Itre Huliwa 2:1-47
2 Ame ngöne la drai ne feetëne la Penetekos, hnei angatre hna ce icasikeu ngöne la ketre götran.
2 Ame hna drenge la ketre mejene qaa hnengödrai, kösë eny ka hnahna catr, nge kola mexeme hnine la uma asë, ene lo uma hnei angatr hna lapan.
3 Nge mama ju hi hui itre xan la itre ukahlokine eë kösë itre thinem, ame hna xötre koi ketre me ketre, matre isa hetrenyi angatre asë.
4 Qa ngöne lai, tiqa pi hi angatr hnei uati hmitrötr, matre angatr a nyiqaane ithanatane la nyimu qene hlapa, ene la hnei ua hna aijijë angatr troa qaja.
5 Nge ngöne la ijine cili, ala nyimu la itretre Iudra ka traqa qaa cailo, me pane lapa e Ierusalema.
6 Haawe, ame lo kola mexem, hnene la ka ala nyimu hna casi me menumenu, ke angatr a drenge la kola ithanatane la qene hlapa i angatr hnene la itretre dreng.
7 Nge angatr a isa sesëkötr me hai, matre öni angatr: “Goeën, tha angetre Galilaia kö la ka ithanata?
8 Ngo hnauëne kö laka, easë a isa drenge la sipu qene hlapa së?*
9 Angetre Parathia, me Madai, me Elama, me angetre lapane la Mesopotamia, me angetre Iudra, me Kapadokia, me angetre Ponoto e Asia,
10 me angetre Ferugia, me Pamafulia, me Aigupito, me angetre lapan la Libua ezine Kurene, me angetre traqa qaa Roma, ene la angetre Iudra me itre sine hmi*,
11 me angetre Kerete, me Arabia— Hne huni hna drei angatr e ithanatane la itre ewekë nyine haine i Akötresie ngöne la sipu qene hlapa hun.”
12 Nyipici, angatr a isa hai me ihnyingënekeune ka hape: “Nemene la aliene lai?”
13 Ngo itre xane pe a hnyima fë la itretre dreng me hape: “Ma tru la hnei angatre hna iji nyipi waina.”*
14 Ngo mejë jë hi Peteru memine lo ala Levin me qaja catrëne ka hape: “Angetre Iudra fe, me nyipunie itretre lapa e Ierusalema, drenge ju la itre trengewekëng.
15 Ame la itre atr cili, tha hmo kö angatr hnei ka haitr, tune la hna mekun hnei nyipunie, ke hnaakönine hawa* petre hi la.
16 Ngo angatre pe a eatrëne lo hna perofetan hnei Ioela lo kola hape:
17 ‘ “Ngöne la itre drai ne la pun,” öni Akötresie, “Tro ni a nue la uang kowe la nöjei pengöne atr, nge tro la itre nekö i nyipunie, trahmanyi me jajinyi a perofeta, nge tro fe la itre nekönatr trahmanyi a meköle goeën la itre ewekë, nge tro la itre qatre i nyipunie a pu,
18 nge ngöne la ijine cili, tro fe ni a nue la uang kowe la itre hlueng, trahmanyi me föe, matre tro angatr a hane perofeta.
19 Nge tro ni a amamane la itre ewekë nyine hain e hnengödrai, me itre hatren e celë fen—madra, me eë, me so ne eë.
20 Tro ha miti la jö, nge tro la treu a madra qëmekene troa traqa la drai atraqatr i Iehova.*
21 Nge tro ha amelene la nöjei atr ka hëne la ëje i Iehova.” ’*
22 “Angetre Isaraela fe, drenge ju la itre trengewekë celë: Hnei Akötresie hna amamane hnyawa laka, nyidrëti la atre upi Iesu ne Nazareta, me aijijë Iesu troa kuca la itre iamamanyikeu, me itre huliwa nyine hain nyipi nyipunie, nge atre hi nyipunieti lai.
23 Nge thenge lo aja i Akötresie me itre hnei nyidrëti hna qaja amë hë, hna othi Iesu. Nge hna nue nyidrë kowe la itre atr ka ngazo, matre nyipunieti pë hë a jei faonyi nyidrëti jë me humuthi nyidrë.
24 Ngo hnei Akötresie hna thepe Iesu qa ngöne la akötre* ne la mec, ke thatreine hmaca kö troa othi Iesu hnei mec.
25 Nge öni Dravita lo göi Iesu ka hape: ‘Hnenge pala hi hna ami Iehova* qëmekeng, ke nyidrëti ngöne la götrane macang matre tha tro kö ni a hnehengazo.
26 Celë hi matre kola madrine la hning, me madrine la qëng. Nge tro ni* a lapa hnine la mejiun.
27 Ke tha tro kö nyipëti a nue ni* ngöne la Hua,* nge tha tro pi kö nyipëti a nue la atre mele nyipici troa öhne la hnyiqetr.
28 Hnei nyipëti hna ini ni la itre jë ne mel; nge troa atraqatre la madrineng troa öhnyi* nyipë.’
29 “Itre trahmany, itre trejin, tha wathebo kö troa ithanatane la pengöi Dravita, keme së laka, meci hë nyidrë, nge ase hë kelemi nyidrë, nge the së hi la hua i nyidrë.
30 Ngo pine laka, perofeta nyidrë, nge atre hi nyidrëti lo hnei Akötresie hna sisinyi ka hape, tro la ketre matra* i nyidrë a lapane la therone i nyidrë,
31 matre hnei Dravita ha hna öhne me ithanatane la kola amele Keriso hmaca, me hape, tha hna nue nyidrëti kö hnine la hua, nge goi tha hnyiqetre fe la ngönetrei i nyidrë.
32 Matre hnei Akötresieti hna amele Iesu, nge öhne asë hi së lo.
33 Ketre, pine laka, hna ami nyidrë ngöne la götrane maca i Akötresie, nge hnei nyidrëti hna kapa la uati hmitrötr hna thingehnaean hnei Keme i nyidrë, haawe, nyidrëti a ce thawa pi me easë, tune la hnei nyipunieti hna drenge me goeën.
34 Ngo tha elë kö Dravita hnengödrai eë, ngo öni nyidrëti pe: ‘Iehova* a qaja kowe la Joxung: “Lapa ju ngöne la götrane macang
35 uti hë la tro ni a amë la itre ithupëjia me hmunë fene la lue ca i hmunë.” ’
36 Haawe, loi e xecie hnyawa kowe la nöjei hnalapa ne Isaraela ka hape, hnei Akötresieti hna acili nyidrë troa Joxu me Keriso, lo Iesu hnei nyipunieti hna jei faon.”
37 Nge ame ju hi la angatr a drenge lai, hna ketr la itre hni angatr, matre öni angatr koi Peteru me itre xa aposetolo ka hape: “Itre trejin, nemene ju hë la nyine tro huni a kuca?”
38 Sa jë hi Peteru koi angatre ka hape: “Ietra ju, nge bapataiso jë ngöne la ëje i Iesu Keriso, matre köletrije la itre ngazo i nyipunie, nge tro hë nyipunieti a kapa la ahnahna hna hamëne gufan, ene la uati hmitrötr.
39 Ke ame la itre hna thingehnaean, tre, thatraqai nyipunie me itre nekö i nyipunie, me kowe la itre ka lapa gaa nany, ene la nöjei atr hnei Iehova* Akötresi së hna hëne koi nyidrë.”
40 Nge hnei Peteru hmaca kö hna ithanata me anyipicin, me iele angatr ka hape: “Iananyi pi nyipunie memine la xötre celë ka qali thiina.”
41 Nge ame asë hi la itre ka kapa madrine la itre trengewekë celë, tre hna bapataiso angatr, matre ngöne la drai cili, nyixane hmaca jë la itretre dreng hnene la ala* 3 000.
42 Ame hnei angatre hna qale catre kowe la itre ini hna hamën hnei itre aposetolo, me ce icasikeu,* me ce xen, me ce thith.
43 Nge ketre, nyimutre la itre hatren me itre iamamanyikeu hna kuca hnene la itre aposetolo. Matre ame la itre* ka öhne lai, angatr fe a hane xoue Akötresie.
44 Nge hnene la itre ka xötrei bapataiso hna cas me ce thawa la itre ewekë i angatr,
45 me salemëne la itre mo me itre hlapa i angatr, me ce thawa me itre xan thenge la ka pë thei angatr.
46 E nöjei drai, tha patre kö angatre ngöne la uma ne hmi, nge casi hi la mekuna i angatr, nge angatr a ce xen ngöne la ketre uma me ketre uma, me ce thawa madrin la itre kemeji angatr hna hamëne qa ngöne la hni ka pexej,
47 me atrunyi Akötresie. Ame hna qaja aloinyi angatre ju hnene la nöjei atr, nge ngöne la ijine cili, Iehova* pala hi a nyixane la etru i angatr hnene la itre hna amelen.
Itre mekun ecahu fen
^ Maine, “qene hlapa hna hnaho së ngön.”
^ Wange ju la HQP.
^ Maine, “waina ka hnyipixe.”
^ kola easenyi 9:00 e hmakany.
^ Wange ju la HQP.
^ Wange ju la HQP.
^ Maine jë, “otren.”
^ Wange ju la HQP.
^ Ger., “ngönetreing.”
^ Maine, “u.” Ger., psy·kheʹ. Wange ju la HQP.
^ Maine, “Hedris.” Wange ju la HQP.
^ Maine, “qëmeke i nyipë.”
^ Ger., “ketre ka fetra qa ngöne la wene thulumat i angeic.”
^ Wange ju la HQP.
^ Wange ju la HQP.
^ Maine, “u.” Ger., psy·kheʹ. Wange ju la HQP.
^ Maine, “ithawakeun.”
^ Maine, “u.” Ger., psy·kheʹ. Wange ju la HQP.
^ Wange ju la HQP.
