Itre Huliwa 22:1-30
22 “Ange trejine fe me nyipunie itre kem, drenge ju la tro ni a qaja la pengönge koi nyipunie.”
2 Matre ame ju hi la angatr a drei angeic e qene Heberu, pë ju hi mejen, matre öni angeic:
3 “Atre Iudra ni, nge hna hnaho ni e Taraso e Kilikia. Ngo hnenge pe hna ini ngöne la traone celë thei Gamaliela, matre hna ini ni troa trongëne hnyawa la Wathebo ne la itre qaaqaa së. Nge ketre, ka catre ni ekö huliwa koi Akötresie, tune la aqane kuca i nyipunie enehila.
4 Nge hnenge lo hna axösisine me humuthe lo itre ka sine la hmi hna hape, Gojeny, me akalabusine la itre trahmanyi me föe.
5 Itre ewekë lai hna anyipicin hnene la atre huuje ka sisitria, memine la lapa ne la itre qatre ne la nöj, ke hnenge lo hna kapa qaathei angatre la itre tusi thatraqane la itre trejin ne Damaseko. Matre eni lo a tro troa othe la itre xan e cili, me bëeke sai angatr Ierusalema eë, me kootrë angatr.
6 Nge ame lo eni a tro Damaseko e hnaipajö, hna aca tro hudrume pi la lai qaa hnengödrai, me wië kaca xötreithi ni,
7 matre kei pi ni e kuhu hnadro, nge drenge ju hi ni la kola ewekë koi ni me hape: ‘Saulo, Saulo, hnauëne la eö a axösisi ni?’
8 Öninge jë hi: ‘Drei nyipë Joxu?’ Sa jë hi nyidrë ka hape: ‘Iesu, lo atre Nazareta hnei eö hna axösisin.’
9 Nge ame lo itre ka ce me eni, öhne fe hi angatre la kola hudrum, ngo tha drenge pe angatre la kola ewekë koi ni.
10 Qa ngöne lai öning: ‘Nemene hö la nyine tro ni a kuca Joxu?’ Sa jë hi lai Joxu ka hape: ‘Tro meköti jë a tro Damaseko, nge e cili, tro ha qaja koi eö la nöjei ewekë nyine tro eö a kuca.’
11 Ngo pine laka, ti hë la luemekeng hnene la ehudrumene la lai, hna ea trongë ni a tro Damaseko hnene lo itre sinetrongeng.
12 Nge hnene la ketre atr, Anania la ëjen, atre xoue Akötresie me trongëne la Trenge Wathebo, nge atr hna qaja atrun hnene la angetre Iudra ka mel e cili
13 hna traqa koi ni. Angeic a cile ezinge me hape: ‘Saulo, trejin, goe hmaca pi!’ Ame hnenge hna goe me öhnyi angeic.
14 Öni angeic: ‘Hnene la Akötresi ne la itre qaaqaa së hna ië eö matre tro eö a atre la aja i nyidrë, me goeëne la Atre Ka Meköt, me drenge la aqane ewekë i nyidrë.
15 Nge tro hë eö a ketre atre anyipici nyidrë kowe la nöjei atr asë, me qaja koi angatre la itre ewekë hnei eö hna öhne me dreng.
16 Ngo enehila, hnauëne laka, eö pala kö a huli hmitr? Mejë jë, nge bapataiso jë, nge pine laka troa hë eö ngöne la ëje i Iesu, tro hë Akötresieti a köletrije la itre ngazo i eö.’
17 “Nge ame hë la eni a bëeke Ierusalema eë me thith hnine la uma ne hmi, hnenge hna meköle goeëne la ketre ewekë,
18 kola qaja koi ni hnene la Joxu ka hape: ‘Lolojë! Canga tro pi qaa Ierusalema, xele kö itre atr ma kapa la hnei eö hna anyipicine göi ni.’
19 Matre öninge jë hi: ‘Joxu atre hnyawa hi angatr ka hape, eni hi ekö la ketre ka majemine akalabusine lo itretre lapaune koi nyipë ngöne la itre sunago trootro.
20 Nge ame lo kola neni la madra i Setefano, hlue i nyipë, eni hi lo a cile me kapa la hna kuca, nge eni fe hi lo a thupëne lo itre iheetre ka qea ne lo angetre humuthi angeic.’
21 Ngo öni nyidrë: ‘Trojë pe, ke tro ni a upi eö kowe la itre nöje gaa nany.’ ”
22 E cili, xele ju hi angatr ma drei angeic, matre angatr a sue jë me hape: “Nyine humuthe la atre ce, ke tha ijiji angeice kö troa mel.”
23 Nge pine laka, angatr a sue, me trije la itre iheetre ka qea i angatr, me jume draië la xaxau,
24 hnene la tane ka tru ne la itre sooc hna iupe troa lö sai Paulo kowe la hnahage i sooc, me hnyinge koi angeic, me wameucë angeic göi troa atre la kepine matre sue jë angatre tune lai.
25 Ngo ame hë la angatr a ameköle angeic troa wameucën, öni Paulo jë hi kowe la tane isi ka cil e cili ka hape: “Ijije kö tro nyipunieti a wameucëne la ketre atre Roma nge tha pane kootrëne kö?”
26 Haawe, ame hë la kola drenge lai hnene lai tane isi, angeic a tro pi troa qaja kowe lo tane ka tru me hape: “Nemene ju hë la hnei nyipëti hna troa kuca? Ke atre Roma angeic.”
27 Ame hnene la tane ka tru hna tro koi Paulo me hape: “Atre Roma eö?” Sa jë hi angeice ka hape: “Öö.”
28 Önine jë hi lai tane ka tru ka hape: “Ame laka, atre Roma jë ni, ke tru catre la mani hnenge hna kuiën.” Ngo sa jë hi Paulo ka hape: “Ame ni, hnaho ni pi a atre Roma.”
29 Ame hnene lo itre ka troa hnyinge me wameucë Paulo hna ananyi angeic. Nge xou ju fe hi lai tane isi ke atre Roma Paulo, nge ase hë angatr othi angeic.
30 Matre ame hë la drai thupen, hnene lo lai tane hna nue Paulo, me upe la itre tane i angetre huuj memine la Hnakootre Ka Tru i Angetre Iudra troa icasikeu. Ame hnei angeice hna upi Paulo troa cile nyipi angatr, ke aja i angeice troa atre la kepin matre itretre Iudra a upezö Paulo.
