Itre Huliwa 4:1-37
4 Nge ame la nyidroti pala kö a ithanata kowe la ka ala nyim, hnene la itretre huuj, memine la tane la itretre thupëne la uma ne hmi, me itre Sadukaio hna traqa koi nyidro.
2 Angatr a elëhni pine laka, hnene la lue aposetolo cili hna hamë ini kowe la itre atr, me cainöjëne la mele hmaca i Iesu.
3 Haawe, angatr a xolouthi nyidroti ju me akalabusi nyidro uti hë la drai thupen, ke jidri catre hë.
4 Ngo ala nyimu thene lo itre ka drenge la cainöj ka hane lapaun, matre kola e la ala 5 000 lao trahmany.
5 Ame hë la drai thupen, hnene la itre tane i angatr me itre qatre ne la nöj, me itretre cinyihan hna icasikeu e Ierusalema,
6 ce angatr me Ana, lo atre huuje ka sisitria, me Kaiafa, me Ioane, me Alesanedro, me itre sinee ne lai atre huuje ka sisitria.
7 Angatr a acilë Peteru ju me Ioane nyipi angatr, me nyiqaane hnyinge koi nyidro ka hape: “Drei la atre hamë mene koi epon matre atreine jë epone kuca lai?”
8 Ame hna tiqa Peteru hnei uati hmitrötr, matre öni angeice jë hi koi angatre ka hape:
“Itre he ne nöj, me nyipunie itre qatre ne la nöj,
9 maine kola waipengö i nyio pine la loi hnei nyio hna kuca kowe la ka wezipo, maine pine laka, aja i nyipunie troa atre la atre aloinyi angeic,
10 nga loi e tro nyipunieti asë, me nöje Isaraela asë a atre laka, qa ngöne la ëje i Iesu Keriso atre Nazareta, lo hnei nyipunieti hna jei faon, ngo hnei Akötresieti hna amelene hmaca. Hnei nyidrë, matre cile jë la atre ce qëmeke i nyipunie.
11 Nyidrëti hi ‘lo etë hna wangesixan hnei nyipunie, itretre xupi uma, ngacama etë ka sisitria* catre nyidrë.’
12 Nge ketre, pëkö xa iamele thene la ketre atr, ke pëkö xa ëjen hna hamën e celë fen ka atrein amele së.”
13 Nge ame hë la angatr a drenge la aqane ewekë i Peteru me Ioane, me wangatrehmekune laka, lue atre ka thatre tusi* nyidro, nge lue atre menu hi, angatr a isa hai. Nge wangatrehmekune ju hi angatr e cili laka, lue atre drei Iesu nyidro.
14 Nge ame la angatr a goeëne lo atr hna aloin a cile qëmeke i angatr, pë hmaca ju kö ithanata nyine tro angatr a qaja.
15 Matre angatr a upe pi lo lai ala kön qa hnine la hnakootr, me nyiqaane iqajakeune
16 ka hape: “Tro hë sa uëne la lue atre ce? Ke mama hnyawa hi laka, kola kuca la itre iamamanyikeu ka tru jëne nyidro, nge mama hnyawa fe lai koi angetre Isaraela asë, nge goi pë fe ala casi the së ka atreine jelethoin.
17 Ngo loi e tro sa axouenyi nyidro, me wathebo nyidro troa ithanata ngöne la ëje ne la atre ce, matre tha tro kö lai* a hlemu ngöne la nöj.”
18 Qa ngöne lai, angatr a hëne jë lai lue atre dreng, me wathebo nyidro troa qaja la ketre ewekë, maine hamë ini ngöne la ëje i Iesu.
19 Ngo sa jë hi Peteru me Ioane ka hape: “Maine meköti qëmeke i Akötresie troa drei nyipunie hui Akötresie, qanyi nyipunieti kö.
20 Ngo ame pë hë nyio, thatreine kö nyio cipane la itre ewekë hnei nyio hna öhne me dreng.”
21 Haawe, thupene la hnei angatr hna pane thele troa axouenyi nyidro, angatr a nue nyidroti pi, ke pëkö ngazo i nyidro nge ketre, xou i angatre la ka ala nyim. Haawe, itre atr a atrunyi Akötresieti jë hnene lai ewekë ka traqa,
22 ke ame lo lai atr hna aloin,* ka 40 hë lao macatre i angeic.
23 Thupene la hna nue nyidro, nyidroti a tro ju kowe la itre xa atre dreng, me qaja la itre ewekë hna qaja koi nyidro hnene la itre tane i angetre huuj, me itre qatre ne la nöj.
24 Drenge jë hi angatr, angatr a ce thithi jë koi Akötresie me hape:
“Joxu Ka Sisitria, nyipëti hi la atre xupe la hnengödrai me fen, me hnagejë, me nöjei ewekë e hnin,
25 me atre upe la uati hmitötr troa qaja jëne la që i Dravita, keme hun nge hlue i nyipë, ka hape: ‘Hnauëne la kola enienije la itre nöj, nge hnauëne la itre atr a mekun la itre ewekë ka pë alien?
26 Itre joxu ne fen a cil, nge itretre mus a casi troa icilekeu me Iehova* memine lo hnei nyidrëti hna iën.*
27 Ke eje hi, hnei Herodra me Ponetio Pilato, me itre atr ne la nöj, me angetre Isaraela hna icasikeu ngöne la traone celë troa icilekeu memine la hlue i nyipë ka hmitrötr, ene Iesu, lo hnei nyipëti hna iën.
28 Celë hi matre, eatre jë lo itre hnei nyipëti hna qaja amë. Ngo hna eatre la itre ewekë cili ke ka mene nyipë, nge aja i nyipëti kö lai.
29 Matre enehila Iehova,* wange ju la itre nyinyithiina i angatr, nge aijijëne jë la itre hlue i nyipë troa catre cainöjëne la itre trengewekë i nyipë.
30 Nge ketre, epi the mano kö nyipëti sathe la ime i nyipë, matre aloine la itre atr, me kuca la itre hatren, me itre ewekë nyine hain ngöne la ëje Iesu, hlue i nyipë ka hmitrötr.”
31 Ame ju hi la angatr a xëwe* koi Akötresie, enienije jë hi la götran hnei angatr hna icasikeu ngön, nge tiqa ju hi angatr hnei uati hmitrötr, matre angatr a isa catre cainöjëne jë la trengewekë i Akötresie.
32 Nge ketre, hnene la itretre lapaun hna ce hni me cas, matre pëkö ala casi e angatr ka cipa ewekë, ngo angatre pe a ce thawa.
33 Nge hnene la men atraqatr, matre itre aposetolo a catre cainöjëne la mele hmaca ne la Joxu Iesu, nge tha hna tuluthe kö la ihnimi gufa i Akötresie koi angatr.
34 Matre pëkö ala cas e angatr ka pë ewekë, ke ame la nöjei atr ka trene hlapa maine uma, angatr a salemën me traqa fë la thupen
35 koi itre aposetolo. Nge kola thawa la mani thatraqane la itre ka pë ewekë.
36 Ame hnei Iosefa, lo hna hën hnei itre aposetolo ka hape, Banaba (e troa ujën kola hape, “Nekö Ne La Iakeukawany”), ketre Levi, atre Kupero,
37 hna salemëne la ketre götrane la hlapa i angeic, me tro fë la thupen kowe la itre aposetolo.
Itre mekun ecahu fen
^ Ger., “he ne kona.” Wange ju la HQP.
^ Maine, “ka thatreine e,” kola hape, ka tha qa kö hna ini thene lo itre Rabi.
^ Ene Iesu.
^ Maine, “kuci iamamanyikeu.”
^ Wange ju la HQP.
^ Maine, “Keriso i nyidrë.”
^ Wange ju la HQP.
^ Maine, “catre thith, sipone ielen.”
