Itre Huliwa 14:1-28
14 E Ikonio hnei nyidro hna ce lö kowe la sunago ne la itretre Iudra, nge pine laka, lolo catre la aqane ithanata i nyidro, nyimutre la angetre Iudra me Geres ka hane lapaun.
2 Ngo hnene pë hë la itre xa angetre Iudra ka tha lapaune kö hna amejëne la icilekeu, me ukune la itre atre* ne fen troa methinëne la itre trejin.
3 Qa ngöne lai, nyidroti a pane lapa aqeanyi ju e cili, nge jëne la mene i Iehova,* nyidroti a catre cainöj. Nge Akötresieti hi lai a anyipicin kowe la fen la ihnimi gufa i nyidrë, jëne la itre hatren me itre iamamanyikeu hnei nyidrëti hna aijijë nyidro troa kuca.
4 Ngo ame pe, hna thawaluëne la ka ala nyim, ke hetre itre ka nyixöle i angetre Iudra, nge itre xane a nyixöle i ange aposetolo.
5 Matre ame hë la kola thel hnei angetre fen me angetre Iudra me itre tane i angatr troa axösisi Paulo me Banaba, me tranyi nyidro hnei etë,
6 hna canga thuemacanyi nyidro, matre nyidroti a kötre pi a tro Lukaonia, me Lusetara, me Derebe, me ngöne la itre nöje xötreith.
7 Nge e cili, nyidroti a cainöjëne jë la maca ka loi.
8 E Lusetara la ketre atr ka genyi ca nge ka lapa pe hi. Hna hnaho angeice tune lai, nge uti hë enehila, tha ka tro kö angeic.
9 Angeice hi a drei Paulo e cainöj, matre ame hë la Paulo a goeë angeice hnyawa me öhne ka hape, ka lapaune angeic troa aloine la meci angeic,
10 Paulo a qaja catrëne ju ka hape: “Cile jë.” Ame hnene lai trahmanyi hna aca tro mejë jë, me tro.
11 Matre, ame hë la kola öhne lai hnene la ka ala nyim, angatr a suene jë qene Lukaonia ka hape: “Nyi atre hë la itre haze, nge uti hë angatre koi së!”
12 Angatr a hë Banaba jë ka hape, Zeus me Paulo, Heremes ke angeic la ka canga ithanata.
13 Ame hnene la atre huuj i Zeus ka traqa qa ngöne la uma ne hmi i angatr qëmekene la qëhnelö, hna traqa fë la itre kau me itre nyine thaipi qëhnelö, ke pi tro angeic memine la ka ala nyimu a huuj.
14 Ngo ame hë la kola drenge lai hnei Banaba me Paulo, nyidroti a kue zezenyi pi la iheetre ka qea i nyidro, me tro nyipine la ka ala nyim, me qaja catrëne ka hape:
15 “Hnauëne la nyipunie a ujë tun? Ketre lue atre fe hi nyio la, nge lue ka tria fe hi nyio tui nyipunie, ngo nyio pe a cainöjëne la maca ka loi koi nyipunie matre tro nyipunieti a trotrije la itre huliwa ka gufa cili, me tro kowe la Akötresie ka mel, atre xupe la hnengödrai me fen, me hnagejë, me nöjei ewekë e hnin.
16 Ame petre kö ekö, hnei nyidrëti hna nue la itre nöje troa isa kuci mekun.
17 Ngo eje hi laka, hetre ewekë pala hi ka anyipicine la lolo i nyidrë, ke hnei nyidrëti hna hamëne la mani koi nyipunie, me itre ijine menuë xen matre ameji nyipunie me amadrinëne la itre hni i nyipunie.”
18 Ngacama hnei nyidroti hna qaja la itre ewekë cili, ngo jole catre koi nyidro troa sewe angatr troa huuj.
19 Thupene lai, traqa pi hi la angetre Iudra qaa Anetioka me Ikonio troa amenune la ka ala nyim, matre angatr a tranyi Paulo ju hnei etë me huli angeic tröne la traon, ke ame la mekuna i angatr, meci hë angeic.
20 Ngo ame hë la kola cile xötreithi angeic hnene la itretre dreng, cile hmaca jë hi angeic, ame hnei angeic hna lö hmaca hnine la traon. Nge ngöne la drai thupen, angeic a ce bëeke jë me Banaba Derebe eë.
21 Nge ame hë la nyidroti a ase cainöjëne la maca ka loi e cili, me xatuane la itre xan troa xötrethenge Iesu, nyidroti a ce bëeke jë Lusetara eë, me Ikonio, me Anetioka.
22 Nge e cili, nyidroti a thuecatrene jë la itretre dreng,* me upi angatre troa acatrene la lapaune i angatr me hape: “Tro së lai a lö kowe la Baselaia i Akötresie jëne la itre akötr ka nyimutre.”
23 Nge nyidroti a acile jë la itre qatre thup ngöne la itre ekalesia, me thith me tha xen, ame hnei nyidroti hna tro pi me nue angatre koi Iehova,* Akötresie hnei angatre hna mejiune kow.
24 Haawe, nyidroti a trongëne jë la nöje Pisidia me traqa e Pamafulia,
25 nge ase jë hi nyidro cainöjëne la trengewekë i Akötresie e Perega, nyidroti a uti pi a tro Atalia.
26 Nge qaa lai, nyidroti a ea pi a tro Anetioka, lo götran hna thithi sai nyidro hnene la itre trejin matre amanathithine la huliwa i nyidro. Nge enehila, nyidroti a umuthe hnyawa la huliwa cili.
27 Matre ame hë la nyidroti a traqa me ce icasikeu memine la ekalesia, nyidroti a qejepengöne jë la nöjei ewekë hnei Akötresieti hna kuca jëne nyidro, hatrene laka, Akötresie a fe gojenyi kowe la itre atre ne fen troa lapaun.
28 Haawe, nyidroti a lapa aqeanyi ju memine la itretre dreng.
Itre mekun ecahu fen
^ Maine, “u.” Ger., psy·khe’. Wange ju la HQP.
^ Wange ju la HQP.
^ Maine, “u.” Ger., psy·khe’. Wange ju la HQP.
^ Wange ju la HQP.
