Itre Huliwa 15:1-41
15 Ame hna traqa pi la itre xa atre qaa Iudra, nge angatr a nyiqaane inine la itre trejin ka hape: “Maine tha hna xötrehatrenyi nyipunieti kö thenge lo Trenge Wathebo i Mose, tha tro kö a hane amele nyipunie.”
2 Nge ase jë hi Paulo me Banaba pane catre fë mekun me iwesitrë me angatr, axeciëne jë hi laka, tro nyidro me itre xane thei angatr a tro fë la jole* cili koi itre aposetolo me itre qatre thup e Ierusalema.
3 Nge hnene la ekalesia hna nango ce tro me nyidro me canga bëeke hmaca. Ame hnei Paulo me Banaba me itre xan hna tro Foinike me Samaria me qejepengöne hnyawa la aqane saze hmi hnei angetre fen. Nge kola madrin hnene la itre trejin.
4 Ame hë la angatr a traqa e Ierusalema, hnene la ekalesia, me itre aposetolo, me itre qatre thup hna kepe angatre hnyawa. Nge nyidroti a qejepengöne jë la itre ewekë ka lolo hnei Akötresieti hna kuca jëne nyidro.
5 Ngo hnene la itre xa trejin ka traqa qa ngöne la hmi ange Faresaio hna mejë me hape: “Nyipiewekë troa xötrehatrenyi angatr, me upi angatre troa hane trongëne la Trenge Wathebo i Mose.”
6 Hnene pë hë la itre aposetolo me itre qatre thup hna ce icasikeu göi troa waipengöne la jole cili.
7 Matre thupene la hna iqajakeune la itre ithanata* ka nyimutre, Peteru a mejë jë me hape: “Ange trejine fe, atre hë nyipunie qaane lo qaane ka hape, hnei Akötresieti hna ië ni nyipi nyipunie, matre tro la itre atre ne fen a drenge qa ngöne la qënge la maca ka loi, nge tro fe angatr a hane lapaun.
8 Nge ketre, hnei Akötresie, lo atre öhne la itre hni, hna anyipicine lai ngöne lo nyidrëti a hamë uati hmitrötre i angatr, tune lo aqane kuca i nyidrëti koi së.
9 Haawe, ame koi nyidrë tha sisitria kö së hui angatr, matre nyidrëti a ahmitrötrëne la itre hni angatr hnene la lapaune i angatr.
10 Ngo hnauëne la nyipunieti a tupathi Akötresie me nyi ehnefene la itre aposetolo, nge ehnefe hne së me itre qaaqaa së hna thatreine thu?
11 Ngo ame pe, xecie hnyawa koi së laka, hna amele së hnene la ihnimi gufa i Iesu Joxu, nge tui angatre fe.”
12 Qa ngöne lai, lapa thaupu ju hi la iatren, nge angatr a drei Banaba ju me Paulo. Nyidroti a qaja la itre ewekë nyine hain hnei Akötresieti hna kuca kowe la itre atre ne fen jëne nyidro.
13 Ase jë hi nyidro ithanata, öni Iakobo: “Ange trejine fe, drei ni ju.
14 Ase hë Simona qejepengöne hnyawa lo ijine Akötresieti a xötrei ujë kowe la itre atre ne fen, me iëne qaathei angatre la ketre nöj thatraqane la ëje i nyidrë.
15 Nge ka ihmeku memine la hna qaja hnene lo itre perofeta, lo kola hape:
16 ‘Thupene lai, tro ni a bëeke hmaca me acile hmaca la uma i Dravita ka kei hë. Tro hmaca ni a xupe ej.
17 Matre tro la munën ne la nöje celë me itre atr qa ngöne la nöjei nöj a thele Iehova. Nge troa hëne la itre atre cili ngöne la ëjeng, öni Iehova,* atre eatrëne la itre ewekë cili,
18 itre ewekë hna qaja ha ekö.’
19 Nge ketre, tha ajange* kö troa ajolëne la itre atre ne fen ka ujë koi Akötresie,
20 ngo tro pe a cinyihane koi angatre troa iananyi memine la itre ewekë hna löth hnene la kuci idrola, me kuci ngazo,* me itre öni hna jele nyinawan,* me madra.
21 Nge qaane ekö, hetre itre ka anyipici Mose ngöne la itre traon asë, ke kola e la Trenge Wathebo i angeic hnine la itre sunago e nöjei Sabath.”
22 Qa ngöne lai, hnene la itre aposetolo, me itre qatre thup, memine la ekalesia asë, hna ce axeciëne troa upe la itre xan qaathei angatr troa ce tro me Paulo me Banaba Anetioka eë; angatr a upi Iudra jë lo hna hëne ka hape, Basabasa me Sila. Lue trejin lai ka elemekene la huliwa.
23 Itre aposetolo me itre qatre thup a cinyihane jë la ketre tus me iupi fë jëne angatr, kola hape:
“Eahun itre aposetolo me itre qatre thup, kowe la itre trejin ne Anetioka, me Suria, me Kilikia thei angetre fen. Bozu ange trejin!
24 Hne huni hna drenge laka, hetre itre xan the huni ka ajolë nyipunie hnene la itre trengewekë i angatr, me thele troa apatrene la lapaune i nyipunie, ngo pëkö ewekë hne huni hna amekötin nyine tro angatr a tro fë.
25 Ngo ame pe, hne huni hna ce axeciëne troa iëne la lue trejin, me upi nyidro koi nyipunie. Nge ce nyidroti memine la lue trejine hnimina, ene Paulo me Banaba,
26 lue atre lai ka nue la mele* i nyidro kowe la ëje ne la Joxu së Iesu Keriso.
27 Eahuni fe a upi Iudra me Sila matre tro fe nyidro a hane anyipicin.
28 Ketre, hne huni memine la uati hmitrötr hna ce mekune laka, tha nyipiewekë kö troa sili xa ehnefe i nyipunie hune la itre ewekë ka nyipiewekë celë:
29 Troa iananyi memine la itre ewekë hna huujëne kowe la itre idrola, me madra, me itre öni hna jele nyinawan, me kuci ngazo.* Haawe, maine tro nyipunieti a catre iananyi memine la itre ewekë cili, tro ha lolo la mele i nyipunie. E ketre ijine hë!”
30 Ame hë la angatr a tro me traqa e Anetioka, angatr a icasinekeune ju la gurup asë me hamë angatre la tus.
31 Matre thupene la hna e la tus hnene lai gurup, nyudreni a madrine ju kowe la ithuecatre hna hamën.
32 Nge pine laka, lue perofeta Iudra me Sila, hnei nyidro hna xatuane me thuecatrene la itre trejin jëne la itre cainöj.
33 Haawe, thupene hë la hnei nyidro hna pane lapa me angatr, hnene la itre trejin qa cili hna nue nyidro troa bëeke hmaca kowe lo itre trejine ka upi nyidro.
34 ——
35 Ngo lapa ju pe hi Paulo me Banaba e Anetioka, nge ce nyidro memine la itre xan, angatr a ce cainöjëne la maca ka loi ne la trengewekë i Iehova,* me inine la itre atr.
36 Thupene la itre hnepe drai, öni Paulo jë hi koi Banaba ka hape: “Ka loi e tro hmaca nyiso a bëeke kowe lo itre traon me wange trongëne lo itre trejin hnei nyiso hna cainöjëne kow la trengewekë i Iehova,* me wange ka hape, tune kaa jë angatr.”
37 Ame hna xecie ju koi Banaba troa hane ce tro me Ioane, lo hna hëne ka hape, Mareko.
38 Ngo xele Paulo ma tro Ioane a hane sine la tronge i nyidro, ke ase petre hi angeice lo trotriji nyidro e Pamafulia, nge goi tha sine fe angeice la huliwa ne cainöj.
39 Matre hnei Paulo me Banaba hna icatrë, nge nyidroti a isa ije pi; Banaba a xomi Mareko jë Kupero eë.
40 Nge Paulo a xomi Sila jë, me tro thupene la hna thithi sai angeic hnei itre trejin matre tro Iehova* a amamane la ihnimi gufa i nyidrë.
41 Haawe, angeic a trongëne jë la nöje Suria me Kilikia, me acatrene la lapaune ne la itre ekalesia e cili.
Itre mekun ecahu fen
^ Maine, “iwesitrë.”
^ Maine, “iwesitrë.”
^ Wange ju la HQP.
^ Maine, “mekun.”
^ Ger., por·neiʹa, kola qaja la nöjei pengöne aqane kuci ngazo. Wange ju la HQP.
^ Maine, “tha hna aneni madran.”
^ Maine, “u.”
^ Ger., por·neiʹa, kola qaja la nöjei pengöne aqane kuci ngazo. Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
