Itre Huliwa 18:1-28
18 Thupene lai, angeic a tro pi qaa Athenai a tro Korinito.
2 Nge öhne ju angeic la ketre atre Iudra hna hnahon e Ponoto, Akula la ëjen. Angeic a xötrei traqa qaa Itali memine la föi angeic, Perisila, ke hnei Kalaudio hna helëne la itretre Iudra qaa Roma. Matre Paulo a tro ju koi nyidro.
3 Nge pine laka, casi hi la huliwa i angatr, angeic a lapa ju thei nyidro me ce huliwa me nyidro, ke itre ka cai itat angatr.
4 Nge Paulo a cainöj* e nöjei Sabath hnine la sunago, me thue ajane la angetre Iudra me angetre Geres kowe la maca hnei angeic hna tro fë.
5 Ngo ame hë la kola traqa hnei Sila me Timoteo qaa Makedonia, kolo pala hi a tru hnei huliwa i Paulo göi troa cainöjëne la trengewekë i Akötresie, me anyipicine kowe la angetre Iudra laka, Iesu hi lo Keriso.
6 Ngazo pe, itre atre pala hi a icilekeu me angeic, me ithanata akökötrenyi koi angeic, matre Paulo a jumejume pi la iheetre i angeic me hape: “E traqa pë hë la ketre ewekë koi nyipunie, zö i nyipunieti pë hë lai. Ngo tha zönge hmaca kö la madra i nyipunie. Matre qaane enehila, tro hë ni a tro kowe la itre atre ne fen.”
7 Ame hnei angeic hna tro pi qaa lai,* me lö kowe la hnalapa ka itretrengekeu memine la sunago. Hnalapa ne la ketre atre nyihlue i Akötresie, Tito Iuseto la ëjen.
8 Hnei Kerisepo mina fe, tane la sunago memine la hnepe lapa i angeic asë, hna hane lapaune koi Joxu. Nge ala nyimu fe la angetre Korinito ka hane lapaun thupene la hna drenge la maca ka loi.
9 E jidri hë, meköle goeëne jë hi Paulo la ketre ewekë, Joxu a qaja koi angeice ka hape: “The xou kö, catre jë pe ithanata, nge the lapa thaupu kö,
10 ke ce eni me eö, nge pëkö ca atr ka troa akötrë eö; ke ala nyimu catre la itre atreng ngöne la traone celë.”
11 Matre angeic a lapa ju e cili koi ca macatre nge sikisi lao treu, me inine la trengewekë i Akötresie kowe la itre atr.
12 Nge ame lo kola konesula* hnei Galiona e Akaia, hnene la angetre Iudra hna ce thele troa akötrë Paulo, matre angatr a xomi angeice jë kowe la ita ne iameköti
13 me hape: “Hnene la atre ce hna ukune la itre atr troa cile kowe la hna qaja hnine la trenge wathebo göi aqane troa nyihlue i Akötresie.”
14 Ngo ame ju hi la Paulo a troa ithanata, canga öni Galiona jë hi koi angetre Iudra ka hape: “Maine hnene ju la atre ce hna tria maine kuca la ketre ngazo ka tru, tro hë ni lai a xomihni nyipunie angetre Iudra, me drei nyipunieti hnyawa.
15 Ngo maine kolo hi a isi ithanata, maine isi pi ëj, maine ihmönyinyi pine la Trenge Wathebo i nyipunie, ketre wange ju kö nyipunie, ke xele ni ma amekötine la itre jole cili.”
16 Haawe, angeic a helë angatre pi qa ngöne la ita ne iameköti.
17 Ame hnei angatre hna xolouthi Sosetheni, tane la sunago, me thaucë angeic qëmekene la hnakootr. Nge goi tha lö hnine fe hnei Galiona.
18 Haawe, thupene la hnei Paulo hna lapa aqeanyi e cili, angeic a iahni jë memine la itre trejin, me ea Suria eë. Ce angeic me Perisila me Akula; nge hnei angeic hna xöj acone la he i angeic e Kenikerea, ke hetre ewekë hnei angeic hna sisinyi fë koi Akötresie.
19 Matre angatr a traqa pi e Efeso, nge Paulo a inue pi me nyidroti e cili, me lö hnine la sunago me xatuane la angetre Iudra troa trotrohnine la itre hna Cinyihan.
20 Ame hnei angatre hna thele troa alapa Paulo, ngo tha kapa kö angeic.
21 Ngo angeic a iahni jë fe me angatr me hape: “Maine aja i Iehova,* tro hmaca ni a bëeke koi nyipunie.” Haawe, angeic a ti he ju me tro qaa Efeso,
22 me xep e Kaisaria. Angeic a elë jë* troa pane ibozu memine la ekalesia, ame hnei angeic hna uti hmaca pi Anetioka eë.
23 Paulo a pane lapa ju e cili, nge thupene lai, angeic a trongëne jë la itre götran ne la nöje Galatia me Ferugia troa thuecatrene la itretre dreng asë.
24 Ame hna traqa pi e Efeso la ketre atre Iudra hna hnahon e Alesanedria, Apolo la ëjen. Angeice la ketre atr ka maca troa ithanata, nge ka atrepengöne hnyawa la itre hna Cinyihan.
25 Hna ini* angeic ngöne la itre jë i Iehova,* nge uati hmitrötr a huliwane la hni angeic, ene pe, angeic a ithanatane ju la ini göi Iesu, nge meköti la itre ini hnei angeice hna hamën, ngazo pe, casi hi la hnei angeic hna atre, a kolo bapataiso i Ioane.
26 Angeic a nyiqaane hamë ini jë hnine la sunago, matre ame hë la kola drei angeic hnei Perisila me Akula, nyidroti a xomi angeice jë me qejepengöne hnyawa koi angeice la itre jë i Akötresie.
27 Nge pine laka angeic a ajane troa tro Akaia, hnene la itre trejin hna cinyiany kowe la itretre dreng troa kepe angeice hnyawa. Matre ame la angeic a traqa e cili, nyimu atr hnei angeic hna xatuan, ene lo itre ka lapaun hnene la ihnimi gufa i Akötresie.
28 Nge qëmekene la nöjei atr asë, angeic a catre amamane ka hape, ka tria la itre ini i angetre Iudra, ngo jëne la itre hna Cinyihan, angeic a anyipicine laka, Iesu hi la Keriso.
Itre mekun ecahu fen
^ Maine, “xatua angatre troa trotrohnin.”
^ Ene la sunago.
^ Gavena ne la ketre götrane nöj thei angetre Roma. Wange ju la HQP.
^ Wange ju la HQP.
^ Maine jë angeic a elë Ierusalema.
^ Maine, “ini hna iqajakeun.”
^ Wange ju la HQP.
