Itre Huliwa 11:1-30
11 Drenge hë la itre aposetolo me itre trejin e Iudra laka, hnene la itre xa atre ne fen hna hane kapa la trengewekë i Akötresie.
2 Ngo ame hë la Peteru a elë a tro Ierusalema, hnene la itretre catre fë troa ixötrehatreny hna nyiqaane qeje* Peteru
3 me hape: “Hnei eö hna lö hnine la hnalapa ne la itre atr tha hna xöj, me ce xeni me angatr.”
4 Ame hnei Peteru hna nyiqaane qejepengöne hnyawa lai koi angatr me hape:
5 “Ame lo eni a thith e Iopa, hnenge hna meköle goeëne la ketre ewekë ka uti qaa hnengödrai kösë imaano lino hna ea ngöne la foa lao pun, me auting mekötine koi ni.
6 Matre ame la eni a goeëne hnyawa e hnin, öhne ju hi ni e cili la itre öni ka foa lao wacan, me itre öni wael, me itre öni ka wewë, me itre waco ka sesë.
7 Nge hnenge fe hna drenge la aqane ewekë kola hape koi ni: ‘Mejë jë Peteru, nge humuthe pi lai ketre öni, nge öni jë!’
8 Ngo öninge jë hi: ‘Waea Joxu, ka tha hane fe kö ni öni la ketre öni ka sis nge hna wathebon.’
9 Ame hna alua drenge la aqane ewekë qaa hnengödrai, kola hape: ‘Loi ju hë hnei eö hna sisine la itre ewekë hnei Akötresie hna ahmitrötrën.’
10 Nge akönia drenge kö ni lai aqane ewekë, ame hna aelëne hmaca pi la nöjei ewekë hnengödrai eë.
11 E cili, traqa ju hi la köni trahmanyi hna upe qaa Kaisaria kowe la uma hne huni hna lapan.
12 Ame hnene la ua hna upi ni troa xötrethenge angatr, nge tha tro kö a luelu. Nge hna xötrethenge ni fe hnene la sikisi lao trejine celë, matre hne huni hna ce lö kowe la uma ne la ketre atr.
13 “Angeic a qejepengöne jë koi huni laka, hnei angeice hna öhne la ketre angela e cil hnine la uma i angeic me hape: ‘Upe jë la itre xan a tro Iopa, nge tro angatr a traqa fë la ketre atr, Simona, ene lo hna hëne ka hape, Peteru.
14 Nge tro hë angeic a qejepengöne koi eö me hnepe lapa i eö, la aqane troa amele nyipunie.’
15 Matre ame ju hi la eni a nyiqaane ithanata koi angatr, uti pi hi la uati hmitrötr koi angatr, tune lo aqane traqa ej koi së ngöne la qaan.
16 E cili, mekune hmaca jë hi ni lo hna majemine qaja hnei Joxu ka hape: ‘Ioane a bapataiso hnei tim, ngo tro ha bapataiso nyipunie hnei uati hmitrötr.’
17 Haawe, pine laka hnei Akötresie hna hamëne koi angatre la ahnahna hna hamëne gufane koi së, itretre lapaune koi Iesu Keriso Joxu, nga drei ni matre thingi jë i Akötresie?”*
18 Matre ame hë la angatr a drenge lai, tha qeje jole* hmaca kö angatr, nge angatr a atrunyi Akötresieti jë me hape: “Haawe, Akötresieti fe a aijijëne la itre atre ne fen troa ietra matre mel.”
19 Ame lo itretre dreng ka kötre mel lo ijine traqa la iakötrë ka tru thupei Setefano, hnei angatre hna tro Foinike, me Kupero, me Anetioka, nge hnei angatre hmekuje hi hna cainöje koi angetre Iudra.
20 Matre hnene pë hë la itre xan e angatr ka qaa Kupero, me Kurene, hna tro Anetioka, me cainöjëne la maca ka loi göi Iesu Joxu kowe la angetre ithanatane la qene Geres.
21 Nge thei angatre hi la ime i Iehova,* matre ala nyimu la itre atr ka hane lapaun me xötrethengene la Joxu.
22 Ame hna drei mejene lai hnene la ekalesia ne Ierusalema, matre angatr a upi Banaba jë a tro Anetioka.
23 Nge ame hë la angeic a traqa e cili, me öhne la ihnimi gufa i Akötresie, angeic a madrine me thuecatre i angatr troa lapa qale koi Joxu hnene la hni angatr ka pexej.
24 Ke ketre atr ka lolo angeic, me ka tiqa hnei uati hmitrötr, nge ka catre lapaun. Qa ngöne lai, ala nyimu catre hë la itre ka nyixane la angetre xötrethenge Joxu.
25 Matre Banaba a tro jë a tro Taraso troa thelagö Saulo.
26 Nge öhnyi Saulo jë hi angeic, nyidroti a ce bëeke jë Anetioka eë, me lapa e cili ngöne la ca macatre ka pexej, me ce icasikeu memine la ekalesia. Matre, ala nyimu la itre atr hnei nyidroti hna inin. Nge jëne la ixatua i Akötresie, kola xötrei ati ëjene la itretre dreng e cili ka hape, itre Keresiano.
27 Nge ngöne la ijine cili, traqa pi hi la itre perofeta qaa Ierusalema a tro Anetioka.
28 Agabo la ketre e angatr. Nge jëne la uati hmitrötr, hnei angeic hna perofetane laka, troa traqa la ketre jiin atraqatr kowe la fen asë hmekune la ijine mus i Kalaudio.
29 Ame hnene la itretre dreng hna axeciëne troa isa iupi fë ewekë* kowe la itre trejin ne Iudra, thenge la hnei angatr hna isa hetreny.
30 Nge celë hi hnei angatre hna kuca. Angatr a iupi fë jë la itre ewekë kowe la itre qatre thup, jëne Banaba me Saulo.
Itre mekun ecahu fen
^ Maine, “eetr.”
^ Maine, “icilekeu me Akötresie?”
^ Maine, “lapa thaup.”
^ Wange ju la HQP.
^ Maine, “huliwa ne ixatua.”
