Itre Huliwa 24:1-27
24 Faifi lao drai thupene lai, traqa pi hi Anania, atre huuje ka sisitria, me itre qatre ne la nöj memine la ketre qeneqaja* i angatr, Teretulo la ëjen. Matre angatr a nyizö Paulo ju qëmekene la gavena.
2 Haawe, ame hë la kola hë Teretulo, angeic a nyiqaane qeje Paulo jë me hape:
“Gavena Felis, eahuni a mele tingetinge hnei nyipë, nge nyimutre la itre ewekë ka saze ngöne la nöje hun ke ka inamacane nyipë,
3 nge ka madrine pala hi huni kowe la itre huliwa i nyipë ngöne la nöjei götrane la nöj asë, celë hi matre atraqatre la ole huni koi nyipë.
4 Ngo eje hi, tha ajange kö troa aluzine la traeme i nyipë, matre eni a sipon tro nyipëti a loi hni, me pane drei ni hnyawa.
5 Hne huni hna öhne la atre cili ka jë ne gejë, ke angeic a amejëne la icilekeu thene la angetre Iudra ka lapane la nöjei nöj asë, nge angeice fe a elemekene lo hmi hna hëne ka hape, hmi angetre Nazareta.
6 Ketre, tha hnei angeice kö hna metrötrëne la uma ne hmi, matre eahuni pë hë a xolouthi angeice ju.
7 ——
8 Nge ame hë la nyipëti a troa hnyinge koi angeic, tro kö nyipëti lai a sipu öhne la enyipicin.”
9 Ame hnene la angetre Iudra hna nyixöle i angeic, me catre fë ka hape, trenge nyipici hi lai.
10 Matre ame hë la kola nyihatr hnei gavena koi Paulo troa ithanata, öni angeic:
“Atre hi ni laka, ekö hë nyipëti cilëne la hnëqa ne atre iameköti kowe la nöje ce, haawe, tru la madrineng troa sipu isigöli ni qëmeke i nyipë.
11 Haawe, maine tro nyipëti a thele troa atre, tro ha mama ka hape, tha traqa ju kö koi 12 lao drai lo eni a elë troa hmi e Ierusalema.
12 Nge tha hane fe kö angatr öhnyi ni e isi ithanata me ketre hnine la uma ne hmi, maine hën icasikeun la ka ala nyimu hnine la itre sunago, me traon.
13 Nge thatreine jë pi kö angatre enehila anyipicine la itre ewekë hnei angatre hna upe zö ni.
14 Ngo ca ewekë hi nyine tro ni a anyipicine koi nyipë, laka, eni a mele thenge lo hmi hnei angatre hna hëne ka hape, hmi ka hnyipixe. Nge celë hi aqane nyihluene ni la Akötresie ne la itre xötre qaaqaang, ke ka mejiune ni kowe la Trenge Wathebo, me nöjei hna cinyihan hnei itre perofeta.
15 Nge tune la itre atre celë, eni fe a mejiune koi Akötresie laka, tro kö nyidrëti a amelene la itre atre ka meköt, me ka tha meköti kö.
16 Qa ngöne lai, eni pala hi a isin matre tha tro kö la mekuthetheung* a upe zö ni qëmeke i Akötresie me itre atr.
17 Nge thupene la itre hnepe macatre, loi hë koi ni enehila troa tro fë huuj me hamë ahnahna thatraqane la nöjeng.
18 Matre ame lo eni a kuca lai, traqa ju hi angatr a öhnyi ni e ahmitrötrë ni hnine la uma ne hmi, ngo tha hnenge kö hna agomegomëne la ka ala nyimu me nyi mejen. Ketre, hetrenyi e cili la itre xa atre Iudra ka traqa qaa Asia,
19 matre maine nyipici ju ka hape, ngazo la hnenge hna kuca, haawe, tro fe hi angatre lai a hane cile qëmeke i nyipë troa upe zö ni.
20 Ngo loi e tro la itre ka cile qëmeke i nyipë a qaja la ngazo hnei angatre hna sipu öhne lo eni a cile nyipine la Hnakootr.
21 Casi hi la nyine tro angatr a upe zö ni, kolo hnenge hna sue nyipi angatr ka hape: ‘Kola kootrë ni enehila qëmeke i nyipunie pine eni mejiune kowe la mele hmaca.’ ”
22 Ngo eje hi laka, atre hnyawa ha Filiki la pengöne lo hmi hna hape Gojeny, matre angeic a upe hmaca pi la itre atr me hape: “Tro hë ni a axecië mekun koi nyipunie e pane traqa pi Lusia, tane ka tru ne la itre sooc.”
23 Haawe, angeic a upe pi lo tane ka co ne la itre sooc troa umë Paulo, ngo tro kö a nue angeic troa kuca la itre xa ewekë, me aijijëne la itre sinee i angeic troa hamëne la itre hnei angeice hna ajan.
24 Itre drai thupen, traqa hmaca pi hi Filiki me Drusila föi angeic, ketre atre Iudra. Matre angeic a iupi jë troa traqa sai Paulo, me drei Paulo e qaja la lapaune i angeic göi Iesu Keriso.
25 Ngo ame hë la Paulo a qeje thiina ka meköt, me xomehnöth, me iameköti ka troa traqa, xou angeic ju hi e cili, matre öni angeic: “Tro jë hë eö! Ngo e hetre ijinenge hmaca ha, tro ni a thei eö.”
26 Filiki a lapa treqene tro Paulo a hamë manie koi angeic, celë hi matre angeice pala hi a hë Paulo me ithanata me angeic.
27 Haawe, thupene la lue macatre, hna nyihna i Filiki hnei Pokio Feso. Ngo tha hnei angeice kö hna nue Paulo, ke aja i angeic tro la angetre Iudra a kapa aloinyi angeic.
