Itre Huliwa 10:1-48
10 E Kaisaria fe la ketre atr, Konelio la ëjen, angeice la ketre tane* la itre sooc* ne Itali.
2 Nge atre xoue Akötresie angeic me hnepe lapa i angeic asë, nge ka majemine angeice hamëne la nöjei pengöne ahnahna ne utipin, nge ketre atre thithi lapa angeic.
3 Matre ame hë la kola traqa kowe la hnanaenene hawa,* hnei angeic hna meköle goeën la ketre angela i Akötresie, kola thei angeic me hape: “Konelio!”
4 Konelio a goeëne jë lai angela me xou, me hape: “Nemen Joxu?” Sa jë hi lai angela ka hape: “Tha sihngödri kö koi Akötresie la itre thithi eö, me itre ahnahna ne utipine i eö, matre thatreine kö nyidrëti thëthëhmine lai.
5 Haawe, upe jë la itre xan a tro Iopa, matre tro angatr a traqa fë la ketre atr, Simona, lo hna hëne ka hape, Peteru.
6 Angeice thei* Simona, lo atre huliwa kupeine öni nge ka lapa ezine hnagejë.”
7 Ame ju hi la kola trotriji Konelio hnene lai angela, angeic a hëne jë la lue hlue i angeic, me ketre sooc i angeic, lo hnei angeic hna mejiune kow,
8 nge e cili, angeic a qaja asë jë koi angatr me upi angatre jë a tro Iopa.
9 Matre ngöne la drai thupen, hmekune la hnaasikisine hawa,* angatre pala kö a tro me easenyine la traon, nge Peteru hi a elë jë kowe la hune uma troa thith.
10 Nge traqa ju hi la mecijiine koi angeic. Matre ame ju hi la angatr a hnëkë xeni koi angeic, angeic a meköle goeëne ju la ketre ewekë.
11 Kola fe la hnengödrai, nge uti pi hi la ketre treng, kösë imaano lino hna autin, nge hna ea ngöne la foa lao pun.
12 Nge e hnin, hetre itre öni ka foa lao wacan, me itre öni ka wewë e celë fen, me itre waco ka sesë.
13 Thupene lai, drenge ju hi angeice la ketre aqane ithanata kola hape: “Peteru mejë jë, nge humuthe ju la ketre öni, nge öni jë!”
14 Ngo sa jë hi Peteru ka hape: “Waea Joxu, ka tha hane fe kö ni öni la ketre ewekë ka sis nge hna wathebon.”
15 Matre qaja hmaca jë hi koi angeice ka hape: “Loi ju hë hnei eö hna sisine la itre ewekë hnei Akötresie hna ahmitrötrën.”
16 Haawe, ame ngöne la hnaakönine angeic a drenge la aqane ewekë celë, xome hmaca pi hi la treng hnengödrai eë.
17 Peteru pe kö a thele la aliene la hnei angeic hna meköle goeën, nge kola thele agöne la hnalapa i Simona hnene lo köni atre hna upe hnei Konelio, matre angatre hë ngöne qe ne qëhnelö.
18 Angatr a sue jë me hnyingëne ka hape, e cili kö la hna lapa hnei Simona lo hna hëne ka hape, Peteru.
19 Ngo Peteru pala kö a lapa mekune la hnei angeic hna meköle goeën, ame hnei ua hna qaja koi angeic ka hape: “Hanawang! kola thele eö hnene la köni trahmany.
20 Mejë jë, nge uti pi, nge ce tro jë me angatr, nge the luelue kö, ke eni hi la ka upi angatr.”
21 Peteru a uti pi koi angatr me hape: “Eni hi la hnei nyipunieti hna thel. Nyipunieti a ue celë?”
22 Öni angatr: “Ke hnei Konelio, ketre tane sooc nge atre ka meköt nge ka xoue Akötresie, nge hna qaja aloine hnene la nöje Iudra asë, hna kapa qaathene la angela la ketre hna amekötin, ene la troa tro sai nyipë kowe la hnalapa i nyidrë, matre drenge la itre ewekë hnei nyipëti hna troa qaja.”
23 Haawe, Peteru a alö angatre jë me alapa angatr.
Ame hë la drai thupen, angeic a mejë jë, me ce tro me angatr, ame hna xötrethenge angeice ju hnene la itre xa trejin qaa Iopa.
24 Nge ngöne la drai thupen, traqa ha Peteru e Kaisaria. E cili, Konelio a lapa treqe angatr memine la itre xa atrene la lapa i angeic, me itre sinee i angeic.
25 Matre ame ju hi la Peteru a lö, Konelio a traqa pi koi angeic me sa iwatingöne ca* qëmeke i angeic, me atrunyi angeic.
26 Ngo Peteru a amejë angeice jë me hape: “Mejë jë; ke ketre atr hi ni la.”
27 Nge Peteru pala hi a ithanata me Konelio, matre nyidroti a ce lö jë, nge öhne ju hi Peteru la itre atr a ilapany.
28 Öni Peteru jë hi: “Atre hi nyipunieti lo laka, hna wathebone kowe la angetre Iudra troa itronyi me easenyine la trenyiwa, ngo enehila, hnei Akötresie hna amamane koi ni laka, tha tro pi kö ni a jele ngazone maine sisine la ketre atr.
29 Celë hi matre eni a traqa, nge tha qeje jole kö ni la kola trothei ni. Ngo ca hnyingenge pe, hnauëne laka, hë ni jë hnei nyipunie?”
30 Sa jë hi Konelio ka hape: “Foa lao drai qëmekene la hawa celë lo eni a thith hnine la umang, nge kolo hmekune la hnaanaenene hawa, hna mama koi ni la ketre atr ka heetrë iheetre ka wië kaca.
31 Matre öni angeic: ‘Konelio, tha sihngödri kö koi Akötresie la itre thithi eö, me itre ahnahna ne utipine i eö, matre thatreine kö nyidrëti thëthëhmine lai.
32 Haawe, upe jë la itre xan a tro Iopa, nge tro angatr a traqa fë la ketre atr, Simona, ene lo hna hëne ka hape, Peteru. Angeice thei Simona, lo atre huliwa kupeine öni nge ka lapa ezine hnagejë.’
33 Haawe, celë hi matre hnenge hna canga upe la itre xan koi eö, nge hnei eö hna hmalahnine troa traqa. Matre enehila, eahuni a ce icasikeu qëmeke i Akötresie göi troa drenge la nöjei ewekë hnei Iehova* hna amekötine tro eö a qaja.”
34 Qa ngöne lai öni Peteru: “Qaane enehila, mama cile hnyawa ha koi ni laka, tha ka ië hna hnime* kö Akötresie,
35 ngo nyidrëti a kapa la nöjei atr qa ngöne la nöjei nöj, e ka xoue nyidrë me thiina ka meköt angatr.
36 Hnei nyidrëti lo hna upe la trengewekë kowe la itre nekö i Isaraela, matre cainöjëne koi angatre la maca ka loi ne tingeting jëne Iesu Keriso—Joxu ne la nöjei atr asë.
37 Nge atre fe hi nyipunie la ewekë hna iqajakeun ngöne la nöje Iudra asë, hna nyiqaane e Galilaia thupene lo bapataiso hnei Ioane hna cainöjën:
38 lo hna qaja göi Iesu atre Nazareta, memine la aqane ië nyidrë hnei Akötresie, fë la uati hmitrötr me men. Nge hnei nyidrëti fe hna trongëne la nöj asë me kuca la loi, me aloine la itre hna axösisin hnei Diabolo, ke ce Akötresieti me Iesu.
39 Nge eahuni hi la itretre anyipicine la nöjei ewekë hnei nyidrëti hna kuca thei angetre Iudra me e Ierusalema; ngo hnei angatre pe hna xele nyidrë me jei faonyi nyidrë hune la sinöe.
40 Matre hnei Akötresieti hna amele Iesu hmaca ngöne la hnaakönine drai, me aijijë nyidrë troa iamamany,
41 ngo tha koi nöjei atre asë kö, ngo kowe la itretre anyipicin hna iën hnei Akötresie, itretre ce xeni me ce iji me Iesu thupene la hna amele nyidrëti hmaca.
42 Ketre, hnei Iesu hna amekötine koi huni troa cainöje kowe la itre atr, me anyipicine laka, nyidrëti hi la hna acile hnei Akötresie troa atre iameköti kowe la itre ka mel me ka mec.
43 Nge hnene mina fe lo itre perofeta hna anyipicine göi nyidrë ka hape, ame la nöjei atre lapaune koi nyidrë, tro ha köletrije la itre ngazo i angatr jëne la ëje i nyidrë.”
44 Peteru pala kö a ithanatane lai, ame hna të pi la uati hmitrötr hune la itre ka drenge la trengewekë i Akötresie.
45 Nge e cili, kola hai hnene lo itre trejin qaa Iudra ka ce traqa me Peteru, ke hnene la itre atr ne la itre xa nöj hna hane kapa lo ahnahna hna hamëne gufan, ene la uati hmitrötr.
46 Ame hnei angatre hna drei angetre kapa la uati hmitrötr e ithanatane la itre qene hlapa trenyiwa, me atrunyi Akötresie. Matre öni Peteru jë hi:
47 “Haawe, nga drei pë hë la atre ka troa xele ma bapataiso angatre hnei tim, nge ase hë angatr kapa la uati hmitrötr tu së?”
48 Thupene lai, angeic a amekötine jë troa bapataiso angatr ngöne la ëje i Iesu Keriso. Ame hnei angatr hna sipone iele angeice troa pane lapa aqeanyi thei angatr.
Itre mekun ecahu fen
^ Maine, “atre musinëne la 100 lao sooc.”
^ Maine, “gurup ne 600 lao sooc thei angetre Roma.”
^ Kola easenyi e 3:00 e hnaipajö.
^ Maine, “hna thupëne hnei.”
^ Kola easenyi e midi.
^ Maine, “thil.”
^ Wange ju la HQP.
^ Maine, “iwangatrehmekunyi atr.”
