Itre Huliwa 20:1-38
20 Ame hë la kola tingetinge la traon, Paulo a tro ju kowe la angetre dreng me pane thuecatre i angatr me iahni me angatr. Nge thupene lai, angeic a nyiqaane jë la tronge i angeic a tro Makedonia.
2 Angeic a trongëne jë la itre götrane cili, me hamë ithuecatre kowe la itretre dreng ka mel e cili, ase jë hi lai, traqa pi hi angeic e Geres.
3 Matre köni treu hnei Paulo hna pane lapa e cili, ngo pine laka, angetre Iudra a thele troa humuthi angeic, angeic a ea pi a tro Suria. Nge e cili, mekune jë hi angeic troa bëeke hmaca a tro Makedonia.
4 Nge ce angeic me Sopatero nekö i Pirusa atre Berea, me Aritako, me Sekuno atre Thesalonika, me Gaio atre Derebe, me Timoteo, nge qaa ngöne la nöje Asia, Tukiko me Trofimo.
5 Hnene la itre atre cili hna tro pa me treqe huni e Troas;
6 Ngo hnei nyio hna tro qaa Filipi thupene la drai ne la Itre Falawa Ka Pë Levenen, nge tha traqa ju kö koi faifi lao drai nge ce nyio hë me angatr e Troas; ame hne huni hna lapa e cili koi sevene lao drai.
7 Matre ngöne la pane drai ne la wiik, hne huni hna ce traqa itronyi troa xen, nge Paulo a nyiqaane ithanata jë koi angatr ke angeic a troa tro la drai thupen. Ame hnei angeic hna cainöj uti hë e hnenyipajidr.
8 Nge ame ngöne la hnahag ka he koho hne huni hna icasikeu ngön, xalaithe hi la itre laame cil.
9 Matre Paulo pala kö a cainöj nge kola lapa të hune mamala la ketre nekö trahmany, Eutiko la ëjen. Hmuli pi hi nyën e cili, ame hnei nyëne hna kei ezi pi me mala qa ngöne la hnaakönine etaz, matre ame hë la kola wai nyën, öhne ju hi angatr laka, meci hë nyën.
10 Haawe, Paulo a canga uti pi me tro koi nyën, me haluthi nyën, matre öni Paulo jë hi: “Loi ju hë hnei nyipunie hna nyi mejen, mele* hmaca ha nyën.”
11 Matre elë hmaca jë hi Paulo a thupe falawa me xen. Nge thupene la hnei angeic hna pane ithanata aqeanyi uti hë kaqa ne lai, angeic a tro pi.
12 Ame hnei angatre hna xome lo lai nekö trahmany, nge keukawa hnyawa la itre hni angatr.
13 Nge hne huni hna tro kowe la he me ea a tro Asoso, hnë tro huni lo a itronyi me Paulo, tune lo hne huni hna isapui, ke pi tro pe kö angeic a trongë ihnadro a tro kowe lai.
14 Matre ame hë la angeic a elë hune he e Asoso, eahuni a ea pi a tro Mitulene.
15 Nge ngöne la drai thupen, hne huni hna tro qaa lai me xep e Kios, me tro hmaca kö la hnaaluene drai a tro Samo, nge e Mileto ngöne la hnaakönine drai.
16 Ngo hnei Paulo hi hna mekun troa tro ananyin e Efeso matre tha tro kö angeic a lapa aqeanyi e Asia. Ke angeic a isine matre, e ijij, tro angeic a traqa e Ierusalema hmekune la Feet Ne Penetekos.
17 Nge qaa Mileto, hnei Paulo hna iupi fë maca a tro Efeso troa hëne la itre qatre thup ne la ekalesia.
18 Nge ame hë la angatr a traqa koi angeic, öni angeice jë hi: “Atre hnyawa hi nyipunie la aqane ujënge koi nyipunie qaane lo pane drai ne eni e Asia,
19 laka, hnenge hna huliwa koi Joxu ceitu me ketre hlu, nge hnenge hna ipië,* me treij, me cile kowe la itre itupath qaathene la angetre Iudra ka thele troa humuthi ni.
20 Nge ketre, tha hnenge kö lo hna cipane la itre ini nyine loi koi nyipunie, ngo hnenge hna hamë cainöje koi nyipunie ngöne la gaa tru atr, me ngöne itre hnalapa trootro.
21 Nge hnenge fe hna catre cainöjëne koi angetre Iudra me angetre Geres troa ietra koi Akötresie, me lapaune koi Iesu Joxu së.
22 Ngo hanawang! uati hmitrötr a troxomi ni a tro Ierusalema, nge thatre kö ni la ewekë ka troa traqa koi ni e cili.
23 Ngo ame pe, ngöne la itre traon, eje pala hi a anyipicine koi ni ka hape, kola treqe ni hnei kalabusi me akötr.
24 Ngo eje hi laka, nyine ue* la meleng* e tha traqa kö ni kowe la hna ie, nge e tha umuthe kö ni la huliwange qaathei Iesu Joxu, ene la troa anyipicine la maca ka loi ne la ihnimi gufa i Akötresie.
25 “Nge hanawang! xecie hnyawa ha koi ni laka, ame thene la itre hnenge hna cainöje kow, pëkö ala casi ka troa öhne hmaca la iqëmekeng.
26 Celë hi matre, enehila, nyipunie la itretre anyipicine laka, tha zönge hë la madra ne la itre atr,
27 ke tha ase pi kö ni cipane la eamo* i Akötresie koi nyipunie.
28 Haawe, wai nyipunieti pala kö, nge wange pala kö la itre mamoe, ke hnei uati hmitrötr hna acili nyipunie troa itretre thup, matre thupëne la ekalesia i Akötresie, lo hnei nyidrëti hna itön hnene la madra ne la Nekö i nyidrë.
29 Nge atre hë ni laka, e meci hë ni, tro ha mejë la itre luko* nyipi nyipunie, nge tha tro kö angatr a hnime la itre mamoe.
30 Nge e nyipi nyipunie, tro ha mejë la itre ka troa qaja la itre ewekë ka qaliqali, matre hule koi angatr la itretre dreng.
31 Haawe, catre jë hmek, nge mekune kö laka, ngöne lo köni macatre, e lai me jidr, hnenge pala hi hna eamo nyipunie fë la itre trenge timidra.
32 Ngo enehila, eni a ahnithi nyipunie koi Akötresie me kowe la maca ne ihnimi gufa i nyidrë, maca lai ka troa aegöcatrenyi nyipunie, me aijijë nyipunie troa kapa la thupen nyipine la itre hna ahmitrötrën.
33 Nge tha hnenge kö hna piine la sileva, me mani, me iheetre i ketre.
34 Ke atre hi nyipunieti lo laka, hnene la lue ime celë hna huliwa thatraqane la itre ajang, me itre aja ne la itre ka ce me eni.
35 Nge ase hë ni amamane koi nyipunie ka hape, celë hi aqane tro nyipunie a huliwa catr göi troa xatuane la itre ka kucakuca, me mekune pala hi la itre trengewekë i Iesu Joxu, lo öni nyidrë: “Sisitria catre kö la madrine ne la atre ham, hune la atre kapa.”
36 Nge ame ju hi la angeic a ase qaja la itre ithanata celë, angatr a ce sa iwatingöne ca pi me thith.
37 Ame hnei angatr asë hna itreijeny, me haluthi Paulo* me dremi angeic.
38 Nge angatr a isa hleuhleu pine la hnei angeice hna qaja ka hape, tha tro hmaca kö angatr a öhne la iqëmeke i angeic. Ame hnei angatre hna ce tro ju me angeic kowe la he.
Itre mekun ecahu fen
^ Maine, “u.” Ger., psy·kheʹ. Wange ju la HQP.
^ Maine, “ ipië la mekun.”
^ Maine, “gufa koi ni.”
^ Maine, “u.” Ger., psy·kheʹ. Wange ju la HQP.
^ Maine, “aja.”
^ Kösë kuli wael, ngo ka pi öni.
^ Ger., “kei kowe la nyinawa i Paulo.”
