Itre Huliwa 23:1-35
23 Paulo a goeëne hnyawane ju la iatrene la Hnakootr Ka Tru me hape: “Ange trejin, uti hë la drai celë, hnenge hna cile qëmeke i Akötresie nge ka wië hnyawa la mekuthetheung.”*
2 Ame hnei Anania, atre huuje ka sisitria, hna upe la itre ka cil ezi Paulo troa xe la që i angeic.
3 Matre öni Paulo jë hi koi angeic ka hape: “Tro fe Akötresieti a hane xe eö, ngöneuma hna awiën!* Eö kö a lapa troa ameköti ni thenge la Trenge Wathebo, ngo ka eni wathebo pe eö la eö a iupe troa xe ni?”
4 Matre hnene la itre ka cil e cili hna canga qaja ka hape: “Eö lai a qaqane la atre huuje ka sisitria i Akötresie?”
5 Öni Paulo jë hi: “Ange trejin, thatre kö ni ka hape, atre huuje ka sisitria nyidrë, ke ase hë lo cinyihane ka hape, ‘Tha tro pi kö eö a qaqane la atre musi kowe la nöje i eö.’ ”
6 Ngo ame hë la Paulo a wangatrehmekune laka, hna thawaluëne la iatrene la hnakootr, itre Faresaio me itre Sadukaio, angeic a suene jë ka hape: “Ange trejine fe, eni hi la ketre Faresaio nge nekö ne la ketre Faresaio. Hna kootrë ni pine eni mejiune kowe la mele hmaca.”
7 Qa ngöne lai, mejë jë hi la iwesitrë thene la itre Faresaio me Sadukaio, matre isazikeu hë la mekuna ne la hnakootr.
8 Ke itre Sadukaio a catre fë ka hape, pëkö mele hmaca me angela, me u, ngo ame pena itre Faresaio, ka mejiun* angatr kowe la nöjei ewekë cili.
9 Ame hna nyiqaane isuenyi jë, matre hnene la itretre cinyihan ka nyixöle i ange Faresaio hna ketre suene ka hape: “Pëkö ngazo hne huni hna öhne thene la atre ce, ngo maine hna ithanata ju koi angeic hnene la ketre u maine ketre angela—.”
10 Haawe, pine laka catre hë la iwesitrë, xou ju hi lai tane ka tru wanga humuthi Paulo pi, matre angeic a upe jë la itre xa sooc troa uti me kötre sai Paulo qaa lai, me tro sai angeic kowe la ketre hnahage i sooc.
11 Ame hë la heji thupen, hnene la joxu hna cil ezi angeic me hape: “Catre pi! Ke tune la aqane anyipici ni hnei eö e Ierusalema, tro fe eö a hane anyipici ni e Roma.”
12 Nge e lai hë, hnene la angetre Iudra hna itronyi troa tra thethi Paulo me sisinyi ka hape, xeni jë kö angatr me ij e ase jë humuthi Paulo.
13 Nge hna sasaithe la ala 40 lao trahmanyi ka sisinyi tune lai.
14 Matre hnene la itre atre cili hna tro kowe la itre tane i angetre huuj, me itre qatre ne la nöj me hape: “Hne huni hna sisinyi ka hape, xeni jë kö huni la ketre ewekë e ase jë humuthi Paulo.
15 Haawe, tro nyipunie me itre atrene la hnakootr a sipone kowe la tane ka tru ne la itre sooc ka hape, traqa sai Paulo pi koi nyipunie, ke nyipunie a ajane troa waipengö i angeice hnyawa. Ngo ame hë la angatr a troa easeny, eahuni hi lai a treqe Paulo matre humuth.”
16 Ngo hnene la utha i Paulo, lo nekö ne la xa i angeic hna drenge la hnei angatre hna qaja, matre nyën a lö jë kowe la hnahage i sooc me thuemacanyi Paulo.
17 Nge Paulo a hëne jë la tane ka co ne la itre sooc me hape: “Pane xomi nyëne jë kowe la tane ka tru, ke hetre ewekë hnei nyëne hna pi qaja koi nyidrë.”
18 Haawe, angeic a xomi nyëne jë me tro sai nyëne kowe la tane ka tru me hape: “Hnei Paulo, lo hna umën, hna hë ni me sipone troa traqa sai nyëne la koi nyipë, ke hetre ewekë hnei nyëne hna pi qaja koi nyipë.”
19 Matre hnene la tane ka tru hna eatrongëne la ime i nyën, me ithanata aconyi me nyën me hnyingëne ka hape: “Nemene la hnei hmunë hna pi qaja koi ni?”
20 Öni nyën: “Hnene la angetre Iudra hna ce ithanatane matre sipo nyipë troa traqa sai Paulo elanyi ngöne la hnakootr, ke angatr a ajane troa ithanata koi nyidrë, ngo tha nyipi ithanata kö.
21 Haawe, the nue angatre pi kö troa iaö nyipë, ke ase hë sasaithe la 40 lao trahmanyi ka itreqe troa humuthi Paulo, nge ketre, ase asë hi angatre sisinyi ka hape, xeni jë kö angatr me ij e ase jë humuthi Paulo. Nge hanawang, ka hnëkë hë angatr, nge angatre pe hi a treqene matre kapa jë nyipë la sipo i angatr.”
22 Ame hnene lai tane ka tru hna nue la nekö trahmanyi troa tro, me pane wathebo angeice ka hape: “The qaja pi kö ka hape, ase hë eö thuemacanyi ni.”
23 Thupene lai, nyidrëti a hëne jë la lue tane ka co me hape: “Hnëkëne jë kowe la hnaakönine hawa e jidr* la ala 200 lao sooc ka troa trongë ihnadro uti hë Kaisaria, nge 70 lao sooce ka ti hos, me 200 ka cile fë jo.
24 Nge ketre, hamë hose i Paulo jë matre tro sai angeice hnyawa koi Filiki gavena.”
25 Ame hnene la tane ka tru hna cinyianyine ju la ketre tus, kola hape:
26 Qaathei Kalaudio Lusia koi Filiki, atre ka tru ne Iudra: Bozu Gavena!
27 Hna xolouthe la atre ce hnene la angetre Iudra, matre maine ju, tro angeic a mec, ngo eloine hi, hnenge hna canga thepe angeic memine la itre sooceng, ke drenge hë ni laka, atre Roma angeic.
28 Nge pine laka, eni a thele troa trotrohnine la kepin matre angatr a upe zö angeic, eni pë hë a tro sai angeice jë kowe la Hnakootr Ka Tru i angatr.
29 Qa ngöne lai, trotrohnine ju hi ni laka, angatr a upe zö angeic pine la Wathebo i angatr, ngo pëkö nyipi kepin matre troa humuthi angeic, maine akalabusine pena.
30 Ngo pine laka, hna thuemacanyi ni ka hape, kola thele troa humuthi angeic, eni a upi angeice koi nyipë, me upe la itre ka nyizö angeic troa ithanata qëmeke i nyipë.
31 Ame hnene la itre sooc hna drengethenge la hna amekötine koi angatr, me xomi Paulo e jidr a tro Anetipateri.
32 Nge ame hë la drai thupen, hnene la itre xa sooc hna bëeke kowe la hnalapa i angatr, me nue la itre ka ti hos troa sisedrëne la tronge i angatr me Paulo.
33 Ame hnene la itre ka ti hos hna lö e Kaisaria, me hamëne la tus koi gavena, me tro sai Paulo koi nyidrë.
34 Nyidrëti a e ju la tus, me hnyingë Paulo ka hape, atre kaa angeic, ene pe, atre ju hi nyidrëti ka hape, atre Kilikia Paulo.
35 Qa ngöne lai, öni nyidrë: “Tro kö ni a drei eö e traqa jë lo itre ka upe zö eö.” Thupene lai, nyidrëti a iupi jë troa tro sai Paulo hnine la hnalapa i Herodra, me thupë angeic e cili ceitu me hna akalabusin.
Itre mekun ecahu fen
^ Wange ju la HQP.
^ Maine, “atre thoi.”
^ Maine, “catre fë kowe la ka ala nyim.”
^ Kola easenyine e 9:00 e jidr.
