Itre Huliwa 28:1-31
28 Haawe, mele ju kö hun, matre hne huni pë hë hna atre e thupen ka hape, Melita la ëje ne lai hnapët.
2 Nge pine laka, kola hlupi lai mani me hnötr, hnene la itre atrene* lai hnapet hna hnimi* hun, me athi eë me kepe huni hnyawa.
3 Nge Paulo a hleme ju la sinöe me kuiën ngöne la eë, ngo pine la idreuthine lai eë, sesë pi hi la un hna mecin a heje la ime i Paulo.
4 Matre ame ju hi la kola öhne hnene la itre atre ne la hnapet la une a thipi ngöne la ime i angeic, angatr a iqajakeune ju ka hape: “Ma atre ihumuthi angeic, ke ngacama hna mele qa ngöne la hnagejë, ngo tha tro kö la Meköt* a nue angeice troa mel.”
5 Ngo Paulo a jumetrije pi lai un ngöne la eë, nge tha akötre kö angeic.
6 Ngo itre atr a mekune ka hape, tro angeic a cipa me waxamadra, maine tro pena a kei me mec. Matre, thupene la hnei angatr hna pane itreqe, öhne ju hi angatre laka, pëkö ewekë ka traqa koi angeic, haawe, saze pi hi la mekuna i angatr, matre öni angatre pena jë, ketre haze angeic.
7 Ezine la götrane cili, hetrenyi la itre hnepadro ne la atre ka tru ne lai hnapet, Popilio la ëjen. Angeic a kepe huni hnyawa ju me thupë huni koi köni drai.
8 Ngazo pe, wezipo pi hi la keme i angeic, nge nyidrë a meköl hune ili, ke kola idreuth, me trongë madra, matre Paulo a lö ju koi nyidrë me thith, me atë la lue ime angeic hui nyidrë me aloinyi nyidrë.
9 Thupene ju hi lai, traqa pi hi la nöjei atrene lai hnapet ka trene mec troa wai Paulo, ame hna aloinyi angatr.
10 Nge hnei angatre fe hna nyipii hun me hamë huni la nöjei pengöne ahnahna, matre ame hë la eahuni a të hmaca hune la he, angatr a hamë huni pi la nöjei ewekë ka nyipiewekë koi hun.
11 Haawe, köni treu thupen, hne huni hna të hune la ketre he ka traqa qaa Alesanedria, nge lue nekö i Zeus la hna amë nyine hatrene la he cili. Hnene ej hna xep e cili göi troa treqene matre ase pi la ijine hnötr.
12 Haawe, eahuni a ea pi me xep e Surakusa, me lapa e cili koi köni drai.
13 Nge qaa lai, eahuni a tro hmaca pi me xep e Regio. Nge ngöne la drai thupen, mejë jë hi la ketre enyi qaa kolojë, matre traqa pi huni e Potioli ngöne la hnaaluene drai.
14 Nge e cili, hne huni hna iöhnyi memine la itre trejin, angatr a upi huni jë troa lapa thei angatr koi sevene lao drai. Thupene lai, eahuni a tro pi Roma eë.
15 Nge ame hë la kola drei mejene hnene la itre trejin laka, eahuni hë e cili, angatr a traqa pi troa itronyi me eahuni ngöne la hna maketr e Apio, me ngöne lo götrane hna hëne ka hape, Köni Uma.* Matre ame hë la Paulo a öhnyi angatr, hetre trengecatre i angeice hmaca jë hi, nge angeic a ole jë koi Akötresie.
16 Haawe, ame hë la eahuni a traqa e Roma, hna nue Paulo troa lapa casi ngöne la hnalapa i angeic, ngo tro pe a thupën hnene la ketre sooc.
17 Ngo thupene la köni drai, Paulo a hëne jë la itretre Iudra ka tru ngöne la traon. Matre ame hë la angatr a icasikeu, öni angeice jë hi: “Ange trejine fe, ngacama pëkö ewekë ka ngazo hnenge hna kuca kowe la nöj maine kowe la qenenöj ne la itre qaaqaa së, hna ceinë ni me upi ni qaa Ierusalema kowe la ime ne la angetre Roma, ceitu me hna akalabusin.
18 Nge thupene la hna waipengöi eni hnene la angetre Roma, angatr a mekune ju troa nue ni ke pëkö kepine matre troa humuthi ni.
19 Ngo pine laka, xele kö angetre Iudra, eni a hë jë koi Kaisara, ngo tha göi tro kö a nyizöne la nöjeng.
20 Celë hi matre hnenge hna sipone troa ithanata me nyipunie, ke eni a cile fë la cein pine la mejiune i angetre Isaraela.”
21 Öni angatre jë hi: “Pëkö tusi hne huni hna kapa qaa Iudra ka qeje eö, nge goi pë fe trejine ka traqa qaa lai nge ka qajangazo eö.
22 Ngo ka loi pe tro huni a pane drenge la mekuna i eö, ke nyipici, atre hi huni laka, pë ju pë hë götran ka tha qajangazone la hmi cili.”
23 Ame hnei angatre hna isapui me angeic. Nge ngöne la drai hna sa, ala nyimu catre hmaca kö la itre ka traqa kowe la hnalapa i Paulo. Nge qaan e hmakanyi uti hë hej, angeic a qejepengöne hnyawa jë koi angatre la itre nyipici göne la Baselaia i Akötresie, me anyipici Iesu jëne la Trenge Wathebo i Mose, me itre Perofeta.
24 Ame hna mejiune hnei itre xan, ngo xele kö itre xane ma kapa.
25 Haawe, pine laka, isazikeu la itre mekuna i angatr, angatr a isa ije pi matre öni Paulo:
“Nyipici hi la hna qaja hnene la uati hmitrötr jëne Isaia perofeta kowe la itre qaaqaa i nyipunie,
26 lo kola hape: ‘Tro jë kowe la nöje cili nge qaja ju koi angatre ka hape: “Tro nyipunieti a dreng, ngo tha trotrohnine pe, nge tro nyipunieti a goe, ngo tha öhne kö.
27 Ke troa xeti la hni ne la nöje ce, matre tro hë angatr a drenge hnene la lue hnangenyë i angatr, ngo pëkö thangan, nge tro angatr a thinge la luemeke i angatr matre tha tro pi kö angatr a öhne hnei luemek, me dreng hnei lue hnangenyë, me trotrohnin qaa kuhu hni, me ujë matre tro ni a amele angatr.” ’
28 Haawe, atre jë nyipunie laka, ase hë Akötresie upe la iamele kowe la itre atre ne fen, nge tro angatre lai a dreng.”
29 ——
30 Matre angeic a lapa ju koi lue macatre ka pexej hnine la hnalapa hnei angeic hna kuië thupene lapan, nge angeic a nyipiine la itre ka traqa koi angeic.
31 Angeic a qeje Baselaia i Akötresie koi angatr, me catre hamë ini göi Iesu Keriso Joxu, nge pëkö ka sewe angeic.
Itre mekun ecahu fen
^ Ger., “atre ka ithanatane la ketre qenehlapa kö.”
^ Maine, “loi hni.”
^ Ger., Diʹke, ma kolo jë a qaja la haze ne iameköti.
^ “hnë mano me xen.”
