Itre Huliwa 21:1-40
21 Ase jë hi eahuni pane inue me angatr, hne huni hna ea meköt me traqa e Koso, nge ngöne la drai thupen e Rodo. Nge qaa lai, eahuni a tro pi Patara eë.
2 Ame hë la eahuni a öhne la ketre he ka tro Foinike, eahuni a tithe jë me tro.
3 Matre eahuni a öhnyi Kupero ju ngöne la götrane mi,* me kötr a tro Suria me xep e Turo, ke e cili la hnë qathë.
4 Nge e cili, hne huni hna thele me öhne la itretre dreng me pane lapa koi sevene lao drai. Nge hnene la uati hmitrötr matre angatr a anyimua hmekë Paulo ka hape, tha tro kö a tro Ierusalema.
5 Ngo ame ju hi la eahuni a ase iwai e cili, eahuni a sisedrëne ju la tronge hun, nge hnei angatr asë, ce me itre föe me nekönatr, hna tro sai hun tröne la traon. Ame hne huni asë hna ce sa iwatingöne ca me thith hune la hnangöni,
6 me iahni me angatr isa ala cas. Thupene lai, hne huni hna elë jë hune he, nge angatr a bëeke hmaca jë pe kowe la isa hnalapa i angatr.
7 Nge hne huni pë hë hna umuthe la tronge hun me tro qaa Turo a tro Tolemai. E cili, eahuni a iöhnyi ju me itre trejin me lapa koi ca drai me angatr.
8 Ame hë la drai thupen, eahuni a tro pi a tro Kaisaria me lö hnine la hnalapa i Filipo atre tro fë la maca ka loi, nge ketre ne lo ala seven. Matre eahuni a lapa ju thei angeic.
9 Angeice la keme ne la foa lao jajinyi* ka perofeta.
10 Nge thupene la itre hnepe drai hne huni hna pane lapa e cili, traqa pi hi qaa Iudra la ketre perofeta, Agabo la ëjen.
11 Angeic a traqa pi koi hun me xome la beletre i Paulo, me hnöthe la lue ca me lue ime i angeic, me hape: “Önine la uati hmitrötr: ‘Ame la atrekë beletren, tro ha othi angeice tune la hnei angetre Iudra e Ierusalema. Nge tro angatr a nue angeic kowe la ime ne la itre atre ne fen.’ ”
12 Ame ju hi la eahuni a drenge lai, hne huni me itre ka ce me eahuni hna nyiqaane sipone iele Paulo, matre tha tro kö angeic a tro Ierusalema.
13 Öni Paulo jë hi: “Hnauëne la nyipunieti a treij me thele troa ahacene la hning? Loi e tro nyipunie a atre laka, othi ni ju hë maine humuthi ni pena pine la ëje i Iesu Joxu, ngo ka hnëkë hë ni.”
14 Nge pine laka, xele kö angeic ma tro huni a cipa angeic, eahuni a kei thenge ju* me hape: “Ka loi kö troa kuca la aja i Iehova.”*
15 Ame hë la drai thupen, hne huni hna hnëkëne la tronge hun me nyiqaane tro Ierusalema.
16 Nge hnene la itre xa atre dreng qaa Kaisaria hna hane sine la tronge hun, me tro sai huni kowe la hnalapa hne huni hna troa lapan, ene la hnalapa i Nasona e Kupero, atre dreng ka hekö hë.
17 Matre ame hë la eahuni a traqa e Ierusalema, atraqatre la madrine ne la itre trejin troa kepe hun.
18 Matre ame hë la drai thupen, hne huni me Paulo hna ce tro koi Iakobo, ce angeic me itre qatre thup asë.
19 Nge Paulo a pane ibozu jë me angatr, ame hnei angeic hna qejepengöne hnyawa la itre ewekë hnei Akötresieti hna kuca koi angetre fen jëne la huliwa i angeic.
20 Ame ju hi la angatr a drenge lai, angatr a atrunyi Akötresieti jë, ngo öni angatre koi angeice ka hape: “Trejine fe, hanawang, atre hi eö laka, hetre itre thauzane lao atre Iudra ka lapaun, nge atre fe hi eö laka, ka tru catre koi angatre la Trenge Wathebo.
21 Ngo hnei angatre hna drenge gojenyine la kola qeje eö laka, eö a silitrengathoi Mose me inine lai kowe la angetre Iudra ka mel ngöne la itre xa nöj. Eö a wathebo angatre troa xötrehatrene la itre nekö i angatr me trongëne lo itre hna majemin.
22 Matre tro sa ue la? Ke tro hë angatre lai a atre ka hape, eö hë e celë.
23 Haawe, kuca jë la hne huni hna qaja: The huni la foa lao trahmany ka sisinyi koi Akötresie.
24 Xomi nyudreni jë, nge ce tro jë matre ahmitrötrë nyipunie thenge kö lo aqane kuca, nge wai nyine nyi thupen göi nyudren matre troa cin apane la itre he i nyudren. Haawe, tro hë a xecie kowe la nöjei atr laka, tha ka nyipici kö lo itre ithanata hna drenge göi eö, ngo ka meköti la aqane ujë i eö, nge ka tru fe koi eö la Trenge Wathebo.
25 Ngo ame pë hë koi itretre lapaun thei angetre fen, ase hë huni lo axecië mekun me iupifë tusi matre tro angatr a iananyi memine la itre ewekë hna huujëne koi itre idrola, me madra, me itre hna jele nyinawan,* me kuci ngazo.”*
26 Matre ame hë la drai thupen, hnei Paulo hna xomi angatr me ce ahmitrötrë angatre me angeic thenge lo hna majemin. Ame hnei angatr hna ce lö kowe la uma ne hmi, me wange la drai ne fenesi la ijine iahmitrötrë me tro fë huuj göi angatr isa ala cas.
27 Ame hë la kola troa umuthe lo sevene lao drai ne iahmitrötrë, hnei angetre Iudra qaa Asia hna öhnyi Paulo hnine la uma ne hmi, nge angatr a ahmone jë la ka ala nyim, matre angatr a ce xolouthi Paulo ju,
28 me hape: “Angetre Isaraela fe, ce xöle jë me eahun! Angeice hi la atre inine kowe la nöjei atr troa icilekeu memine la nöje së, memine la Wathebo së, me götrane ce. Nge hanawang, goi tha metrötrëne fe angeice la götrane gaa hmitrötre celë, ke angeic a traqa fë la angetre Geres.”
29 Angatr a qaja tun, ke hnei angatre lo hna öhnyi Paulo me Trofimo atre Efeso hnine la traon, matre angatre fe a mekune ka hape, hnei angeice hna lö sai Trofimo hnine la uma ne hmi.
30 Haawe, gomegome hë la traon asë, nge kola icacaxenyi la itre atr me xolouthi Paulo, me huli angeic tröne la uma ne hmi. Ame hna thinge ju la qëhnelö.
31 Matre ame ju hi la angatr a thele troa humuthi angeic, kolo fe hi a drei mejen hnene la tane ka tru ne la itre sooc ka hape, gomegome hë la traon asë.
32 E cili, hnene la tane ka tru hna hëne la itre sooc me itre tane i angatr me nyinyape kowe la ka ala nyim. Matre ame hë la kola öhne la itre sooc memine lo lai tane ka tru, tha lepi Paulo ju hi hnene la ka ala nyim.
33 Ame hnene lai tane ka tru hna easenyi Paulo me xolouthi angeic, me iupe troa ceinë angeic hnei lue cein. Thupene lai, nyidrëti a hnyinge jë koi angeic ka hape, drei angeic, nge nemene la hnei angeice hna kuca.
34 Ngo itre xan a suene la ketre ewekë, nge itre xane la ketre, matre pëkö ewekë hnene lai tane ka tru hna trotrohnin, ke tru la mejen. Haawe, nyidrëti a iupi jë troa tro sai angeic kowe la ketre hnahage i sooc.
35 Ngo ame la Paulo a traqa kowe la hnë elë, hnene la itre sooc hna kapa trongë angeic, ke itre atr a thele troa lepi angeic.
36 Matre itre atr a ixötrethenge me suene ka hape: “Humuthi angeice pi!”
37 Nge pine laka, kola ha lö sai Paulo kowe la hnahage i sooc, canga öni angeice jë hi: “Ijijinge kö troa qaja la ketre ewekë koi nyipë?” Sa jë hi lai tane ka hape: “Ka qene Geres eö?
38 Nga tha eö kö lo atre Aigupito ka amejë icilekeu nge ka elemekene la 4 000 lao atre ihumuth hnine la hnapapa?”
39 Sa jë hi Paulo ka hape: “Waea atre Iudra ni, nge ka mele ni e Taraso ketre traon ka tru ne Kilikia. Ngo eni a sipo nyipë maine ijij, eni a pane pi ithanata kowe la ka ala nyim.”
40 Ase jë hi kapa la sipo i Paulo, angeic a cile jë ngöne la hnë elë, me nyihatr hnei wanakoim kowe la ka ala nyim. Ame hna pë ju hi mejen, matre angeic a ithanata jë koi angatr qene Heberu, me hape:
Itre mekun ecahu fen
^ Maine, “götran hna xep hnei he.”
^ Maine, “ka tha iatre petre kö me trahmany.”
^ Ger., “lapa thaup.”
^ Wange ju la HQP.
^ Maine, “öni hna humuth nge tha hna pane anenine kö la madra.”
^ Ger., por·neiʹa, kola qaja la nöjei pengöne aqane kuci ngazo. Wange ju la HQP.
