Itre Huliwa 1:1-26
1 Ame ngöne lo pane tusinge koi eö Theofila, hnenge hna qejepengöne la nöjei ewekë hnei Iesu hna kuca me inin,
2 uti hë la drai ne xomi nyidrë hnei Akötresie. Nge jëne la uati hmitrötr, hnei nyidrëti hna ameköti huliwa thatraqane lo itre aposetolo hnei nyidrëti hna iën.
3 Nge thupene la hnei nyidrëti hna pane akötr, hnei nyidrë hna anyimua mama koi angatr nyine anyipicin laka, mele hmaca ha nyidrë. Haawe, 40 lao ijine nyidrëti a mama koi angatr, me ithanatane la Baselaia i Akötresie.
4 Nge ame lo nyidrëti a icasikeu me angatr, hnei nyidrëti hna amekötine koi angatr ka hape: “The tro kö qaa Ierusalema, ngo lapa treqene ju lo hna thingehnaean hnei Kaka, ene lo hnei nyipunieti hna drenge qaatheng;
5 ke hnei Ioane lo hna bapataiso hnei tim, ngo easenyi hë matre bapataiso nyipunieti jë hnei uati hmitrötr.”
6 Nge ame hmaca ngöne la ijine angatr a ce icasikeu, hnei angatre hna hnyingë nyidrë ka hape: “Joxu, enehila hi la ijine tro nyipë a acile hmaca la baselaia thei angetre Isaraela?”
7 Sa jë hi nyidrë ka hape: “Tha hna aijijë nyipunieti kö troa atre la traem, maine ijin hnei Kakati hna sa.*
8 Ngo tro nyipunie a kapa la men, e traqa pi la uati hmitrötr koi nyipunie. Nge tro hë nyipunie a itretre anyipici ni e Ierusalema, me ngöne la nöje Iudra asë, me e Samaria, me ngöne la nöjei götrane gaa nany* ne la fene hnengödrai.”
9 Thupene la nyidrëti a ase qaja la itre ewekë cili, öhne ju hi angatr la nyidrëti a elë hnengödrai eë, ame hna xulu pi la ketre iaw, me juetrë nyidrë qëmeke i angatr.
10 Nge angatre pala kö a gala draië, me goeë nyidrë, ame hna mama pi ezi angatr la lue trahmanyi ka heetrë ka wië.
11 Öni nyidro: “Angetre Galilaia fe, hnauëne laka, nyipunieti pala kö a goeëne la hnengödrai? Ame lae Iesu hna xome qa nyipi nyipunie a tro hnengödrai, tro hmaca kö nyidrëti a bëeke tune la aqane elë nyidrë hnengödrai eë.”
12 Haawe, angatr a tro pi qa ngöne la Wetr Elaio* a tro Ierusalema, tha nanyi kö ke kösë ca kilomete* hi la enanyin.
13 Matre ame ju hi la angatr a traqa, hnei angatr hna elë kowe la hnahag, lo hnei angatre hna lapa ngön. Nge Peteru e cili, me Ioane, me Iakobo, me Anederea, me Filipo me Toma, me Batolomaio, me Mataio, me Iakobo nekö i Alefaio, me Simona lo atre catre huliwa, me Iudra nekö i Iakobo.
14 Nge casi hi la mekuna i angatr, ene la troa catre thith. Nge ce angatr me itre xa föe, me Maria thine i Iesu, me itre jini nyidrë.
15 Ngöne la ijine cili, Peteru la ka cil nyipine la itre trejin (kola e* la 120 lao atr ka ce icasikeu) me hape:
16 “Itre trejin, nyipiewekë troa eatre lo hna cinyihan, ene lo hna perofetan hnei uati hmitrötr jëne Dravita göi Iudra, la atre weje mekene lo tronge i angetre xolouthi Iesu.
17 Nge hna hane ce e angeice fe lo me easë, nge hnei angeice hna hane sine la huliwa së.
18 (Hnene la atre cili, hna itöne la ketre hlapa memine la mani ka tha meköti kö, ame hnei angeic hna kei me tro pai he, nge goi kaqa* fe la hni angeic, ame hna neni la trenge xel.)
19 Hnene pë hë la angetre Ierusalema asë hna atre lai, celë hi matre hëne jë ngöne la qene zi angatre la götrane cili ka hape, A·kel′da·ma, kola hape, “Zi ne la Madra.”)
20 Ke hna cinyihan ngöne lo itus i Salamo ka hape, ‘Nue pi la hlapa i angeic, nge the lapane kö’, nge ‘Tro pë hë a acili ketre troa atre thup nyine nyihna i angeic.’
21 Haawe, nyipiewekë tro sa iëne la ketre, ngo loi e ka ce me easë ngöne lo Iesu a eatrëne la huliwa* i nyidrë nyipi së,
22 qaane lo kola bapataiso nyidrë hnei Ioane, uti hë la drai ne nyidrëti a elë hnengödrai eë. Nge loi e hnei angeice fe hna öhne tu së laka, mele hmaca ha Iesu.”
23 Ame hnei angatr hna ithanatane la lue atr, ene Iosefa lo hna hëne ka hape, Basabasa maine Iuseto, me Matias.
24 Matre angatr a thithi jë me hape: “Iehova* fe, nyipëti kö la ka atre la aliene hni ne la atr, matre iëne jë thei nyidro la atr hnei nyipëti hna mekune
25 troa xome la huliwa celë, me nyi aposetolo hna i Iudra, ke hnei angeic hna nuetrije la huliwa i angeic me sipu kuci mekun.”
26 Haawe, angatr a uthi trikitre jë, ene pe, eatre ju koi Matias, matre qaane ju hi lai, kola ha ce e* angeice memine lo ala 11 lao aposetolo.
Itre mekun ecahu fen
^ Ger., “nyidrëti kö la ka mus.”
^ Maine, “ketre can la fen.”
^ Maine, “Oliv.”
^ Maine, “ijije troa trongëne hnene la atre Iudra ngöne la drai Sabath.”
^ Maine, “ka ala nyim.”
^ Maine, “kaqa qa kuhu nyipin.”
^ Ger., “nyidrëti a traqa me tro.”
^ Wange ju la HQP.
^ Maine, “wangatrehmekun” laka, ketre ne lo ala 11.
