Itre Huliwa 12:1-25
12 Qaane la ijine cili, hnei Herodra joxu hna nyiqaane axösisine la itre xan hnine la ekalesia.
2 Hnei angeice hna amekötine troa xomi taua, me humuthi Iakobo trejin me Ioane.
3 Nge pine laka, öhne hi angeic ka hape, ka madrine angetre Iudra kowe la hna kuca cili, angeic a hane othi Peteru ju. (Kolo hmekune la itre drai ne feetëne la itre Falawa Ka Pë Levenen.)
4 Hnei Herodra hna othi Peteru me akalabusi angeic, me acile la foa lao gurup ne sooc troa thupë angeic, ase jë la ketre gurup matre ketre. Ala foa lao sooc ngöne la isa ca gurup. Nge hna kuca lai, treqene la ijine troa uti sai Peteru kowe la ka ala nyim, thupene la Paseka.
5 Peteru hë e hnine la kalabus, nge tha mano kö la ekalesia thithi xëwe sai angeic koi Akötresie.
6 Haawe, easenyi hë la ijine tro Herodra a tro sai Peteru, matre ngöne la jidri cili, ka hmulizië Peteru fë la lue cein, nge angeic e nyipine la lue sooc, nge lue xane a cil ngöne la qëhnelö göi troa thupëne la kalabus.
7 Ngo hanawang! mama pi hi la angela i Iehova, ame hna hudrume pi hnine la kalabus. Nge hnene lai angela hna ketr hmidra Peteru me ahlë angeic, me hape: “Canga mejë jë!” Nge mala xane pi hi la lue cein.
8 Önine lai angela: “Heetre jë, nge otreëne jë la lue ibutre i eö.” Angeic a kuca tune ju. Önine hmaca jë hi la angela ka hape: “Heetrëne jë la iheetre ka qea i eö, nge xötrethenge ni jë.”
9 Peteru a lö pi me xötrethenge la angela, ngo nango luelue pe angeic, ke tha nyipi mama kö koi angeic ka hape, nyipici jë kö la hna kuca hnene lai angela, ke ame koi angeic, angeic a pu.
10 Nyidroti a tro sasaithe pi la pane gurup ne sooc, me hnaaluen, nge nyidroti a tro ju kowe la qëhnelö fao ne lö kowe la traon, nge fe xane pi ej. Ame hë la nyidroti e tröne la kalabus, nyidroti a xötrëne jë la ketre gojeny, nge patre ju hi la angela.
11 Matre ame hë la Peteru a wangatrehmekune la ewekë ka traqa, öni angeic: “Enehila, mama cile hnyawa ha koi ni ka hape, hnei Iehova* hna upe la angela i nyidrë troa thepe ni me amele ni qa ngöne la ime i Herodra, me qa ngöne la aja i angetre Iudra.”
12 Nge thupene la hnei Peteru hna mekune la ewekë cili, angeic a tro ju kowe la hnalapa i Maria, lo thine i Ioane, hna hëne ka hape, Mareko, ke e cili hi la hnei itre xan hna itronyi troa thith.
13 Matre ame hë la angeic a fenifeni qëhnelö, hnei Roda, ketre hlue jajinyi hna pane tro troa wang.
14 Nyën a wangatrehmekune ju la aqane ithanata i Peteru, nge pine laka, tru catre la madrine i nyën, tha pane fe kö nyëne la qëhnelö. Hnei nyëne pe hna canga tro troa ithuemacanyine ka hape, Peteru la ka cil ngöne la qëhnelö.
15 Öni angatre jë hi: “Hö ka hmo eö!” Ngo catre fë kö nyën, matre öni angatre jë hi: “Ma angela i Peteru lai.”
16 Ngo Peteru pala hi a fenafena, matre ame hë la angatr a thawa koi angeic me öhnyi angeic, sesëkötre ju hi angatr.
17 Matre angeic a canga nyihatre ju hnei wanakoim troa lapa thaup, me qejepengöne hnyawa koi angatre la aqane thepe angeic hnei Iehova* qa hnine kalabus. Nge öni angeic: “Thuemacanyi Iakobo jë me itre trejin.” Thupene lai, angeic a tro hmaca pi kowe la ketre götran.
18 Nge e hmakany hë, jole menu hë la itre sooc ke thatre kö angatr ka hape, ekaa ha Peteru.
19 Matre amekötine jë hi Herodra troa thelagö Peteru, ngo pine laka, tha öhnyi angeice kö, Herodra a hnyingëne ju kowe la itre sooc, me amekötin troa atë la thupene koi angatr. Ame hnei Herodra hna uti qaa Iudra a tro Kaisaria, me pane lapa e cili.
20 Nge hetre iwesitrë* i angeic memine la angetre Turo me Sidona. Ngo hnene la itre atre cili hna majemine itö a i angatr ngöne la itre götran hna musinën hnei Herodra, matre hnei angatre hna ca mekun me tro koi Balaseto, lo atre thupëne la hnalapa* i Joxu troa sipo ixatua. Ame hnei angatre hna pane ithanata me Herodra göi troa thele tingeting.
21 Nge ngöne la ketre drai ne kola icasikeu la itre atr, hnei Herodra hna heetrëne la hna heetr ne joxu, me të hune la ita ne iameköti, me cainöje koi angatr.
22 Ame hnei angatre hna nyiqaane suene ka hape: “Aqane ewekë ne akötresieti la, ngo tha atre kö!”
23 Haawe, lepi angeice ju hi hnene la angela i Iehova,* ke tha hnei angeice kö hna atrunyi Akötresie; ame hna öni angeic hnene la itre wanak me mec.
24 Ngo kolo pala hi a hlemu trootro la itre trengewekë i Iehova,* nge kolo fe a kökötre la etrune la itretre lapaun.
25 Nge ame koi Banaba me Saulo, thupene la nyidroti a ase kuca la huliwa ne ixatua e Ierusalema, nyidroti a ce bëeke hmaca ju me Ioane, lo hna hëne ka hape, Mareko.
Itre mekun ecahu fen
^ Wange ju la HQP.
^ Wange ju la HQP.
^ Maine, “isi.”
^ Ger., “hnahage i joxu.”
^ Wange ju la HQP.
^ Wange ju la HQP.
