Itre Huliwa 13:1-52
13 Hetrenyi e hnine la ekalesia ne Anetioka la itre perofeta me itre atre ini: Banaba, me Simeona lo hna hëne ka hape, Nigeru, me Lukio lo atre Kurene, me Manaen lo ka ce ini me Herodra joxu, me Saulo.
2 Nge angatr a nyihlue i Iehova* me tha xen, ame hnene la uati hmitrötr hna qaja ka hape: “Pane xomi Banaba jë me Saulo, nge ami nyidroti jë göi troa kuca la huliwa hnenge hna ahnithe koi nyidro.”
3 Haawe, ase jë hi angatre tha xeni me thith, angatr a ati ime ju hui nyidro, me nue nyidro troa tro.
4 Hnene pë hë la uati hmitrötr hna troxomi nyidro Selukia eë, nge thupene lai nyidroti a ea pi a tro Kupero.
5 Ame hë la nyidroti a traqa e Salamis, nyidroti a nyiqaane cainöjëne la trengewekë i Akötresie hnine la itre sunago i angetre Iudra. Nge ce nyidroti me Ioane, atre ixatua.
6 Nge thupene la angatr a ase trongëne la hnapet asë uti hë Pafo, hnei angatr hna iöhnyi memine la ketre atre Iudra, Bariesu la ëjen, ketre trene iöni angeic nge perofeta thoi.
7 Ce angeic memine la konesula,* Segio Paulo, ketre atre ka inamacan. Matre hnene lai konesula hna hë Banaba me Saulo, ke tru la aja i nyidrë troa drenge la trengewekë i Akötresie.
8 Ngo hnene lai trene iöni, lo hna hëne fe ka hape, Eluma (kola hape, “trene iöni”) hna nyiqaane icilekeu me angatr, ke aja i angeic troa apatrene la lapaune ne la konesula.
9 Ame hnei Saulo, lo hna hëne ka hape, Paulo, hna tiqa pi hnei uati hmitrötr, matre angeic a goeë tili Eluma
10 me hape: “Eö atre tiqa hnei thoi me huliwa ka ngazo, eö hi la nekö i Diabolo, nge ithupëjia eö memine la meköt, tro eö a angazon uti hë eu la itre gojenyi ka meköt i Iehova?*
11 Hanawang! Kola të hui eö la ime i Iehova* nge tro hë eö a timek, nge ngöne la ketre hnepe ijin, tha tro hmaca kö eö a öhne la lai.” Ame hna uti ju koi angeic la xaxapo me mit, nge angeic a tro kano me thele atr troa eatrongë angeic.
12 Nge ame hë la kola öhne lai hnene la konesula, nyidrëti a lapaune ju, ke nyidrëti a haine la itre ini qaathei Iehova.*
13 Ame hnei Paulo me itre sinatronge i angeic hna ea qaa Pafo a tro Perega e Pamafulia. Ngo hnei Ioane pe hna nue nyidro me bëeke hmaca Ierusalema eë.
14 Nge nyidroti a tro pi qaa Perega a tro Anetioka e Pisidia. Matre ngöne la drai Sabath, nyidroti a tro ju kowe la sunago me lapa e hnin.
15 Haawe, thupene la kola ase e la Trenge Wathebo me itre hna perofetan, hnene la tane la sunago hna qaja koi nyidro ka hape: “Lue trejin, maine hetre ithuecatre i epone kowe la itre atr, ange qaja jë.”
16 Matre, Paulo a mejë jë me nyihatre hnei wanakoim me hape:
“Nyipunie itre trahmany, angetre Isaraela me itre xa ka xoue Akötresie, ange drenge ju.
17 Hnene lo Akötresi ne la nöje ce, nöje Isaraela, hna iëne la itre qaaqaa hun. Hnei nyidrëti hna adraiëne la nöje celë lo angatr petre kö a mele trenyiwa e Aigupito, me thepe angatr hnene la ime ka catre i nyidrë.
18 Nge ngöne lo 40 lao macatre ne angatr e hnine la hnapapa, hnei nyidrëti hna xomihni angatr.
19 Nge thupene la hna lepe apatrene la sevene lao nöj e Kanana, nyidrëti a nyi edröne jë koi së la nöje cili.
20 Nge hna traqa la itre ewekë cili ngöne 450 lao macatre.
“Thupene lai, hnei nyidrëti hna acile la itre atre iameköti hui angatr, uti hë Samuela perofeta.
21 Ngo hnei angatre hna sipone hmaca troa hetre joxu, matre Akötresieti a acili Saulo ju hui angatr, ene lo nekö i Kiso ne la lapa ne Beniamina. Nge 40 lao macatre ne musi angeic.
22 Ame hnei Akötresieti hna thapa la musi qaathei angeic, me nue pena koi Dravita, lo hnei nyidrëti hna qaja ka hape: ‘Hnenge hna öhnyi Dravita nekö i Iese, atre amadrinëne la hning, nge atre kuca la ajang.’
23 Nge pine la isisinyikeu i Akötresieti me angeic, hnei nyidrëti hna upi Iesu, ketre matra i Dravita, göi troa amelene la itre nekö* i Isaraela.
24 Ngo qëmekene tro Iesu a traqa, hnei Ioane hna pane cainöjëne la bapataiso, hatrene ietra koi angetre Isaraela.
25 Nge ame hë lo Ioane a troa umuthe la huliwa i angeic, öni angeic: ‘Drei ni koi nyipunie? Tha nyidrëti kö ni. Ke hanawang! ame lai ka traqa thupeng, goi tha ijijinge fe troa senge la lue ibutre i nyidrë.’
26 “Haawe, nyipunie itre trahmany, ange trejin nge matra i Aberahama, me nyipunieti mina fe itretre xoue Akötresie, hna upe mekötine koi së la maca ne iamele cili.
27 Ngo tha wangatrehmekune kö angetre Ierusalema me itre joxu i angatr, matre ame lo angatr a ameköti nyidrë, angatre hi lai a eatrëne lo itre ewekë hna qaja amë hë hnei itre Perofeta, nge itre ewekë lai hna e lapan e nöjei Sabath.
28 Nge ngacama pëkö kepine hna öhne göi troa humuthi nyidrë, ngo hnei angatre pe hna sipone iele Pilato troa jei faonyi nyidrë.
29 Haawe, ase jë hi angatre eatrëne lo nöjei ewekë hna perofetane göi nyidrë, angatr a autinyi nyidrëti ju qa hune la sinöe, me ami nyidrë hnine la ketre hua.*
30 Ame hnei Akötresieti hna amejë Iesu hmaca qaa hna mec,
31 nge nyimutre la itre drai ne pane mama nyidrë koi angetre ce elë me nyidrë qaa Galilaia a tro Ierusalema. Haawe, angatre pë hë la itretre anyipici nyidrë qëmekene la itre atr.
32 “Celë hi matre eahuni a cainöjëne koi nyipunie la maca ka loi hna thingehnaeane kowe lo itre qaaqaa së.
33 Hnei Akötresieti hna aeatrëne lai thatraqa së, itre nekö i angatr, ke hnei nyidrëti hna amele Iesu hmaca; thenge lo hna cinyihan ngöne la tusi Salamo, kola hape: ‘Hmunë la neköng, nge enehila, eni hë la keme i hmunë.’
34 Haawe, hnei Akötresieti hna amele angeice hmaca, nge tha tro hmaca kö angeic a hetre ngönetrei ne atr ka troa meci me hnyiqetr. Nge hnei Akötresieti hna anyipicine hmaca lai, lo öni nyidrë: ‘Tro ni a amamane la ihnimi nyipicinge koi eö, tune lo aqane thingehnaeane ni koi Dravita.’
35 Nge hna qaja mina fe ngöne la ketre Salamo ka hape: ‘Tha tro pi kö nyipëti a nue la atre mele nyipici koi nyipë troa öhne la hnyiqetr.’
36 Ame Dravita, hnei angeice lo hna nyihlue i Akötresie* nyipine la itre sine xötre i angeic, nge thupene lai, meci pi hi angeic, ame hna amë la ngönetrei angeic memine lo itre keme i angeic, nge hnyiqetre pi angeic.
37 Ngo ame pe lo atr hnei Akötresieti hna amelene hmaca, tha öhne ju fe kö nyidrëti la hnyiqetr.
38 “Nge itre trejin, loi e tro nyipunieti a atre laka, jëne la atre cili, ijije hë troa cainöjëne ka hape, tro ha köletrije la itre ngazo i nyipunie.
39 Ke hetre ngazo hna thatreine köletrij fene lo Trenge Wathebo i Mose, ngo enehila, maine tro la ketre atr a mejiune kowe la atr cili, tro ha jele meköti angeic.
40 Ngo ame pe, wange pala kö wanga eatre pi koi nyipunie la hna qaja hnene lo itre perofeta ka hape:
41 ‘Ange goeëne ju itre ka ihnyimasai, nge haine jë, nge meci ju, ke ngöne la itre drai i nyipunie, tro ni a kuca la ketre huliwa, ketre huliwa hnei nyipunieti hna thatreine jelenyipicin, ngacama tro ha qejepengöne hnyawa koi nyipunie.’
42 Nge ame hë la Paulo me Banaba a tro qaa lai, hnene la itre atr hna xötrethenge nyidro me sipone troa qaja hmaca la itre ewekë cili koi angatre ngöne la Sabath ka troa xulu.
43 Nge thupene la kola isa ije la hnënge atr, hnene pë hë la itre xa angetre Iudra me itre ka ce hmi* me angatr, itretre nyihlue i Akötresie, hna xötrethenge Paulo me Banaba. Nyidroti e cili a thuecatre i angatre jë troa lapa hnyawa fene la ihnimi gufa i Akötresie.
44 Matre ngöne la Sabath thupen, hnene la itre atrene la traon hna traqa troa drenge la itre trengewekë i Iehova,* ngo tha angatr asë kö.
45 Matre ame hë la angatr a öhne la ka ala nyim, zalu jë hi la itre xa atre Iudra, matre angatr a nyiqaane silitrengathoi ju göi troa cil kowe la itre trengewekë i Paulo.
46 Ame hnei Paulo me Banaba hna isa catr me qaja mekötine koi angatre ka hape: “Nyipiewekë lo troa pane tro fë koi nyipunie la Trengewekë i Akötresie, ngo hnei nyipunieti hna xelen, haawe, nyipunieti hi lai a amamane ka hape, tha ijiji nyipunieti kö la mele ka pë pun. Matre enehila, eahuni hë a qëmeke kowe la itre atre ne fen.
47 Ke hnei Iehova* hna upi nyio me hape: ‘Eni a acili eö nyine lai kowe la fen, matre tro eö a cainöjëne la jëne iameleng, uti hë la cane la fene hnengödrai.’ ”
48 Matre ame hë la kola drenge lai hnene la itre atre ne fen, angatr a madrine jë me atrune la itre Trengewekë i Iehova.* Ame hna mejiune fe hnene la itre ka hmalahnine troa kapa la mele ka pë pun.
49 Nge ketre, kola ha hlemu la Trengewekë i Iehova* ngöne la nöj asë.
50 Matre hnei angetre Iudra hna ukune la itre föe ka trenamo ka hmi, me itre atr ka tru ne la nöj troa cile koi Paulo me Banaba, me helë nyidroti qaa lai.
51 Haawe, nyidroti a jumejume pi la dro ne la lue ihnatrapaca i nyidro me tro Ikonio eë.
52 Nge kolo pala hi a madrin me tiqa hnei uati hmitrötr hnene la itretre dreng.
Itre mekun ecahu fen
^ Wange ju la HQP.
^ Gavena ne la ketre götrane nöj thei angetre Roma. Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
^ Ger., “itin.”
^ Maine, “hua nyine amekunën.”
^ Maine, “eatrëne la aja i Akötresie.”
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
