Itre Huliwa 27:1-44
27 Ame hë la ijine kola axeciëne tro huni a tro Itali, hnei angatre hna nue Paulo me itre xa hna akalabusin koi Iulio, tane la itre sooc ne la trongene isi i Auguso.
2 Ame hne huni hna të hune la ketre he e Adamutiu, he ka troa xepe trootro ngöne la itre hnë xepe he ne la nöje Asia. Matre eahuni a hule draiëne jë la sinyeu, nge ce eahuni me Aritako, atre Makedonia e Thesalonika.
3 Ngöne la drai thupen, hne huni hna xep e Sidona, nge lolo la thiina i Iulio koi Paulo, matre Iulio a nue Paulo pi troa tro kowe la itre sinee i angeic, nge e cili, tro angatr a pane kepe angeice hnyawa.
4 Nge qaa lai, eahuni a kötre zae ju fene Kupero ke eahuni a qëmeke koi eny.
5 Nge traqa ju hi huni ngöne la hnagejë e Kilikia me Pamafulia, matre eahuni a xepe ju e Mura e Lukia.
6 E cili, hnene lo tane la itre sooc hna öhne la ketre he ka traqa qaa Alesanedria nge ka tro Itali. Ame hnei nyidrëti hna aelë huni jë.
7 Nge thupene la itre hnepe drai ne kötre hmidra la he, xepe jë hi eahuni e Nido ngacama jole catre troa qal. Thupene lai, tro hmaca pi hun, ngo pine laka, kola ajolë huni hnene la eny, eahuni a zae trootro ju fene Kerete e Salamone,
8 nge jole catre pi hë koi hun. Ame hne huni hna xep ngöne la ketre götrane hna hëne ka hape, Hnëxepeihe Ka Lolo, easenyin e Iasea.
9 Nge kola tro la itre drai, nge tha ijine tro hmaca kö a nyinyapë he, ke fenesi hë lo Ijine Tha Xen.* Haawe, Paulo a tro ju troa pane qaja la mekuna i angeic,
10 öni angeic: “Itre sineeng, eni a mekune ka hape tha fene jole kö la hne së hna qëmeke kow ngöne la tronge së celë, ngo tha koi he hmekuje kö, ngo mele* së fe.”
11 Ngazo pe, hnene lai tane la itre sooc hna drenge la atre xomi he memine la atrekë hen, ngo tha drei Paulo kö.
12 Ketre, ala nyimu la itre ka hane pi tro qaa lai, ke tha loi kö la hnë xepe he cili ngöne la ijine hnötr. Angatr a tupathe ju troa traqa e Foinike hmekune la ijine hnötr. Ke ame lai hnëxepe he e cili, tre e Kerete, nge ej a qëmeke kowe la götrane kuë.
13 Matre ame hë la kola nango hnahna hmidra la enyi qaa kolojë, öni angatre pala kö ka hape, tro ha eatre la mekuna i angatr. Matre angatr a hule jë la iuhni, me xötrëne la ngönegejë ne Kerete.
14 Ngo thupene ju hi lai, hnahna catre pi la enyi hna hëne ka hape, Eurakudo.*
15 Nge pine laka, hna aca tro ufe enyine la he, thatreine ju hi angatre icilekeu memine la eny. Matre eahuni a nue pi troa ufe enyi hun.
16 Ame hne huni hna xötrëne la itre neköi hnapet hna hëne ka hape, Kalauda. Nge jole koi huni troa xom amekötine la neköi bootr* hna hule trongën.
17 Nge ase jë hi aelën la neköi bootr, angatr a xome jë la itre xa ewekë nyine kanothe la he. Ngo pine laka, xou i angatre tro la he a të e Sireti,* itre wetrëngöni nyipine la hnagejë, angatr a senge pi la itre xa eno göi troa ewath acone la sinyeu, me nue la enyi troa huli hun.
18 Nge ngöne la drai thupen, angatr a trij ahmaloeëne ju la itre xa ewekë qa hnine la he, ke ngazo la aqane jumi huni hnei wene.
19 Matre ngöne la hnaakönine drai, angatr a xome ju la itre eno ne huli sinyeu me trij.
20 Nge nyimu drai ne tha mama la jö me wëtresij, ke catrehnine* catre la wene ka traqa koi hun, matre ame lo itre ka mekune ka hape, tro huni a mel, patre trootro hë la mejiune i angatr.
21 Nge pine laka, qea ha la hnei angatre hna tha xen, Paulo a cile ju nyipi angatr me hape: “Itre sineeng, maine drei ni ju lo hnei nyipunie lo öning, tha tro kö së a tro Kerete, tha tro kö a traqa la ewekë celë koi së, nge tha tro kö a luzi la itre mo së.
22 Ngo ame pe, eni a qaja koi nyipunie, catre pi, ke pëkö ala casi* thei nyipunie ka troa luz, ngo he hmekuje hi.
23 Ke ngöne la jidri celë, hnene la ketre angela ne la Akötresie hnenge hna mejiune kow, me nyihlue kow hna mama koi ni
24 me hape: ‘The xou kö Paulo, tro kö eö a cil qëmeke i Kaisara. Nge hanawang! Tro Akötresie a amele eö me nöjei atr ka ce me eö.’
25 Haawe itre sineeng, catre pi, ke ka mejiune ni koi Akötresie laka, tro kö a eatre lo hna qaja hnene la angela.
26 Ngo tro pe a të la he ezine la ketre hnapet.”
27 Matre ame hë ngöne la hnafootrinene jidr, kola jumi hun ngöne la hnagejë Aderia, nge e hnenyipajidr, hnene la itre matelo hna mekuhnine ka hape, eahuni hë a easenyi kowe la ketre hnapet.
28 Ame hnei angatre hna tuluthe la ejuin, nge kola traqa koi 36 lao met, matre thupene la hna pane nyinyape la he, angatr a tuluthe hmaca pi, nge traqa ha koi 27 lao met.
29 Ngo pine laka, xou angatr tro la he a të hune ietë, angatr a kuiëne ju la foa lao iuhni ngöne la pune he, me ajane catrëne matre lai pi.
30 Ame hnene la itre matelo hna thele troa uti trije la he, matre angatr a autine ju la itre neköi bootr me thoi ka hape, göi troa kuië iuhni ngöne imekene he.
31 Öni Paulo jë hi kowe la tane la itre sooc me itre sooc ka hape: “E patre hë la itre atre celë qa hnine la he, pëkö ca ka troa mel e nyipunie.”
32 Ame hnene la itre sooc hna thupa la itre eno ne la itre neköi bootr matre mala pi.
33 Ngo easenyi hë la kaqa ne lai, Paulo a upi angatre ju troa pane xen, öni angeic: “Hnafootrinene drai ne meci nyipunie hnei xou, nge goi tha ase fe nyipunieti xen,
34 haawe, ange xeni jë; ke nyine loi lai koi nyipunie. Nge hanawang, tha tro kö a patre la ketre ipenehe ne ala casi e nyipunie.”
35 Ase jë hi angeice qaja lai, angeic a xome pi la falawa, me thithi ne ole koi Akötresie qëmeke i angatr asë, me thupathupa, me xen.
36 Qa ngöne lai, tha seseue hë angatr, nge angatr a isa xeni ju.
37 Nge ala 276 eahuni* hnine lai he.
38 Nge ame hë la kola meji hnei angatr asë, trije pi hi angatre la qitr göi troa ahmaloeëne la he.
39 Nge e lai hë, tha wangatrehmekune kö angatre lai hnapet, ngo öhne ju hi angatre la ngönëtë me hnangöni, matre xecie ju hi koi angatr troa acilëne la he e cili.
40 Haawe, angatr a thupatrije pi la itre iuhni me nue pë hë hnine hnagejë, nge angatr a senge pi la itre otrene iuj, me seluthe la isinyieu ka co matre troa ufe enyi angatr, ame hna ufe enyi angatr meköt kowe la hnangöni.
41 Nge ame ju hi la eahuni a traqa hmekune la ketre neköi wetrëngöni hna jige hnei thelec, angatr a atë pi la he e cili. Ame hna catre ju la imeken, nge aca tro kaqa pi la pun hnene la trengecatrene la itre hoke ne gejë.
42 Qa ngöne lai, hnene la itre sooc hna mekune troa humuth asë la itre hna akalabusin, matre tha tro kö angatr a hane aje me kötr.
43 Ngo hnene pe la tane i angatr hna thele troa amele Paulo, me atriane la mekuna i angatr. Celë hi matre angeic a upe jë la itre ka atreine aje troa sesë koi hnagejë, me aje pa kowe la hnangöni.
44 Nge ame pë hë la munën, angatr a aje xome la itre inehe me itre ewekë hna öhne ngöne la he. Ame hnei angatr asë hna isa traqa kowe la hnangöni nge mele asë kö angatr.
Itre mekun ecahu fen
^ Kolo hmekune lo treu Tishri, treu hna hëne enehila ka hape, Semitrepa/Okotropa.
^ Maine, “u.” Ger., psy·kheʹ. Wange ju la HQP.
^ Enyi ka xulu qaa nyipin e kolopi me kuë.
^ Neköi bootr nyine kötre mel.
^ Wange ju la HQP.
^ Ger., “tha fene wene kö.”
^ Maine, “u.” Ger., psy·kheʹ. Wange ju la HQP.
^ Maine, “u.” Ger., psy·kheʹ. Wange ju la HQP.
