Ioane 8:12-59
8 12 Ame hnei Iesu hna qaja hmaca koi angatr ka hape: “Eni hi la lai ne la fen. Matre ame la atre xötrethenge ni, tha tro hmaca kö angeic a tro ngöne la jidr, ngo tro pë hë angeic a hetrenyi la lai ne mel.”
13 Önine la itre Faresaio koi nyidrë: “Eö lai a sipu anyipici eö, matre tha nyipici kö la hnei eö hna qaja.”
14 Sa jë hi Iesu ka hape: “Ngacama eni a anyipici ni kö, ngo nyipici hi la hnenge hna qaja, ke atre kö ni ka hape, atre kaa ni, nge eni a tro ië. Ngo thatre pe nyipunie ka hape, atre kaa ni, nge eni a tro ië.
15 Nge ketre, nyipunieti a iameköti thenge la wathebo i atr; ngo ame ni, ka tha iameköti kö ni.
16 Ngo maine ka iameköti ju ni, tro hi a nyipici la iameköting, ke tha eni casi kö, ce eni memine la Kem, Atre upi ni.
17 Nge ketre, hnene lo Trenge Wathebo i nyipunie hna qaja ka hape: ‘Ka nyipici la ewekë hna jelenyipicine hnei ala lu.’
18 Matre eni a sipu anyipici ni, nge kolo fe a anyipici ni hnei Kaka, Atre upi ni.”
19 Haawe, hnyinge jë hi angatr ka hape: “Nga ekaa la Keme i eö?” Sa jë hi Iesu ka hape: “Thatre ni kö hnei nyipunie, nge goi thatre fe nyipunieti la Kemeng. Ke maine atre ni ju hnei nyipunie, tro fe hi nyipunieti lai a hane atre la Kemeng.”
20 Hnei Iesu hna qaja la itre trengewekë cili lo nyidrëti a hamë ini hmekune lo hnë kuië mani hnine la uma ne hmi. Ngo tha xolouthi nyidrëti ju kö, ke tha traeme i nyidrëti pala kö.
21 Matre öni nyidrëti hmaca jë: “Eni ha tro, nge tro pë hë nyipunie a thele ni, ngo tro pe nyipunie a mec ngöne la itre ngazo i nyipunie. Ke ame la götran hnenge hna tro kow, tha ijiji nyipunieti kö troa tro kow.”
22 Ame hnene la itretre Iudra hna nyiqaane qaja ka hape: “Tha angeice kö a troa hnöjua, eje hi? Ke öni angeic, ‘Ame la götran hnenge hna tro kow, tha ijiji nyipunieti kö.’ ”
23 Matre öni nyidrëti jë hi koi angatre ka hape: “Angetre fene nyipunie, ngo atre hnengödrai ni. Matre nyipunieti hi la itre atre ne fen, ngo tha eni kö.
24 Celë hi matre eni a qaja koi nyipunie ka hape, tro nyipunieti a meci ngöne la itre ngazo i nyipunie. Ke maine tha mejiune kö nyipunie laka, eni hi la atre cili, haawe, tro hë nyipunieti lai a meci ngöne la itre ngazo i nyipunie.”
25 Ame hnei angatre hna hnyinge koi nyidrë ka hape: “Ke drei eö?” Sa jë hi Iesu ka hape: “A hnauëne la eni a ithanata me nyipunie?
26 Nyimu ewekë pala kö nyine tro ni a qaja göi nyipunie, me nyine tro ni a amekötin. Nge eje hi laka, ka nyipici la Atre upi ni, nge ame la nöjei ewekë hnenge hna dreng qaathei nyidrë, eni fe hi a qaja kowe la fen.”
27 Ngo tha trotrohnine kö angatr laka, nyidrëti hi a ithanatane la Kem.
28 Öni Iesu hmaca jë: “Thupene la tro nyipunie a athipe la Nekö i Atr, tro hë nyipunie a wangatrehmekune laka, eni hi lai atr cili, nge tha hnenge kö hna sipu kuci mekun; ngo thenge la hna ini ni hnei Kaka, eni a qaja ju.
29 Nge ce eni pala hi memine la Atre upi ni, nge tha hnei nyidrëti kö hna nuaxöji ni, ke eni pala hi a kuca la itre ewekë ka amadrinë nyidrë.”
30 Nyidrëti pala kö a qaja lai, ame hna lapaune koi nyidrë hnene la ka ala nyim.
31 Thupene lai, öni Iesu kowe la itretre Iudra ka lapaune koi nyidrë ka hape: “Maine tro pala hi nyipunieti a lapa ngöne la itre trengewekëng, nyipunieti hnyawa hi la itretre drei ni.
32 Nge tro hë nyipunieti a atre la nyipici, nge tro la nyipici a nuamele nyipunie.”
33 Öni angatre jë hi: “Eahuni la itre nekö i Aberahama, matre tha itre hlue kö hun. Ngo eö a qaja fë nemene ka hape, ‘Troa nuamele hun’?”
34 Sa jë hi Iesu ka hape: “Nyipici, eni a qaja hnyawa koi nyipunie, ame la nöjei atr ka kuca lapane la ngazo, itre hlue ne la ngazo angatr.
35 Nge ketre, tha ka lapa palua kö la hlu ngöne la hnalapa i maseta, ngo neköne pe.
36 Haawe, maine tro la nekön a nue xecië nyipunie, ka mele hë nyipunieti lai.
37 Atre hi ni laka, itre nekö i Aberahama nyipunie. Ngo nyipunie a thele troa humuthi ni, ke ka gufa la itre trengewekëng thei nyipunie.
38 Eni a qaja la itre ewekë hnenge hna öhne lo ce eni me Kaka, ngo nyipunie a kuca la itre ewekë hna dreng qaathene la keme i nyipunie.”
39 Sa jë hi angatre ka hape: “Aberahama la keme hun.” Matre öni Iesu: “Maine nyipunieti ju la itre nekö i Aberahama, nga tro fe hi nyipunie a kuca lo itre huliwa i Aberahama.
40 Ngo enehila, nyipunieti a thele troa humuthi ni, eni, lo atre qaja la nyipici hnenge hna drenge qaathei Akötresie. Ngo tha hane fe kö Aberahama kuca tun.
41 Nyipunieti a kuca la itre huliwa ne la keme i nyipunie.” Sa jë hi angatre ka hape: “Tha itre nekö ne gojenyi* kö hun, casi hi la keme hun, Akötresie.”
42 Öni Iesu koi angatr: “Maine Akötresie la Keme i nyipunie, nga tro hi nyipunieti lai a hnimi ni, ke hna upi ni hnei Akötresie, nge hnei nyidrë, matre eni pi la. Tha hnenge kö hna sipu mekun troa traqa e celë, ngo hnei nyidrëti pe hna upi ni.
43 Hnauëne laka, tha trotrohnine kö nyipunie la hnenge hna qaja? Pine laka, thatreine kö nyipunie kapa la itre trengewekëng.
44 Ngo Diabolo pe la keme i nyipunie, nge pi tro fe nyipunie a eatrëne la aja ne la keme i nyipunie. Nge atre ihumuth angeic qaane lo qaan, nge tha cile huti kö angeic ngöne la nyipici, ke pëkö nyipici thei angeic. Matre ame la angeic a thoi, angeice hi lai a ithanata thenge la sipu mekuna i angeic, ke atre thoi angeic, nge keme ne la thoi.
45 Matre, ngacama eni a qaja la nyipici, ngo tha mejiune kö nyipunie.
46 Nge drei e nyipunie la ka atreine upezö ni? Haawe, maine eni a qaja la nyipici koi nyipunie, nga hnauëne laka, tha mejiune kö nyipunie?
47 Matre ame la itre nekö i Akötresie, tre itre ka drenge la trengewekë i Akötresie. Nge ame la kepin matre tha drei Akötresieti kö hnei nyipunie, tre, tha itre nekö i Akötresieti kö nyipunie.”
48 Matre önine la itretre Iudra koi nyidrë ka hape: “Hapeu, tha nyipici kö la hne huni hna qaja ka hape: ‘Atre Samaria eö, nge hna löthi eö hnei dremoni’?”
49 Sa jë hi Iesu ka hape: “Tha hna löthi ni kö hnei dremoni, eni a atrune la Kemeng, ngo nyipunieti pe a ahmahmanyi ni.
50 Ketre, tha eni kö a thele troa atrunyi ni; ke casi hi la Atre thele lai koi ni, me ka iameköti.
51 Nyipici, eni a qaja hnyawa koi nyipunie, maine tro la ketre atr a trongëne la itre trengewekëng, tha tro jë kö angeice lai a hane mec.”
52 Sa jë hi la angetre Iudra ka hape: “Enehila, atre hë huni laka, hna löthi eö hnyawa hnei dremoni. Ke meci hë Aberahama me itre perofeta, ngo öni eö, ‘Maine tro la ketre a trongëne la itre trengewekëng, tha tro pi kö angeice lai a hane mec.’
53 Tha sisitria kö eö hui Aberahama keme hun, eje hi? Meci hë nyidrë, nge ketre meci fe hë la itre perofeta. Ngo drei kö eö?”
54 Sa jë hi Iesu ka hape: “Maine eni a sipu atrunyi ni kö, ka gufa lai. Ngo Kemenge pe la ka atrunyi ni, ene lo hnei nyipunieti hna selëne ka hape, Akötresi nyipunie.
55 Thatre nyidrëti pala kö hnei nyipunie, ngo eni casi hi. Nge maine tro ni a qaja koi nyipunie ka hape, thatre nyidrëti kö ni, tro hë ni a ketre atre thoi. Ngo eje hi laka, eni a atrepengöi nyidrë me trongëne la itre trengewekë i nyidrë.
56 Hnei Aberahama, keme i nyipunie hna lapa treqene la drai ne tro ni a traqa. Nge öhne hë angeice lai me madrin.”
57 Sa jë hi angetre Iudra ka hape: “Tha traqa petre kö eö koi 50 lao macatre, nge öhnyi Aberahama fe hë eö?”
58 Öni Iesu jë hi: “Nyipici, eni a qaja hnyawa koi nyipunie, qëmekene troa hnaho Aberahama, eni fe hë.”
59 Ame hnei angatr hna hleme la itre etë troa tranyi nyidrë, ngo hnei Iesu pe hna canga zae, me kötre lö pi qa hnine la uma ne hmi.
Itre mekun ecahu fen
^ Maine, “kuci ngazo.” Ger., por·neiʹa. Wange ju la HQP.
