Itre Huliwa 17:1-34
17 Nyidroti a Amefipoli thenge me Apolonia me traqa e Thesalonika. Nge e cili hi la ketre sunago i angetre Iudra.
2 Nge tune lo hnei Paulo hna majemin, hnei angeic hna lö e cili, me ini angatr la itre hna Cinyihan ngöne la köni Sabath,
3 me qejepengön me anyipicine koi angatre jëne la itre hna Cinyihan ka hape, nyipiewekë tro la Keriso a pane akötr. Nge tro ha amele nyidrëti hmaca, matre öni angeic: “Ame lai Iesu hnenge hna qejepengöne koi nyipunie, nyidrëti hi la Keriso.”
4 Qa ngöne lai, hna hane fe lapaun hnene la itre xan e angatr, nge ce angatre me Paulo me Sila, nge ala nyimu fe la angetre Geres ka nyihlue i Akötresie, nge ce angatr, me itre xa föe ka hlemu ne la nöj.
5 Ame hna zalu hnei angetre Iudra, matre angatr a ce hëne jë la itre atre ka ngazo, itre ka pëjol ngöne la hna maketr, me thele troa agomegomëne la traon. Angatr a ce uti pi kowe la hnalapa i Iasona me thel agö Paulo me Sila, göi troa huli nyidro kowe la ka ala nyim.
6 Nge pine laka, tha öhnyi nyidroti kö hnei angatr, angatr a uti sai lasona jë me itre trejin kowe la itre trene mus, me suene ka hape: “Traqa ha the së lo itre ka agomegomëne* la fen,
7 nge hna kepe angatre hnyawa hnei Iasona. Angatr la itretre icilekeu memine la itre hna amekötin hnei Kaisara, me itre ka qaja ka hape, hetre ketre joxu kö, Iesu la ëjen.”
8 Ame hna agomegomëne la ka ala nyimu me itre trene mus hnene la itre trengewekë cili.
9 Ngo thupene lai, hnei Iasona me itre trejin hna hamë mani thenge la etrune hna athip, göi troa nue angatr. Ame hna nue angatre hnene la itre trene mus.
10 Hnene pë hë la itre trejin hna canga upi Paulo me Sila e jidr troa tro Berea. Matre ame hë la nyidroti a traqa e cili, nyidroti a tro meköti ju kowe la sunago i angetre Iudra.
11 Nge sisitria kö la thiina i angatr hui angetre Thesalonika, ke angatr a canga kapa madrine la trengewekë i Akötresie, nge o drai, angatr a sine thel ej matre wange ka hape, nyipici kö la hnei angatre hna dreng.
12 Haawe, ala nyimu la itre atr thei angatr ka hane lapaun, nge hetrenyi mina fe la itre xa angetre Geres ka hlemu, itre trahmanyi me föe.
13 Ngo ame hë la kola drei mejen hnei angetre Iudra e Thesalonika laka, Paulo fe a cainöjëne la trengewekë i Akötresie e Berea, angatr a traqa pi troa ukune la ka ala nyimu troa icilekeu.
14 Ame hnene la itre trejin hna canga upi Paulo troa uti kowe la hnagejë, nge lapa ju pë hë Sila me Timoteo.
15 Nge hnei Paulo me itre ka ce tro me angeic hna isa ije e Athenai, ngo qëmekene tro angatr a bëek, hnei Paulo hna pane ahnithe koi angatre la maca i angeic koi Sila me Timoteo ka hape, nyipiewekë tro nyidroti a canga xötrethenge angeic.
16 Nge ame ngöne la ijine Paulo a treqe nyidro e Athenai, elë jë hi la hni angeic ke ka catrehnine la kuci idrola ngöne la traone cili.
17 Matre hnei angeic hna nyiqaane xatuane la angetre Iudra me itre xa atr e hnine la sunago troa trotrohnine la itre hna Cinyihan, nge e nöjei drai, angeic a ithanata memine la itre atr ngöne la hna maketr.
18 Ame hnene la itre Epikureo* me itre Setoiko* hna nyiqaane thele iwesitrë me Paulo. Matre öni itre xan: “A kola qeje nemene hnene la ka ithanata lapa?” Nge öni itre xane fe: “Ma ketre atre qeje haze trenyiwa.” Ngo kola qaja lai, ke Paulo a cainöjëne la maca ka loi i Iesu memine la mele hmaca.
19 Matre angatr a xomi angeice jë kowe la Areopago* me hape: “Pane qaja jë koi hun, nemene la ini ka hnyipixe hnei eö hna traqa fë?
20 Ka ketrepengöne kö la itre ini hnei eö hna ithanatan, nge pi tro huni a hane trotrohnin.”
21 Ke ame la angetre Athenai me itre trenyiwa ka mel* e cili, huliwa i angatre pe hi la troa porotrikëne me drenge la itre ewekë ka hnyipixe.
22 Ame hnei Paulo hna cile nyipine la Areopago me hape:
“Angetre Athenai fe, öhne hi ni laka, ka hmi catre nyipunie, nge tru catre kö la hnei nyipunieti hna xouene la itre haze i nyipunie hune la nöjei atr asë.
23 Ke eje hi, ame lo eni a trongëne la traon, me goeëne la itre ewekë ne hmi i nyipunie, hnenge hna öhne la ketre ita ne huuj hna sija ka hape: ‘Thatraqane la Akötresie Hna Thatre.’ Haawe, ame lai Akötresie hnei nyipunieti hna thatre me thili kow, eni hi la a troa qejepengöne koi nyipunie.
24 Ame la Akötresie ka xupe la ihnadro me nöjei ewekë ka lapan, Nyidrëti hi la Joxu ne hnengödrai me fen, nge tha ka lapane kö nyidrë la itre uma ne hmi hna xupe hnei atr;
25 nge tha nyipiewekë kö koi nyidrë la ixatua i atr, ke ka hetrenyi asë hi nyidrë. Nge nyidrëti hi la atre hamë mel, me mano ne mel, me nöjei ewekë asë kowe la nöjei atr asë.
26 Nge hnei nyidrëti hna axulune la nöjei nöj asë qa ngöne la atre ka cas, matre tro angatr a lapane la fene hnengödrai, me ami ijine la nöjei ewekë asë, me ami ifegone la götrane hna lapan hnei itre atr.
27 Celë hi matre tro la itre atr a thele Akötresie me öhnyi nyidrë, ke eje hi, tha ka nanyi kö nyidrë koi së.
28 Easë a mel me enij hnei nyidrë, nge tune lo hna qaja hnene la itre xa ka sili trengewekë thei nyipunie, ‘Itre nekö* i nyidrëti së.’
29 Nge pine laka, itre nekö* i Akötresieti hi së, tha tro pi kö sa mekune ka hape, ceitu i Akötresie me gool, me sileva, me etë, maine tune la ketre ewekë hna mekun me xupe hnei atr.
30 Ngo nyipici laka, hnei Akötresieti hna pane thinge la luemeke i nyidrë, ke itre atr a kuca thatre la itre ewekë cili, ngo ame enehila, nyidrëti a qaja kowe la nöjei atr ka hape, nyipiewekë troa ietra.
31 Ke ase hë nyidrëti sa la drai ne troa amekötine la fene hnengödrai asë thenge la meköt. Nge hnei nyidrëti hna iën la ketre atr thatraqane la huliwa cili, me anyipicine lai hnene la hna amele angeice hmaca.
32 Ngo ame ju hi la angatr a drenge la kola qeje mele hmaca, itre xan a ihnyimasai, nge öni itre xan: “Drei eö hmaca jë huni e ketre ijin.”
33 Matre Paulo a trotriji angatre pi,
34 ngo hetre itre xane kö ka xötrethenge Paulo, nge ka lapaun. Matre Dionusio la ketre e angatr, ketre atre amekötin ngöne la Areopago, memine la ketre föe, Damari la ëjen, me itre xane ju kö.
Itre mekun ecahu fen
^ Maine, “enienijën.”
^ Gurup ka xötrethenge Epikur, ketre filozof ka inine la itre atr troa thele pala hi la itre nyine iamadrinë.
^ Gurup ka xötrethenge Zeno, ketre filozof ka inine la itre atr troa mele thenge la inamacan me tha nyipiewekëne la akötr me madrin.
^ Wetr e Athenai hna icasikeu hnene la hnakootr ka tru i angatr.
^ Maine, “ka ihamë.”
^ Maine, “kuku.”
^ Maine, “kuku.”
