Ioane 9:1-41
9 Nyidrëti pala kö a tro, nge öhne ju hi nyidrë la ketre trahmany ka timek qaane lo kola hnahon.
2 Ame hnene la itretre dreng hna hnyingë nyidrë ka hape: “Rabi, drei la ka kuca la ngazo matre hnahone pi a timek, angeic, maine keme me thin?”
3 Öni Iesu: “Tha zö i angeice kö maine keme me thine i angeice pena, ngo tro pe a mama kowe la itre atr la huliwa i Akötresie thei angeic.
4 Nge nyipiewekë tro sa kuca la itre huliwa ne la Atre upi ni e lai petre kö; ke easenyi hë la jidr, nge pë hmaca kö ka atreine huliwa e cili.
5 Matre ame la eni pala kö e celë fen, eni la lai ne la fen.”
6 Ase jë hi nyidrë qaja lai, nyidrëti a hnyiju ju e kuhu hnadro me lomën la itrahnyiju i nyidrë me dro, me köle la lue alameke i angeic,
7 me hape: “Tro jë a köle ialamek ngöne la tim e Siloama” (e troa ujën, kola hape, “Hna Up”). Ame hnei angeic hna tro ju, me köle ialamek, me bëek a goe hë.
8 Nge hnene la itre atr ka lapa easenyi angeic, me itre ka majemine öhnyi angeic e sipo mani, hna qaja ka hape: “Tha kolo kö lo atre la ka lapa sipo manie la?”
9 Matre öni itre xan: “Angeice hi.” Nge öni itre xane pena: “Waea. Ngo kösë pi lo angeice hi.” Ngo kolo pe a qaja catrën hnene lai atr ka hape: “Eni hi.”
10 Matre öni angatre jë hi: “Nga hna fe tune kaa la luemeke i eö?”
11 Sa jë hi angeic ka hape: “Hnene lo atr hna hëne ka hape, Iesu. Hnei nyidrëti hna xome la dro ka hmu me köle la lue alamekeng me hape, ‘Tro jë kowe la tim e Siloama troa köle ialamek.’ Matre eni a tro ju, me köle ialamek, nge goe ju hi ni.”
12 Hnyinge hmaca jë hi angatre ka hape: “Ekaa lai atre cili?” Öni angeic: “Thatre.”
13 Haawe, angatr a xome jë lo lai timek me tro sai angeic kowe la itre Faresaio.
14 Ngo drai Sabath lo Iesu a xome lo dro ka hmu me fe la luemeke ne lai atr.
15 Matre ngöne la hawa cili, hnei itre Faresaio hna hnyingëne kowe lai atr la aqane fe la luemeke i angeic. Öni angeic: “Hnei nyidrëti hna köle hnei dro ka hmu la lue alamekeng, nge hnenge hna köle ialamek, nge goe pi hi ni.”
16 Matre öni itre xa Faresaio ka hape: “Tha atre i Akötresieti kö la atre cili, ke tha metrötrëne kö angeic la Sabath.” Matre öni itre xane jë hi: “Nga hna atreine kuca tune kaa la iamamanyikeu ka tru celë e atre ka ngazo angeic?” Ame hna isazikeu pi la mekuna i angatr.
17 Nge öni angatre hmaca jë kowe lo timek: “Nemene la mekuna i eö göi angeic, ke hna fe la luemeke i eö?” Sa jë hi lai atr ka hape: “Perofeta hi lai.”
18 Ngo tha mejiune kö angetre Iudra ka hape, timeke lo nge goe hë, matre angatr a hëne jë la keme me thine i angeic
19 me hnyinge koi nyidro ka hape: “Angeice hi lo nekö i epon, lo öni epon ka hape, hna hnahon a timek? Nga hnauëne laka, goe hë angeic?”
20 Öni kem me thin: “Nekö i nyio hi lai, nge atre hi nyio ka hape, ka timek lo kola hnahon.
21 Ngo ame pë hë göi troa atre ka hape, goe hë enehila nge drei la ka fe la luemeke i angeic, nga thatre pë hë nyio lai. Ngo hnyingë angeice jë kö, ke ka tru hë lai. Atreine kö angeice lai sipu sa.”
22 Ngo kola sa tune lai hnei keme me thin ke xou i nyidro lo angetre Iudra, ke hnei angatre hna ce axeciëne troa helëne qa hnine la sunago la itre ka qaja ka hape, Iesu la Keriso.
23 Celë hi matre qaja jë keme me thine i angeic ka hape: “Ka tru hë angeic. Hnyingë angeice jë kö.”
24 Matre angatr a alua hëne jë lo timek me hape: “Atrunyi Akötresieti jë pe, ke atre hi huni laka, ka ngazo lai atre cili.”
25 Sa jë hi angeice ka hape: “Ame göi troa qaja ka hape, atre ka ngazo angeic, thatre pë ni lai, ngo casi hi la hnenge hna atre, ka timeke ni ekö, ngo goe hë ni enehila.”
26 Matre öni angatr: “Nemene la hnei angeic hna kuca koi eö? Nge hnei angeic hna fe tune kaa la alameke i eö?”
27 Sa jë hi angeic ka hape: “Ase hë ni lo qaja koi nyipunie, ngo tha drenge kö nyipunie, nga hnauëne la nyipunieti hmaca a pi atre? Kola u, pi tro fe hë nyipunie a itretre drei nyidrë?”
28 Qa ngöne lai, angatr a sa akötrëne ju koi angeic me hape: “Eö la atre drei angeic, ngo itretre drei Mose hun.
29 Atre hi huni laka, hnei Akötresie hna ithanata koi Mose, ngo ame göi angeice la, thatre kö huni ka hape, drei la atre upi angeic.”
30 Önine jë hi lo atr ka hape: “Hane petre hi la ketre ewekë laka, thatre kö nyipunie ka hape, drei la ka upi nyidrë, ngacama hnei nyidrëti hna fe la luemekeng.
31 Ke atre hi së laka, tha Akötresieti kö a drenge la itre ka kuca la ngazo, ngo ame la atre xoue Akötresie me kuca la aja i nyidrë, angeice hi la hna drenge hnei Akötresie.
32 Nge qaane ekö, tha hane fe kö së drenge laka, hna fe la luemeke ne la atr hna hnahon a timek.
33 Haawe, maine tha qaathei Akötresieti kö la atre ce, nga tha ijiji angeice kö troa kuca lai.”
34 Sa jë hi angatre koi angeic ka hape: “Ka tiqa ha eö hnei ngazo lo kola hnaho eö, nge eö a pi ini hun?” Ame hnei angatre hna helëne triji angeic tröne la Sunago!
35 Ngo drenge hë Iesu laka, hna helëne triji angeic qa hnine la sunago, matre ame hë la nyidrëti a öhnyi angeic, öni nyidrë: “Eö kö a lapaune kowe la Nekö i Atr?”
36 Matre sa jë hi lai atr ka hape: “Drei angeice lai joxu, matre tro fe ni a hane lapaune koi angeic?”
37 Öni Iesu: “Hnei eö hna öhnyi angeic, nge angeice hi la ka ithanata koi eö.”
38 Önine lai atr ka hape: “Eni a lapaune koi nyidrë, Joxu.” Ame hnei angeic hna sa iwatingöne ca* qëmekei nyidrë.
39 Matre öni Iesu: “Eni a traqa e celë fen matre, jëne la itre huliwang, tro ha goe la timek, nge tro ha timek la ka goe.”
40 Ngo drenge ju hi lai hnene la itre xa Faresaio e cili, matre öni angatr: “Tha itre timek fe kö hun, eje hi?”
41 Sa jë hi Iesu ka hape: “Maine itre timeke nyipunie, pëkö ngazo i nyipunie. Ngo enehila, öni nyipunie, ‘ka goe hun,’ haawe, ka fedre kö thei nyipunie la itre ngazo i nyipunie.”
Itre mekun ecahu fen
^ Maine, “thil.”
