Itre Huliwa 19:1-41
19 Ame lo ijine Apolo e Korinito, hnei Paulo hna trongëne la itre götrane nyipine la nöje Asia, me uti a tro Efeso. Nge e cili, öhne ju hi angeic la itre xa atre dreng,
2 matre angeic a hnyinge jë koi angatre ka hape: “Ase fe kö nyipunieti kapa la uati hmitrötr lo nyipunieti a nyiqaane lapaun?” Öni angatre jë hi: “Pine nemen? Tha ase kö huni dreng ka hape hetre uati hmitrötr.”
3 Hnyinge hmaca jë hi Paulo ka hape: “Nemene la bapataiso i nyipunie?” Sa jë hi angatre ka hape: “ Bapataiso i Ioane.”
4 Öni Paulo jë hi: “Ioane lo a bapataiso nyine hatrene ietra, me qaja kowe la itre atr troa mejiune kowe la atre ka traqa thupei angeic, ene Iesu.”
5 Drenge ju hi angatre lai, angatr a bapataiso jë ngöne la ëje Iesu Joxu.
6 Matre Paulo a ati ime ju hui angatr, ame hna uti pi la uati hmitrötr koi angatr, nge angatr a nyiqaane ithanatane jë la itre qene hlapa trenyiwa me perofetan.
7 Nge ala 12 angatr asë.
8 Ngöne la köni treu, hnei Paulo hna traqa lapa kowe la sunago me catre ithanata, me hamë cainöj göne la Baselaia i Akötresie, matre hmala pi la hni ne la itre atr.
9 Ngo pine laka, xele pala hi itre xan ma lapaun,* nge angatr a qajangazone qëmekene la ka ala nyimu lo hmi hna hape, Gojeny, Paulo a trotriji angatre pi, me xome la itretre drenge me hamë ini o drai ngöne la ketre hnë ini e Tunaro.
10 Lue macatre ne angeice a kuca tune lai, matre ame lo itretre lapane la nöje Asia, angetre Iudra me angetre Geres, hnei angatre hna drenge la maca i Joxu.
11 Nge Akötresieti pala hi a kuca la itre iamamanyikeu ka tru jëne la lue ime i Paulo,
12 ke ame la kola tro fë koi itre trene meci la itre iheetre me sine maano ka ketr la ngönetrei Paulo, canga patre ju hi la itre meci angatr, nge kolo fe a lötriji itre xan hnei itre dremoni.
13 Matre hnene fe lo itre xa angetre Iudra ka tro lapa, nge ka helë dremoni trootro hna tupathe troa qaja la ëje i Iesu Joxu kowe la itre hna löth. Öni angatr: “Eni a qaja hnyawa koi eö ngöne la ëje i Iesu lo hnei Paulo hna cainöjën, tro pi.”
14 Ame la itre xa ka kuca lai, tre ene lo sevene lao neköi Sekema ketre atre huuje ne Iudra.
15 Ngo sa jë hi lai dremoni koi angatre ka hape: “Atre Iesu hi ni, nge atre fe hi ni ka hape drei lae Paulo, ngo drei kö epun?”
16 Qa ngöne lai, hnene lai atr hna adremonin hna sesë koi angatr me ngaa angatr, thupei ketre matre ketre, nge angatr a kötre pë iuti pi me tro qa ngöne lai uma.
17 Ame hna atre lai hnene la nöjei atr asë, angetre Iudra me angetre Geres ka mel e Efeso, matre angatr a xou, nge kolo pala hi a hlemu la ëje i Iesu Joxu.
18 Nge ala nyimu la itretre lapaun ka traqa, me qajaqaja la itre tria me itre ngazo i angatr.
19 Nge ala nyimu fe thene lo itre ka kuci haze ka traqa fë la itre itusi i angatr, me dreuthetrije qëmekene la ka ala nyim. Ame la angatr a e la thupen, traqa koi 50 000 lao manie sileva.
20 Haawe, ketre pengöne kö la aqane kökötr me hlemu loi la trengewekë i Iehova* e cili.
21 Thupene lai, xecie ju hi koi Paulo ka hape, e ase hë angeic trongëne la lue nöje Makedonia me Akaia, tro hë angeic a tro Ierusalema. Öni angeic: “Ase jë ni pane tro cili, tro fe hë ni a tro Roma.”
22 Matre angeic a canga upe pi a tro Makedonia lo lue atre ixatua, Timoteo me Eraseto, ngo pane lapa ju pë hë angeic e Asia.
23 Nge ngöne la ijine cili, mejë jë hi la icilekeu pine la hmi hna hape, Gojeny.
24 Ke e cili hi la ketre atr, Demetio la ëjen, atre huliwa sileva me kuci neköi tulu ne la uma hmitrötr i Arethemis.* Jëne angeic, tru la mani hna kapa hnene la itre ka ce huliwa me angeic.
25 Matre angeic a icasikeu angatre jë, memine lo itre xa ka huliwa tui angeic me hape: “Ange trejin, atre hi nyipunie laka, easë a trenamo hnene la huliwa celë.
26 Ngo enehila öhne hë nyipunie, nge drenge fe hë nyipunie laka, zö ne lai Paulo cili matre saze pi la mekuna ne la ka ala nyim, nge angatr a kapa lo hnei angeice hna qaja ka hape, ame la itre haze hna kuca hnei wanakoim, tre tha itre nyipi haze kö lai. Nge eje hi laka, tha hna traqa hmekuje kö e Efeso, ngo easenyi hë matre haöthe pi la nöje Asia.
27 Nge ame hë la pune lai, tro ha patre la huliwa së, nge goi tro fe a jele uma ka pëpengöne la uma ne hmi i Arethemis, haze së. Nge ketre, tro ha patre la elolo ne la haze së, lo hna nyihluene hnene la nöje Asia asë me itre atr e cailo fen.”
28 Matre ame hë la kola drenge lai, angatr a elëhni ju me nyiqaane suene ka hape: “Ka draië kö la Arethemis i ange Efeso!”
29 Ame hna gomegome pi la traon, matre itre atren asë a nyinyape pi kowe la hnë kuci elo, me huli Gaio me Aritako lue atre Makedonia nge sinatronge i Paulo.
30 Matre Paulo a tro ju kowe la ka ala nyim, ngo sewe angeice ju hi hnene la itretre dreng.
31 Nge hnene mina fe la itre ka hnëkë elo nge sinee i Paulo hna iupi fë maca koi angeic ka hape, tha loi kö tro angeic a thele troa lö kowe la hnë kuci elo wanga meci pi angeic.
32 Ke eje hi, hnene la ka ala nyimu hna isa suene la itre mekuna i angatr, matre kola imenumenu la ka ala nyim. Ngo ame thene la itre ka traqa, ala nyimu la itre ka thatre la kepin matre traqa pi angatr e cili.
33 Ame hnei itre xane hna xomi Alesanedro qa ngöne la ka ala nyim, nge angetre Iudra a uku angeice jë, matre angeic a nyi hatre ju hnei wanakoim, ke aja i angeice troa ithanata.
34 Ngo ame ju hi la angatr a wangatrehmekune laka, atre Iudra angeic, lue hawa ne sue kö angatre ka hape: “Ka draië kö la Arethemis i ange Efeso!”
35 Nge thupene la hna ahumune la ka ala nyimu hnene la ketre trene mus, öni angeic: “Nyipunie itre trahmanyi ne Efeso, drei la ka thatre ka hape, ame la traon ne Efeso, tre celë hi ka thupëne la uma ne hmi i Arethemis, nge hna hamë së qaa hnengödrai la hnasaatr i eahlo.
36 Haawe, pine laka, nyipici hi lai, lapa hnyawa ju nyipunie nge the enienije menu kö.
37 Nge ketre, hnei nyipunieti hna traqa fë la lue atre ce, ngo tha lue ka atrekënö kö hnine la uma hmitrötr, nge tha lue ka jelengazone la haze së.
38 Haawe, maine hetre jol nyine troa seng hnei Demetio me itre sine huliwa i angeic, hetre drai lo hna sa thatraqane lai, nge hetre konesula* mina fe. Haawe, nue angatre pi troa isa iutisai.
39 Ngo maine hetre ketre jol hmaca kö, loi e troa isenyine hnene la ka ala nyim, hmekune lo drai hna sa hnei itre trene mus.
40 Nge loi e troa tro tune lai, ke wanga uti sai së jë pine agomegomëne menune la traon, nge nyipici, pëkö kepin enehila matre troa icasikeune la ka ala nyim.”
41 Haawe, ase jë hi angeice ithanata, angeic a isa upe jë la ka ala nyim.
Itre mekun ecahu fen
^ Maine, “axetine la hni angatr me tha mejiun.”
^ Wange ju la HQP.
^ Maine, “Diana.”
^ Gavena ne la ketre götrane nöj thei angetre Roma. Wange ju la HQP.
