Itre Huliwa 3:1-26
3 Nge enehila, Peteru me Ioane a tro kowe la uma ne hmi, hmekune lo hawa ne thith, ene lo hnaanaenene hawa.*
2 Nge e cili, kola kapa trongëne la ketre trahmany ka genyi ca, qaane lo kola hnaho angeic. Nge o drai pala hi, hna ami angeic ezine lo hnë lö hna hëne ka hape, Hnë Lö Ka Mingöming, matre sipo ahnahna ne utipin koi angetre lö hnine la uma ne hmi.
3 Haawe, ame hë la angeic a öhnyi Peteru a lö me Ioane hnine la uma ne hmi, angeic a sipo ahnahna ne utipine koi nyidro.
4 Ngo hnei Peteru me Ioane hna goeë angeice me hape: “Goeë nyio jë.”
5 Ame hnei angeic hna goeë nyidro, me treqene troa kapa la ketre ewekë qaathei nyidro.
6 Ngo öni Peteru jë hi: “Pëkö sileva me gool theng, ngo ame la hnenge hna hetreny, tro ni a hamë eö. Ngöne la ëje i Iesu Keriso atre Nazareta, tro jë!”
7 Matre Peteru a ea catrëne ju la ime maca i angeic, me amejë angeic, ame hna egöcatre pi la lue ca me lue hnatrapaca i angeic.
8 Angeic a canga mejë jë me tro, me xötrethenge nyidro hnine la uma ne hmi, me sesësesë, me atrunyi Akötresie.
9 Nge itre atr asë a öhnyi angeic e tro me atrunyi Akötresie.
10 Matre angatr a wangatrehmekunyi angeice ju, me atrehmekune laka, kolo atr ka majemine lapa ngöne lo Hnë Lö Ka Mingöming, me sipo ahnahna ne utipin. E cili, angatr a sesëkötr me hain atraqatr la ewekë ka traqa koi angeic.
11 Nge pine laka, angeice pala hi a xötrethenge Peteru me Ioane, ame hna tro koi angatr me hai atraqatr hnene la itre atr, nge angatre hmekune lo götrane hna hëne ka hape, itre Ikapa i Solomona.
12 Nge ame la Peteru a öhne lai, öni angeic kowe la itre atr ka hape: “Angetre Isaraela fe, hnauëne la nyipunieti a haine la ewekë cili? Nge hnauëne la nyipunieti a goeë nyio kösë kola tro la atre ce hnene hi la sipu mene i nyio, maine qa ngöne la aqane mele nyipici nyio koi Akötresie?
13 Hnene la Akötresi Aberahama, me Isaaka, me Iakobo, me Akötresi ne la itre qaaqaa së hna atrune la hlue i nyidrë, Iesu, lo hnei nyipunieti hna xolouth me nue koi Pilato, atre thele troa nuamele Iesu.
14 Nyipici, hnei nyipunie hna methinëne la atre ka Hmitrötr me ka Meköt, ngo ajane pe nyipunie lo atre ihumuth.
15 Matre hnei nyipunie hna humuthe la Atre Itrosai.* Ngo hnei Akötresieti pë hë hna amelene hmaca la Atre cili, nge nyio la lue atre anyipicine lai.
16 Nge jëne la ëje i Iesu, nge pine la mejiune i nyio kowe la ëje i nyidrë, egöcatre pi hi la lue ca ne la atre ce, ene lo hnei nyipunieti hna öhne me atrepengön. Ke eje hi, hnei nyio hna mejiune koi Iesu matre loi jë angeic qëmeke i nyipunieti asë.
17 Nge enehila itre trejin, atre hi ni laka, hnei nyipunieti hna kuca thatre la itre ewekë cili, tune lo aqane kuca hnei itre tane i nyipunie.
18 Ngo qa ngöne lai, hnei Akötresieti hna eatrëne lo itre hna thingehnaean ekö jëne la itre perofeta, ene laka, tro Keriso a pane akötr.
19 “Haawe, ietra ju nge ujë jë matre troa köletrije la itre ngazo i nyipunie, nge matre traqa pi koi nyipunie la itre ijine iakeukawanyi* qaathei* Iehova.*
20 Nge tro nyidrëti a upe la Keriso hna iëne koi nyipunie, ene Iesu.
21 Jëne lo itre perofeta ka hmitrötr i nyidrë, hnei Akötresieti lo hna thingehnaean ka hape, tro ha traqa la ijine troa ahnyipixene hmaca la nöjei ewekë asë. Ngo qëmekene troa traqa la ijine cili, tro Iesu a pane lapa e hnengödrai.
22 Nge öni Mose lo ka hape: ‘Tro Iehova* Akötresi nyipunie a acile nyipine la itre trejine me nyipunie la ketre perofeta ka tung. Nge qa i nyipunie troa drenge la nöjei ewekë hnei angeic hna troa qaja koi nyipunie.
23 Ke ame la atre* xele ma drenge la hna qaja hnene la perofeta cili, tro ha apatrenyi angeic qa ngöne la nöj.’
24 Nge qaane Samuela, hnene la nöjei perofeta thupei angeic hna ithanatane lai, me qejepengöne hnyawa la ijine cili.
25 Nyipunie la itre neköne lo itre perofeta, me neköne la isisinyikeu i Akötresie me itre qaaqaa i nyipunie, lo öni nyidrë koi Aberahama ka hape: ‘Jëne la matra* i eö, troa manathithi la nöjei hnepe lapa e celë fen.’
26 Haawe, hnei Akötresieti pë hë hna acile la Hlue i nyidrë, me pane upi angeic koi nyipunie matre manathithe pi nyipunie, nge matre iananyi pi nyipunie memine lo itre ngazo hnei nyipunieti hna kuca.
Itre mekun ecahu fen
^ kola easenyi koi 3:00 e hnapaijö.
^ Wange ju la HQP.
^ Maine, “tingeting.”
^ Ger., “qa ngöne la iqëmeke i Iehova.”
^ Wange ju la HQP.
^ Wange ju la HQP.
^ Maine, “nöjei ka mel.”
^ Ger., “itin.”
