Itre Huliwa 25:1-27
25 Thupene la köni drai qaane lo kola acili Feso troa musi kowe la nöje Iudra, angeic a elë jë qaa Kaisaria a tro Ierusalema.
2 Matre hnene la itre he ne nöj me itre tane i angetre huuj hna tro koi angeic me nyiqaane qeje Paulo, me sipone iele angeic
3 troa kapa la sipo i angatr me upi Paulo a tro Ierusalema, ke angatr a mekune troa tra thethi Paulo me humuthi angeice ngöne la gojeny.
4 Ngo sa jë hi Feso ka hape, tro kö a thupë Paulo e Kaisaria, ke easenyi hë matre bëeke jë angeic a tro kowe lai.
5 Matre öni angeic: “Maine nyipici hi laka, hna kuca la ngazo hnene la atr cili, haawe, loi e tro la itre ka mus thei nyipunie a ce uti me eni, me utisai angeic.”
6 Nge thupene la eitre maine treene lao drai hnei Feso hna pane ce lapa me angatr, angeic a uti hmaca pi a tro Kaisaria. Nge ngöne la drai thupen, angeic a të jë hune la ita ne iameköti, me iupe troa traqa sai Paulo.
7 Nge ame ju hi la Paulo a lö, hnene la angetre Iudra ka uti qaa Ierusalema hna cile xötreithi angeic me nyizö angeic, ngo ame pe, pëkö ewekë nyine anyipicine la itre trenge ithanata i angatr.
8 Ngo hnei Paulo hna sipu isigöli angeic me hape: “Tha ase fe kö ni ena la Wathebo i angetre Iudra, me tha metrötrëne la uma ne hmi, nge pë fe kö ngazo hnenge hna kuca koi Kaisara”.
9 Ngo pine laka, Feso a thele troa wangaloinyi angeic hnei angetre Iudra, öni angeic jë hi koi Paulo ka hape: “Eö kö a hane pi tro Ierusalema matre tro ni a kotrë eö pine la itre ewekë hna upe zö eö?”
10 Sa jë hi Paulo ka hape: “Eni hi la a cil qëmekene la ita ne iameköti i Kaisara, hnë kootrë ni, ngacama öhne hnyawa hi nyipëti laka, pëkö ngazo hnenge hna kuca kowe la angetre Iudra.
11 Ngo maine nyipici hi ka hape, hetre ngazong nge tro ni a meci pin, nga eni a kapa. Ngo maine pëkö nyipi kepin matre upe zö ni jë hnene la itre atre ce, tha meköti kö tro ketre a nue ni koi angatr göi tro hi a kepe angeic. Haawe, eni a hë koi Kaisara!”
12 Feso a pane ithanata jë me ange atresi, thupene lai öni angeic: “Hnei eö hna hë koi Kaisara, tro ha tro sai eö koi Kaisara.”
13 Itre hnepe ijine thupene lai, traqa pi hi Ageripa Joxu me Berenike föi nyidrë e Kaisaria troa wai Feso.
14 Nge pine laka, nyidroti a troa pane lapa aqeanyi e cili, hnei Feso hna qeje Paulo kowe la joxu, me hape:
“Hetre ketre trahmanyi hna umën hnei Filiki,
15 nge ame lo eni e Ierusalema, hnene la itre tane i angetre huuj me itre qatre ne la nöje Iudra hna upe zö angeic, me sipo ni troa atë la pune ka ngazo koi angeic.
16 Sa jë hi ni ka hape, tha aqane huliwa i angetre Roma fe kö la troa nue la ketre atr kowe la itretre iupe zö, e tha hna pane aijijë angeice kö troa sipu isigöli angeic qëmeke i angatr.
17 Matre ame hë la angatr a traqa e celë, tha hnenge kö hna huli hmitr, ngo ame ju hi lai drai thupen, hnenge hna të hune la ita ne iameköti, me iupe troa traqa sai Paulo.
18 Haawe, itretre iupe zö a cile jë me nyiqaane qeje angeic, matre öninge pena kö ka hape, itre ngazo ka tru la hnei angatre hna upe zö angeic, ngo tha eje kö.
19 Angatre hi a ihmönyinyi me angeic pine la hmi i angatr, me pi Iesu ketre atr hna humuth, ngo hna isigölin hnei Paulo ka hape, mele hmaca ha nyidrë.
20 Matre hnenge pë hë hna hnyinge koi angeic maine aja i angeice kö troa kootrë angeic e Ierusalema, ke nyipici laka, tha trotrohnine kö ni la jole ka eje thei angatr.
21 Ngo ame hë la Paulo a hë koi Auguso* Joxu troa waipengö i angeic, hnenge hna amekötine troa thupë angeic uti hë la tro ni a upi angeice koi Kaisara.”
22 Öni Ageripa jë hi koi Feso ka hape: “Eni fe a hane pi drenge la atre cili.” Öni Feso jë hi: “Tro nyipëti a drei angeic elany.”
23 Matre ame hë la drai thupen, hnei Ageripa me Berenike hna traqa cememine la itre ewekë ka lolo catr. Nyidro a ce lö jë hnine la hnahage ne ikootrë memine la itre tane la itre sooc, me itre atre ka tru ne la nöj. Ame hnei Feso hna upe la ketre sooc troa traqa sai Paulo.
24 Öni Feso jë hi: “Ageripa Joxu, me nyipunie itre ka ce me nyio, öhne hë nyipunieti la atre ce, angeice hi lo hnei angetre Iudra hna pi hune fë koi ni e Ierusalema me e celë troa humuth.
25 Ngo ame pe, öhne hnyawa hi ni laka, pëkö kepin troa humuthi angeic. Matre ame hë lo angeic a hë koi Auguso joxu, eni a amekötine ju troa upi angeic.
26 Ngo eje hi laka, pëkö ewekë nyine tro ni a cinyihane göi angeic kowe la Joxung, celë hi matre eni a traqa sai angeic qëmeke i nyipunieti asë, nge qëmeke i nyipë Ageripa Joxu, matre e ase hë së ce waipengö i angeic, tro hë ni a hetre nyine sija göi angeic.
27 Ke thatreine kö ni upe la ketre atre hna akalabusin, e tha hna pane sija kö la itre ngazo i angeic.”
Itre mekun ecahu fen
^ Aqane hëne la Joxu thei angetre Roma, ngo tha nyipi ëje kö.
