna troa kapa hnene la itretre lapaune koi nyidrë; ngo eje hi laka, pë pala kö ua la ijine cili, ke tha hna atrunyi Iesu petre kö.
40 Ame hnene la itre xan nyipine la ka ala nyimu ka drenge la itre trengewekë i nyidrë, hna nyiqaane qaja ka hape: “Angeice hnyawa hi la ketre Perofeta.”
41 Öni itre xan: “Angeice hi lo Keriso.” Ngo sa jë hi itre xan ka hape: “Tha ka fetra kö Keriso qaa Galilaia, eje hi?
42 Ke hapeu, tha hnene kö la hna Cinyihan hna qaja ka hape, tro la Keriso a ketre matra i Dravita, nge tro nyidrë a fetra qaa Bethelema, lo traone i Dravita?”
43 Ame hna isazikeu pi la mekuna ne la ka ala nyimu göi nyidrë.
44 Matre hnei itre xan hna mekune troa xolouthi nyidrë, ngo pëkö ala casi ka hane ketri nyidrë.
45 Matre ame hë la kola bëeke hmaca hnene la itretre thup, hnei itre tane i angetre huuj me itre Faresaio hna hnyinge koi angatr ka hape: “Hnauëne laka, tha xolouthi angeic kö hnei nyipunie?”
46 Sa jë hi la itretre thup ka hape: “Pëkö ketre atr ka hane ewekë tune la.”
47 Sa jë hi la itre Faresaio ka hape: “Ke nemen, hna hane fe amenu nyipunie?
48 Pëkö atre mus nge pëkö Faresaio ka hane lapaune koi angeic, eje hi?
49 Ngo ame la ka ala nyimu celë, itre ka thatre la Wathebo, matre ka hnëjin angatr.”
50 Ngo hnei Nikodremo, ketre Faresaio lo atre tro koi Iesu, hna qaja koi angatre ka hape:
51 “Thenge la hna amekötin hnene la Trenge Wathebo së, maine aja së troa amekötine la ketre atr, hapeu, tha qa së kö troa pane drei angeic matre atre la hnei angeic hna kuca, eje hi?”
52 Sa jë hi angatre koi angeic ka hape: “Tha atre Galilaia kö eö? Nga thele jë matre öhne jë kö eö ka hape, pëkö perofeta ka troa xulu qaa Galilaia.”*
Itre mekun ecahu fen
^ Wange ju la HQP.
^ Uma ne ini ne la itre Rabi.
^ Wange ju la HQP.
^ Hna xometrije hnene la itre Tusi Hna Ewath ka tru la xöt. 53 koi xöt. 11 mekene 8.
