Itre Huliwa 16:1-40
16 Traqa ha Paulo e Derebe me e Lusetara. Nge e cili hi la ketre atre dreng, Timoteo la ëjen, nekö ne la ketre föe ne Iudra ka lapaun, nge atre Geres la kem.
2 Hna qaja aloinyi Timoteo hnene la itre trejin ne Lusetara me Ikonio.
3 Ame hnei Paulo hna qaja la aja i angeic, ene la tro Timoteo a ce tro me angeic. Matre angeic a xöji Timoteo ju pine la angetre Iudra ne la itre götrane cili, ke atre hnyawa hi angatr ka hape, nekö ne la ketre atre Geres nyën.
4 Matre Paulo me itre sinatronge i angeic a xötrëne la itre nöj, me hamën kowe la itre trejin la hna amekötin hnei ange aposetolo me itre qatre thup ne Ierusalema matre trongën.
5 Qa ngöne lai, kolo pala hi a kökötre o drai la itre ekalesia me catre ngöne la lapaun.
6 Nge angatr a tro ju Ferugia me ngöne la nöje Galatia asë, ke uati hmitrötr a wathebo angatre troa cainöjëne la trengewekë i Akötresie ngöne la itre götrane nöj e Asia.
7 Ame hnei angatre hna uti a tro Musia me thele troa lö e Bithunia, ngo hnei Iesu jëne la uati hmitrötr hna sewe angatr.
8 Ame hnei angatre hna tro* Musia me uti a tro Troas.
9 Nge e jidr, hnei Paulo hna meköle goeëne la ketre ewekë. Kola cile la ketre trahmanyi qaa Makedonia, nge angeic a sipone iele Paulo ka hape: “Traqa pi e Makedonia troa xatua hun.”
10 Haawe, ase jë hi angeic meköle goeëne lai, hne huni hna isine troa tro Makedonia, ke atrehmekune hi huni laka, hnei Akötresieti hna upi huni troa tro fë la maca ka loi koi angatr.
11 Qaa Troas, hne huni hna ea meköt a tro Samotheraki, nge ngöne la drai thupen, hne huni hna ea Nekapoli eë;
12 nge qaa lai, traqa ju hi eahuni e Filipi, ketre traon i angetre Roma,* nge celë hi traone ka tru ne la nöje Makedonia.
13 Matre ngöne la drai Sabath, hne huni hna tro tröne la traon me traqa kowe la ketre hneopegejë. Nge e cili la ketre hnë hmi, matre hne huni hna pane lapa ju me nyiqaane ithanata memine la itre föe ka icasikeu.
14 Nge hnene la ketre föe ka nyihlue i Akötresie, Lidia la ëjen, nge atre salemë maano ka maeangön e Thuataira, hna drenge hnyawa, nge Iehova a fe la hni eahlo matre kapa hnei eahlo la hna qaja hnei Paulo.
15 Haawe, thupene la kola bapataiso eahlo me hnepe lapa i eahlo asë, öni eahlo jë hi: “Maine ka xecie hë koi nyipunie ka hape, ka mele nyipici ni koi Iehova, haawe, trohemi kowe la umang, nge pane lapa ju.” Ame hnei eahlo hna kepe hun.
16 Ngo ame ju hi la eahuni a tro kowe la hnë hmi, hne huni hna ixelë memine la ketre hlu, ketre nekö jajinyi hna löth hnei dremoni. Atreine hi nyëne canga qaja la itre ewekë ka tha traqa pala kö, matre kola kepe thupen hnene la itre maseta i nyën.
17 Nge nyëne pala hi a xötrethenge hun, me qaja catrëne ka hape: “Angatre hi la itre hlue ne la Akötresie Ka Hmitrötr, nge angatr a cainöjëne la jë ne iamele.”
18 Nge nyimu drai ne nyëne a kuca tune lai, matre hmanono hë Paulo, nge angeic a thaujë pi me qaja kowe la dremoni ka hape: “Eni a qaja hnyawa koi eö, ngöne la ëje i Iesu Keriso, tro pi qaathei nyën.” Ame hna tro pi lai dremoni.
19 Ngo ame hë la kola öhne hnene la itre maseta i nyëne laka, patre hë la jëne kepe mani i angatr, angatr a xolouthi Paulo ju me Sila, me tro sai nyidro kowe la hna maketr, me uti sai nyidro kowe la itre trene mus.
20 Nge angatr a uti sai nyidroti ju fe kowe la itretre isenyin, me hape: “Nyidroti a agomegomëne la traon; nge lue atre Iudra nyidro.
21 Nge nyidroti fe a inine la itre ewekë hna wathebone koi hun, angetre Roma.”
22 Ame hnene la ka ala nyimu hna elëhni koi nyidro, nge hnei itretre isenyine hna tha zezene la itre iheetre i nyidro, me amekötine troa hna jia koi nyidro.
23 Ase jë hi angatr anyimua lepi nyidro, angatr a kuië nyidroti pi hnine kalabus, me upe la atre thupë kalabus troa thupë nyidroti hnyawa.
24 Qa ngöne lai, angeic a kuië nyidroti ju ngöne la kalabus ka he hnin, me alöne la lue ca i nyidro ngöne la inehe ne iaxösisi.*
25 Ngo e hnenyipajidri hë, Paulo me Sila a nyiqaane thithi ju me nyima atrunyi Akötresie, nge kola drei nyidro hnei itre hna akalabusin.
26 Ame hna traqa pi la ketre sa atraqatr me jumejume la kalabus, ene pe fe pi hi la itre qëhnelö, nge uke xane pi hi la itre cein.
27 Matre ame hë la kola hlë hnene la atre thupë kalabus, me öhne la itre qëhnelö a hna fe asë, angeic a hule pi la taua i angeic göi troa hnöjua, ke ame la mekuna i angeic, kötre asë hë la itre hna akalabusin.
28 Ngo canga sue jë hi Paulo ka hape: “The tune kö lai, eahuni asë la!”
29 Angeic a sipo laame jë, me nyinyape kowe la götrane hna akalabusi Paulo me Sila, ame hnei angeice hna hmengöhmengöne me sa iwatingöne ca qëmeke i nyidro.
30 Angeic a tro xomi nyidroti pi qaa lai, me hape: “Nemene la nyine tro ni a kuca matre tro ni a hane mel?”
31 Öni nyidro: “Mejiune jë koi Iesu Joxu nge tro ha amele eö, me hnepe lapa i eö.”
32 Thupene lai, nyidroti a ithanatane jë la trengewekë i Iehova* koi angeic, me hnepe lapa i angeic asë.
33 Angeic a xomi nyidroti ju ngöne la jidri cili, me köle la itre eatre i nyidro. Ame hnei angeic me hnepe lapa i angeic asë hna ce xomi bapataiso.
34 Thupene ju hi lai, angeic a troxomi nyidroti jë kowe la hnalapa i angeic, me hnëkë xeni koi nyidro, nge angeic me hnepe lapa i angeic a ce madrin laka, lapaune hë angeic koi Akötresie.
35 Nge e lai hë, hnene la itretre isenyine hna upi itretre thup troa qaja ka hape: “Nue nyidroti pi.”
36 Matre hnene pë hë lo lai atre thupë kalabus hna thuemacanyi Paulo me hape: “Hnene la itretre isenyine hna upe la itretre thup troa nue epon. Haawe, lö pi, nge tro jë cememine la tingeting.”
37 Ngo öni Paulo jë hi koi angatr: “Hnei itretre isenyine lo hna lepi nyio qëmeke i nöjei atr, ngo tha pane kootrë nyio pe ke lue atre Roma nyio. Ase jë hi lai, hnei angatr hna kuië nyio hnine kalabus. Nge enehila, angatr a mekune ka hape, tro hi angatr a upe juetrë nyio? Pëkö! Upi angatre jë pe troa thei nyio, me lö sai nyio qaa la.”
38 Ame hnene la itretre thup hna qajaqaja lai kowe la itretre isenyin, matre angatr a xou ju, ke lue atre Roma nyidro.
39 Angatr a traqa pi koi nyidro me qejemenu, me lö sai nyidro qaa hnine la kalabus, me sipone iele nyidro troa tro qa ngöne la traon.
40 Ngo thupene la nyidroti a trotrije la kalabus, nyidroti a tro ju kowe la hnalapa i Lidia; nge e cili, öhne ju hi nyidroti la itre trejin, matre nyidroti a thuecatre i angatre jë me tro.
Itre mekun ecahu fen
^ Maine, “Musia thenge.”
^ Ketre traon tröne e Italie, nge itre atren a kepe eloin qa ngöne laka, traone i angetre Roma.
^ Wange ju la HQP.
^ Wange ju la HQP.
