Itre Huliwa 26:1-32
26 Öni Ageripa jë hi koi Paulo ka hape: “Kola ha nue eö troa ketre sipu isigöli eö.” Ame hnei Paulo hna saathe la ime i angeic me nyiqaane qaja ka hape:
2 “Madrine catre ni Joxu Ageripa, ke enehila, tro ni a ithanata qëmeke i nyipë pine la nöjei ewekë hnei angetre Iudra hna upe zö ni.
3 Nge eje hi, atre pengöne hnyawa kö nyipë la qenenöj memine la iwesitrë ka eje thei angetre Iudra. Celë hi matre, eni a pane sipo nyipë troa drei ni me xomihni ni.
4 “Ala nyimu la angetre Iudra ka atre ni hnyawa qaane lo eni a co, nge uti hë la ijine eni e Ierusalema.
5 Nge maine tro angatr a ajan, tro hë angatr a jelenyipicine laka, Faresaio ni ekö. Nge eje hi, pëkö xa hmi thei angetre Iudra ka hnöthi atr, tune la hmi cili.
6 Ngo enehila, kola uti sai ni pine eni mejiune kowe lo hna thingehnaeane hnei Akötresie kowe la itre qaaqaa hun.
7 Nge celë hi lo hna mejiune kow hnene lo 12 lao lapa matre hnei angatre lo hna nyihlue i Akötresie e lai me jidr. Haawe, Joxu fe, kola uti sai ni pine la mejiune cili.
8 “Hnauëne laka, tha mejiune kö* nyipunie ka hape, atreine hi Akötresie amelene hmaca la ka mec?
9 Hnenge ekö hna mekune ka hape, nyipiewekë tro ni a catre icilekeu memine la ëje Iesu, atre Nazareta.
10 Nge celë hnyawa hi la hnenge hna kuca e Ierusalema. Ala nyimu la itre atre ka hmitrötr hnenge hna akalabusin, ke hna aijijë ni hnene lo itre tane i angetre huuj; nge ketre, hnenge fe lo hna kapa troa humuthi angatr.
11 Nge hnenge fe hna axösisi angatr hnine la itre sunago matre uku angatre troa trije la lapaune i angatr; nge pine laka, elëhni catre ni koi angatr, hnenge fe hna tro kowe la itre traone gaa nanyi troa axösisi angatr.
12 “Matre ame hë la ketre ijin, hnenge hna tro Damaseko, ke hnene la itre tane i angetre huuj hna upi ni troa axösisi angatr e cili.
13 Nge Joxu, e hnaipajö ngöne la gojeny, hnenge hna öhne la ketre lai qaa hnengödrai nge kola hudrum xötreithi ni me itre sinatrongeng.
14 Matre ame ju hi la eahuni asë a kei e kuhu hnadro, hnenge hna drenge la ketre aqane ithanata kola hape koi ni qene Heberu: ‘Saulo, Saulo, hnauëne la eö a axösisi ni? Eö kö lai a sipu akötrë eö, tune la kau ka tha idrei a pene trongëne la usisi* ne la atre engën.’
15 Öninge jë hi: ‘Drei nyipë Joxu?’ Sa jë hi nyidrë ka hape: ‘Iesu, lo hnei eö hna axösisin.’
16 Ngo mejë jë nge cile jë. Hane hi la kepin matre mama jë ni koi eö, eni a ië eö matre hlueng nge atre anyipici ni göne la itre ewekë hnei eö hna öhn, me itre ewekë tro eö a öhne göi ni.
17 Nge tro ni a thepe eö qaathene la itre atre celë, me qaathene la itre atre ne fen, itre hnenge hna troa upi eö kow.
18 Nge tro eö a fe la itre luemeke i angatr, me thepe angatr qa ngöne la jidri kowe la lai, me qaathei Satana koi Akötresie, matre tro fe a hane köletrije la itre ngazo i angatr, me aijijë angatre troa kapa la edrö thatraqane la itretre lapaune koi ni.’
19 “Haawe, Joxu Ageripa, tha hnenge kö hna tha idrei kowe la maca ne hnengödrai.
20 Qa ngöne lai, hnenge hna pane tro koi angetre Damaseko, me koi angetre Ierusalema, me ngöne la nöje Iudra asë, me kowe la itre atre ne fen, matre qaja trongëne koi angatre ka hape, nyipiewekë tro angatr a ietra me ujë koi Akötresie, jëne la itre huliwa ne ietra.
21 Nge celë hi kepin matre angetre Iudra a xolouthi ni hnine la uma ne hmi me thele troa humuthi ni.
22 Ngo pine laka, ase hë ni melëne la ixatua i Akötresie, uti hë enehila, eni pala hi a catre cainöjëne kowe la itre ka tru me ka co, la nöjei ewekë hna qaja amë hnene la itre perofeta me Mose—
23 ene laka, tro la Keriso a akötr nge nyidrëti la hna pane amelene hmaca, nge tro nyidrëti a cainöjëne la lai kowe la nöje celë me kowe la nöjei nöj asë.
24 Nge ase jë hi Paulo qaja lai, ithanata catre jë hi Feso ka hape: “Hmo hë eö Paulo! Kola ahmone la he i eö hnene la inamacane ka tru!”
25 Ngo öni Paulo: “Tha hmo kö ni Gavena Feso, ngo eni pe a qaja la nyipici nge ka hetre alien la hnenge hna qaja.
26 Nge atre hnyawa hi la itre ewekë cili hnene la Joxu hnenge hna ithanata kow, ke tha itre ewekë kö hna kuca mitin.
27 Joxu Ageripa, ka lapaune kö nyipë kowe la itre perofeta? Atre hi ni laka, ka lapaune fe nyipë.”
28 Nge öni Ageripa jë hi koi Paulo ka hape: “Tha hmitre kö, matre Keresiano jë fe ni hnei eö.”
29 Matre öni Paulo jë hi: “Hmitre ju hë maine saqe, ngo qëmeke i Akötresie, ajange tro nyipë me nöjei atre ka drei ni enehila a hane tung, ngo tha tro pe a ceinën.”
30 Haawe, mejë jë hi la Joxu, nge thupene lai, gavena me Berenike, me nöjei atr ka ce me angatr.
31 Nge ame hë la angatr a isa mejë, angatre fe hi a iqajakeune ka hape: “Pëkö ngazo hna kuca hnene la atre ce matre troa humuthi angeic, maine akalabusine pena.”
32 Öni Ageripa jë hi koi Feso: “Maine tha hë Kaisara ju hnei angeic, tro ha nue angeic.”
Itre mekun ecahu fen
^ Ger., “tha meköti kö.”
^ Hnepe sinöe ka hetre ka ithiny ngöne la pun nyine engë öni.
